Klodian Leka dhe Bislim Lakna janë dy studentët që ndaloi policia, sepse shkruajtën sipas porosisë së Ben Blushit emrat e Edi Ramës, Eduard Shalsit dhe Taulant Ballës në koshat e plehrave në rrugën “Muhamet Gjollesha” në Tiranë. Ligjvënësi mbajti një fjalë në foltoren e Kuvendit, ku la dy porosi; e para, ishte e kjo e emrave dhe e dyta, deputetëve që votuan këtë ligj t’u zëmë pritë dhe t’u hedhin plehrat në kokë.

Është një një fjalim populist, i cili më shumë se sa i shërben çështjes, i shërben siglës së re që do të shfaqet në skenën politike dhe që ka ngazëllyer ballinën e faqes së Niko Lesit, pasi duket sikur redaksia e dikurshme e gazetës “Koha Jonë” që shiste 70 mijë kopje në ditë, tash është themeluar parti.

Në Greqi, Spanjë, Itali, Britani janë disa forca politike që u ngritën në bazë të populizmit. Natyrisht, shembulli i Syriza, “5 stelle”, Podemos apo UKIP janë joshës dhe nuk është e vështirë që të gjejnë ideues edhe në Shqipëri. Është pak a shumë si puna e formateve të programeve televizive që tashmë i gjen thuaj të njëjtë kudo. Forcat politike që përmenda më sipër janë bazuar në thirrjet populiste, zakonisht të ekstremit të majtë, por shpesh qëllojnë të jenë ksenofobike, fashiste, anarkiste apo fashiste. Me një fjalë, ideologjia e tyre mund të gjejë strehë tek shprehja e famshme kineze: “turbulloje, se do të kullojë”.

Nuk e di dhe nuk më intereson se cilët janë mëtonjësit e kësaj filozofie politike, nëse e quajmë të këtillë për marrëveshje fjale. Thjesht, e shoh populizmin një nga reziqet më të mëdha që mund t’i shtohet Shqipërisë, një vend me paqe sociale të brishtë.

Çfarë ka kërkuar me dy porositë e tij politikani që përmenda në krye të shkrimit?

Ai në mënyrë krejt të rëndomtë, banale ka dashur që të shenjojë ata që votojnë një ligj që nuk i pëlqen jo vetëm atij, por shumë të tjerëve. Me një fjalë ka përcaktuar cilët janë “të këqinjtë” për një gjindje të emocionuar, aspak të rafinuar në thellësinë e analizës ndaj kundërshtarit. Shenjimi si mjet politik është përdorur me sukses drithërues ndaj hebrenjve prej nazistëve, Ku Klux Klan-it, komunistëve ndaj ish-pasunarëve, së fundmi ndaj refugjatëve që vinin në Ballkan prej zonave të luftës. Shenjimi është frymëzim që vjen nga urrejtja për tjetrin dhe përdorimi i populizmit në këtë këndvështrim mund të sjellë aksione konkrete, të cilat padyshim kanë për të ndikuar (nëse kanë sukses) në jetën e gjithë popullatës.

Them “nëse kanë sukses”, sepse asnjë aksion populist nuk merr formën e duhur, në qoftë se nuk udhëhiqet nga shpikësi i tij. Rasti i Ben Blushit është tipik. Ashtu si përherë, kur i ka lënë shokët në mesrrugë, ashtu u soll edhe me të rinjtë. I indoktrinoi, u la porosinë, por nuk i udhëhoqi. Edhe një herë fitoi parimi trimërues: “çuna, zëre se jeni vetëm”. Ata dy studentë i panë “shtatë penxheret”, ideologu siti miell krejt’ i lirë./27.al

3 komente në “Populizmi që të le tek pullë”

Kapter Jari says:

24 Shtator, 2016 12:43 te 12:43 pm

Foli burri i Mesiles

Përgjigjjuni
Vjosa says:

24 Shtator, 2016 15:54 te 3:54 pm

Kapterit:

Si te duket ty Mesila? Grua e mencur, nga me te mencurat prej shume deputeteve. Lere menjane ndonje ekstremizem te saj te meparshem. Mesila eshte Mesile, me nje personalitet te vetin. Pastaj c’hyn Mesila ketu? Kur do hiqni dore nga keto o anonime?

Përgjigjjuni
k says:

24 Shtator, 2016 19:22 te 7:22 pm

Duhet te kete reagim ndaj nismave te gabuara apo te demshme te qeverise. Dhe eshte mire kur ky reagim dhe ky qendrim vjen prej nje intelektuali te njohur. Sepse do te ishte per te qare me llahi sikur te vinte nga fabrika e sharjeve, shpifjeve dhe baltosjes, qe quhet PD. Dhe per parti populiste ka nevoje çdo vend. Boll me me parti “elitare” te kastave sunduese. Prandaj keto kasta e perdorim me perçmim fjalen “populiste”. Se duan te vazhdojne te qeverisin, apo me mire te themi te vjedhin dhe te mashtrojne vete, siç kane bere gjithmone. Persa i perket nismes se Blushit eshte shume e goditur. Nuk ma mbush mendjen dot askush se ligji per plehrat u sherben shqiptareve. Prandaj kazanet e plehrave kokes i kane pak si Rama, ashtu edhe Koka e kompani. Dhe nuk ka per te ngelur tek pull Ben Blushi. Shume te majte do te votojne per te ne zgjedhjet e ardhshme. Se Rama nuk eshte duke i frymezuar me. Sidomos pas ketij ligjit per plehrat.

Përgjigjjuni