Dokumentet e reja të PD, reagon Mark Babani: Rama nuk ka dijeni për të kaluarën time, nuk jam arrestuar kurrë në Itali

Kryebashkiaku i Vaut të Dejës, Mark Babani ka reaguar pas dokumenteve të reja të publikuara nga Partia Demokratike, ku pretendohet se socialisti është arrestuar më datë 4 prill 1994, në Itali, në zonën e Siçilisë, për kryerjen e veprës penale “Vjedhje në rrethana rënduese, e kryer në bashkëpunim”.

Babani hodhi poshtë akuzat dhe mohoi se është ai personi në dokumentet e publikuara nga PD.

Aty pretendohet se kryebashkiaku është arrestuar në Itali me emrin Marq Babaj.

“E gjjithë kjo histori është e sajuar, nuk ka lidhje me mua. Deklarimet i kam bërë të qarta. Nëse ata kanë ndonjë provë, le t’i çojnë në Prokurori.

Absolutisht nuk ka lidhje me gjurmët e gishtërinjve të mi. Mua nuk më ka thirrur Prokuroria, po pres ftesën dhe të shkoj të jap deklarimet e mia.

Nëse e kanë bërë padinë, pse dalin dhe flasin në TV? Në 4 prill të 1994 kam qenë në punë në hotel.

Kurrë në jetën nuk kam qenë as i arrestuar dhe as i ndaluar”, tha Babani.

Mark Babani paralajmëroi se do të bëjë denoncim penal për Gazment Bardhin, sekretar i Përgjithshëm i PD, duke e akuzuar për shpifje ndaj figurës së tij.

I pyetur nëse kryeministri Edi Rama apo Partia Socialiste i kanë kërkuar informacion pas akuzave të PD-së, Babani theksoi se diçka e tillë nuk ka ndodhur.

“Ky është një vetëdeklarim i imi. As zoti Rama dhe as PS nuk e dinë se çfarë kam bërë unë gjithë jetën time”, tha ai.

Babani hodhi dyshime se një nga arsyet e kësaj zhurme mund të jetë edhe përpjekja e demokratëve për të fshehur gjurmët e keqqeverisjes 25 vjeçare të bashkisë së Vaut të Dejës.

PD publikon dokumentin: Mark Babani është arrestuar në Itali për vjedhje makinash

Në një deklaratë për shtyp, sekretari i përgjithshëm i Partisë Demokratike Gazment Bardhi, ka cekur temën e disa kryebashkiakëve të Edi Ramës, që sipas tij kanë një të shkuar kriminale, duke u ndalur në veçanti te kandidati i kryeministrit për Vaun e Dejës, Mark Babani.

Sipas tij, Mark Babani është arrestuar më datë 4 Prill 1994 në zonën e Siçilisë me emrin e rremë Marq Babaj dhe në vend që ta shkarkojë, Edi Rama e mbron Mark Babanin, njësoj si Valdrin Pjetrin dhe Agim Kajmakun, që duhet të ishin në burg për falsifikim.

Deklarata e plotë e Bardhit:

Prej gati një muaji, Partia Demokratike ka publikuar të dhëna të pakundërshtueshme se tre nga kandidatët e Edi Ramës në bashki të ndryshme të vendit, kanë të kaluar kriminale. Valdrin Pjetri i Shkodrës, Agim Kajmaku i Vorës, Mark Babani i Vaut të Dejës e kanë fshehur të kaluarën e tyre kriminale. Për këtë arsye ata duhet të ishin larguar të gjithë nga detyra që mbajnë në mënyrë të paligjshme dhe duhet të ishin në burg për fallsifikim.

Filtri përballë shkeljes së ligjit duhet të ishte propozuesi dhe mbështetësi politik i tyre Edi Rama. Akti më normal i një kryeministri normal do të ishte shkarkimi i kandidatëve të tij kriminelë, por Edi Rama, i cili përgojon gjithkënd dhe flet për gjithçka, nuk ka gjetur akoma asnjë moment për të mbajtur qendrim për kriminelët e tij në bashki.

Edi Rama u detyrohet qytetarëve të Shkodrës një shpjegim pse zgjodhi Valdrin Pjetrin, një trafikant droge, për të përfaqësuar Shkodrën.

Edi Rama ka detyrimin t’u thotë banorëve të Vorës pse u ka caktuar një fallsifikator parash dhe mashtrues si Agim Kajmaku në krye të bashkisë.

Edi Rama duhet të marrë përgjegjësitë dhe të flasë sot përse vendosi që të identifikohet me një kriminel si Mark Babani në Vaun e Dejës.

Deri më sot Edi Rama ka bërë të kundërtën e marrjes së përgjegjësisë publike për emërimet e tij kriminale në bashkitë e vendit. Ai është fshehur si burracak pas zvarritjeve të prokurorisë, e cila akoma nuk ka një përgjigje për asnjërin prej kriminelëve të Edi Ramës.

Edi Rama vazhdon të bëjë sikur nuk dëgjon dhe nuk shikon që kandidatët që u ofroi shqiptarëve më 30 Qershor, janë kontigjent burgjesh dhe, njësoj si ai vetë, janë përfaqësues të padenjë për një shoqëri që kërkon të zhvillojë vlerat dhe standardet europiane.

Me heshtjen prej fajtori, Edi Rama provoi se është i pafuqishëm të përballet me të vërtetën dhe se vetëm bashkëpunimi me krimin është mekanizmi i vetëm që i siguron atij pushtet.

Në këto 6 vjet të drejtimit të vendit, Edi Rama u provua si Kryeministri që promovoi në politikë dhe në administratën publike mbi 300 persona me precedentë kriminalë, nga vrasësit dhe përdhunuesit, tek trafikantët e drogës dhe trafikantët e grave dhe vajzave.

Edi Rama hesht megjithëse e di që rasti më i fundit, i denoncuar nga Partia Demokratike, Mark Babani, ka mashtruar me Formularin e Dekriminalizimit. Ai është një person me precedent penal, është një i dënuar në Itali dhe sipas ligjit nuk mund të ushtrojë asnjë funksion publik, përfshirë atë të Kryetarit të Bashkisë.

Media ka transmentuar përbetimet e Mark Babanit, që ai nuk ka patur kurrë problem me drejtësinë dhe se nuk ka qëndruar as 24 orë në burg.

Ky është një mashtrim i Mark Babanit, që bëhet nën mbrojtjen e Edi Ramës. E vërteta është se Mark Babani është person me precedent kriminal.

Ky që shikoni është një dokument i nxjerrë nga sistemi shtetëror i burgjeve në Itali.

Sipas këtij dokumenti zyrtar, rezulton se:

Mark Babani, me emrin e rremë Marq Babaj, është arrestuar më datë 4 Prill 1994, në Itali, në zonën e Siçilisë, për kryerjen e veprës penale “Vjedhje në rrethana rënduese, e kryer në bashkëpunim”. Ai është arrestuar nga Policia Italiane duke vjedhur makina. Kandidati i Edi Ramës për Vaun e Dejës ka qenë pjesë e një grupi kriminal që vepronte në zonën e Siçilisë dhe që kishte kryer disa vjedhje.

Mark Babani alias Marq Babaj ka qëndruar në burg deri më datën 6 Maj 1994 dhe më pas është dënuar dhe dëbuar nga shteti Italian.

Kjo është vetëm një pjesë e dosjes kriminale të kandidatit të Edi Ramës për Vaun e Dejës.

Këto të dhëna provojnë se Mark Babani është subjekt ndalimi për të ushtruar një funksion publik nga ligji i dekriminalizimit.

Sipas ligjit për dekriminalizimin nuk mund të kandidojnë dhe as të zgjidhen kryetarë bashkie, personat ndaj të cilëve është marrë një masë arresti me burg, vendim dënimi apo dëbimi në një nga vendet e Bashkimit Europian, në rastin konkret në Itali.

Gjithashtu, Mark Babani duhet të ndiqet penalisht për fallsifikimin e Formularit të Dekriminalizimit.

Mark Babani është në dijeni të plotë të faktit se është një person me rekorde të shumëfishta kriminale. Mashtrimi i tij publik se nuk ka patur asnjëherë probleme me drejtësinë, provon se ai ka mbrojtjen e Edi Ramës.

Me heshtjen e tij, Edi Rama provoi se është vërtetë ai mbrojtësi i Mark Babanit, me kandidimin e të cilit tregoi edhe njëherë se është i lidhur pazgjidhshmërisht me krimin.

Partia Demokratike i kërkon organit të prokurorisë të veprojë menjëherë ndaj Mark Babanit dhe të zbatojë ligjin e dekriminalizimit.

Asnjë vonesë apo manipulim i organit të prokurorisë nuk e fsheh më të vërtetën se Edi Rama është politikani i vetëm në Europë, që promovon, mbështet dhe qeveris me krimin.

Rama shuan "shpresat" e opozitës: Zgjedhjet e tjera në 2021. Nismën për shkarkimin e Metës do ta çojmë deri në fund

16:16 Politika

Zyrtari i lartë gjerman flet pas takimeve në Tiranë: Reforma në Drejtësi proces unik në rajon

13:35 Politika

“Çohuni çuna se na pret puna”, zbardhet plani se si u thur vrasja e Santjagos: Të katërt për të ruajtur “BMW”

12:52 Politika

Erion Veliaj ironizon Metën, i kujton si pushtoi bustin e “Vojo Kushit” me ndërtime pa leje deputeti i LSI

12:48 Politika

Integrimi në BE, Gjermania konfirmon mbështetjen për Shqipërinë: Rezultate të jashtëzakonshme në forcimin e shtetit të së drejtës

12:46 Politika

Taulant Balla: Gati të ulemi me opozitën për reformën zgjedhore

12:44 Politika

Balla: Gjermania do t’i thotë “po” negociatave. Drejtësia e pavarur, ngritja e SPAK do të shoqërohet me një regjistër për personat e nivelit të lartë që duhen hetuar

12:29 Politika

SHIFRAT: Shqiptarët, me shpenzimet më të larta për arsimin në Europë

11:56 Politika

Negociatat, Meta thirrje BE: Kushte për çdo institucion, të lexojnë raportin final të OSBE

11:55 Politika

Konferenca e Pezës "zbut" Metën, bashkohet me socialistët: Koha për të forcuar bashkëpunimin duke lënë interesat afatshkurtra

11:18 Politika