Te fundit
Vallja e rrezikshme e Macronit me Putinin
29 Qershor 2020, 10:32Bota
TEMA
Nga Enver Robelli
Të premten pasdite presidenti francez Emmanuel Macron ka diskutuar më shumë se dy orë me presidentin rus, Vladimir Putin.
Televizioni propagandistik rus RT ka postuar në rrjetet sociale një video ku dokumentohen 15 minutat e para të bisedës.
Macron dhe Putin lënë përshtypjen se janë miq të mirë. Njëri-tjetrit i drejtohen me “ti”.
Macron tha se dëshiron një “dialog mirëbesimi dhe mbi sigurinë” me Rusinë.
Qëllimi, sipas komunikatës së zyrës së Macronit, është një arkitekturë europiane e sigurisë “nga Lisbona në Vladivostok”.
Ky formulim është një referencë e parullës së Charles de Gaulle mbi Europën nga “Atlantiku në Ural”.
Macron i premtoi Putinit se do ta vizitojë Moskën deri në fund të gushtit.
Në komunikatën e Pallatit Elysée nuk tregohet nëse Macron para se të flasë me Putinin ka biseduar me partnerët europianë, sidomos ata të pjesës lindore.
Veçanërisht polakët janë të shqetësuar me vallen e Macronit me Putinin.
Macron edhe më herët ka theksuar se dëshiron një dialog me Rusinë mbi “mirëbesimin dhe sigurinë” dhe kjo deklaratë e tij ishte parë me shqetësim nga partnerët në NATO, të cilët e akuzojnë Macronin për mungesë solidariteti mes europianëve.
Macron sot do të takohet me kancelaren gjermane Angela Merkel.
Gazeta gjermane “Frankfurter Allgemeine Zeitung” e quan bisedën e Macronit me Putinin një përpjekje për vardisje në një kohë kur Gjermania ka dhënë sinjale ashpërsimi të raporteve me Rusinë.
Para 10 ditësh Prokuroria Federale Gjermane ngriti aktakuzë kundër një shtetasi rus për shkak të një vrasjeje në Berlin me porosi të qeverisë ruse.
Kancelarja Angela Merkel, e vetmja lidere europiane që flet rusisht dhe e njeh thellësisht historinë, kulturën dhe letërsinë ruse, u shpreh e mllefosur ndaj një sulmi kibernetik rus kundër parlamentit gjerman.
Merkel tha gjatë fundjavës se model i veprimeve ruse është “lufta hibride si mjet i destabilizimit”.
Më parë drejtësia gjermane lëshoi fletarrest kundër shtetasit rus Dmitrij Badin, i njohur si ushtar rus dhe autor sulmesh kibernetike kundër shteteve të tjera (dhe kundër Partisë Demokratike në SHBA para se Donald Trump të zgjidhej president).
BE sapo i ka vazhduar sanksionet kundër Rusisë për shkak të luftës në Ukrainën lindore.
1 komente në “Vallja e rrezikshme e Macronit me Putinin”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
O Robelli.Hiqni dore nga ideja idiote qe ka mberthyer shqiptaret per te gjykuar fuqite e medha lidhur me politiken boterore.Ne na intereson vetem qendrimi qe ato mbajne per interesat e shqiptareve.Dhe duhet te kuptosh,jo cdo veprim mund te jete kunder shqiptareve,pavaresisht nga dukja.Rusia eshte shume me e interesuar per njohjen e Krimese si pjese e saj dhe autonomne e rusofoneve ne Ukrahine se sa per te ardhmen e Kosoves,e cila tashme kurre nuk mund ti kthehet Serbise.Nje shkembim politik midis perendimorve dhe Rusise per keto problemet do te ishte ne interes te shqiptareve sepse Rusia eshte anetareve e perhereshme e KS dhe vota e saj bashke me Kinen jane kusht per pranimin e Kosoves ne OKB.Prandaj mos u ,,grricni,,shume me te gjithe ,thone tiranasit e vjeter .Askush nuk mund te garantoje miqesi absolute ne boten e sotme pragmatike ,ku interesat ekonomike dominojne mbi gjithcka.