Te fundit
Rreziku i 'fshatit politik' dhe sfida e qeverisë së re
10 Shtator 2025, 19:31Blog
TEMA
Nga Klevis Bakillari
Një nga paradokset është se Edi Ramës nuk i duhet më të afrojë kundërshtarët. Pushteti i gjatë, i madh dhe i padiskutueshëm i bën vetë ata t’i afrohen vetë. Në kushtet ku horizonti politik është i mbushur me një forcë të vetme, opozitarët, vështirë të luftojnë për alternativa,por do të gjejnë më të leverdisshme të kërkojnë strehë brenda kampit të fitimtarit.
Ky është një refleks i njohur në shoqëritë me institucione në konsolidim e sipër: pushteti i fortë kur bie në kontakt me oportunizmin, nuk prodhon sfida, por besnikë të rremë. Në këtë panoramë, Shqipëria rrezikon të kthehet në një “fshat politik”, ku të gjithë i shkojnë një dere të vetme, jo nga bindja, por nga oportunizmi. Dhe oportunizmi është ndoshta fenomeni më i theksuar i tranzicionit shqiptar. Kur karriera, posti apo interesi personal peshojnë më shumë se ideologjia dhe morali politik, atëherë pluralizmi nuk ka më kuptim. Ai reduktohet në fasadë: ngjyra të ndryshme që në thelb ushqejnë të njëjtin pushtet.
Me shpalljen e qeverisë së re, ky rrezik do të bëhet edhe më i dukshëm. Një pjesë e ish figurave të djathta, militantë apo ish-drejtues të Partisë Demokratike, të lodhur nga qëndrimi i pafund në opozitë,do të shfaqen të gatshëm,siç kanë nisur tanimë, të gjejnë strehë tek pushteti. Ky fenomen nuk është thjesht individual, por simptomë e një terreni politik ku lodhja dhe oportunizmi bashkohen për të ushqyer një pushtet të vetëm.
Por “fshati politik” nuk është i pashmangshëm. Përkundrazi, ai mund të kthehet në një sfidë pozitive për Edi Ramën dhe Partinë Socialiste. Sfida është e qartë: si të mos e shndërrojnë pushtetin e madh në një magnet oportunistësh, por në një model qeverisjeje që i jep frymë konkurrencës politike dhe e mban gjallë pluralizmin. Nëse PS arrin të ruajë hapësirën për zëra të ndryshëm, të respektojë institucionet dhe të krijojë kushte konkurrueshmërie, atëherë rreziku i “fshatit politik” mund të shndërrohet në një mundësi për forcimin e demokracisë.
Shqipëria s'ka nevojë të bëhet një fshat politik ku të gjithë trokasin në një derë të vetme. Ajo ka nevojë të bëhet një qytet politik – me shumë rrugë, shumë dritare dhe shumë zëra. Pushteti i gjatë është një provë e rëndësishme, por prova më e madhe është kjo: të mos lejohet që shoqëria shqiptare të ngushtohet në një hapësirë të vetme politike, e shtyrë nga oportunizmi. Nëse qeveria e re do ta kuptojë këtë, ajo nuk do të ketë bërë thjesht një mandat tjetër, por një shërbim historik për të ardhmen demokratike të Shqipërisë.
3 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Po or trap me zile, por kjo kurveri politike tek ne eshte provuar e ka rezultuar deshtim me pasoja. Kjo e ben te domosdoshem zbatimin e programit te fitimtarit e jo te pordheve te opozites.
Ai tashi thote te vij Sali Berisha ta mbushi prape gjykaten e SHISH-in me klanin e ciftelise. Jo se kam gje kunder malesoreve, por ne kohen e larg qoftit u ishte dhene license per te vrare si ne Republikat Afrikane. Ramen e antipatizoj, po me lart se ai s ka per momentin. Po iku te vij ndonje Agron Shehaj. Jo Luli, Likja, apo Saliu
Nuk eshte fshati politik qe I ofron njerzit, jo ore artikullshkrues , Jane kullat e Dubait, Jane kullat e Tiranes dhe Bregdetit , eshte vjedhja dhe korupsioni qe I ofron drejt pushtetit keto pushta dhe hajna te te gjithe ngjyrave te politikes. Per 4 vjet milioniere....