Te fundit
Hetuesit në kërkim të motivit të personit të dyshuar për atentatin e dytë ndaj zotit Trump
17 Shtator 2024, 22:00Bota
TEMA
Hetuesit amerikanë po kontrollojnë llogaritë e mediave sociale dhe postimet e personit të dyshuar për përfshirje në atentatin e fundit ndaj ish-presidentit Donald Trump, në përpjekje për gjetur motivin dhe nëse dikush tjetër mund të jetë përfshirë në incidentin e së dielës.
Policia në Florida e arrestoi 58-vjeçarin Ryan Wesley Routh në një autostradë kryesore të dielën vonë, pasi ai u largua me shpejtësi me makinën e tij nga klubi i golfit të ish-presidentit Trump në West Palm Beach të Floridës.
Zyrtarët thanë se të dhënat e mbledhura nga celulari i të dyshuarit Ryan Routh tregojnë se ai ishte në pritë për 12 orë, duke u fshehur në disa shkurre përgjatë një gardhi rrethues të fushës së golfit.
Ndaj të dyshuarit Ryan Routh janë ngritur akuza për posedim të paligjshëm arme dhe fshirje të numrit të identifikimit të armës. Ai nuk kishte të drejtë të mbante armë për shkak të një dënimit të mëparshëm penal. Në Shtetet e Bashkuara, personat me të kaluar kriminale nuk lejohen të blejnë, apo posedojnë armë. Zyrtarët thanë se kur hetuesit e FBI-së u përpoqën të flisnin me të dyshuarin Routh pas arrestimit, ai nuk pranoi të përgjigjej pa praninë e avokatit.
Në mungesë të gadishmërisë së tij për të folur, FBI-ja i ka kërkuar gjykatës leje për të kontrolluar kameran “GoPro”, që iu gjet të pandehurit, si dhe pajisje të tjera elektronike që ai mund t’i ketë lënë në vendngjarje, si dhe automjetin dhe pajisjet elektronike të lëna në adresat e mëparshme të shtëpive të tij.
“I dyshuari kishte një prani aktive në internet dhe ne jemi duke kontrolluar ato që ai postoi dhe historinë e kërkimeve të tij në internet”, tha agjenti i FBI-së, Jeffrey Veltri.
“FBI-ja u ka dërguar kërkesa të shumta kompanive për të dhënat në telefonat e të dyshuarit dhe llogaritë e mediave sociale”, shtoi agjenti Veltri, gjatë konferencës për shtypin të hënën vonë. "Ne morëm disa të dhëna dhe jemi në pritje të përgjigjeve të kërkesave tona të tjera."
Agjenti i FBI-së Jeffrey Veltri tha se zyrat në terren të FBI-së në Honolulu të Havait dhe Sharlotë të Karolinës së Veriut, kanë dërguar agjentë për të intervistuar anëtarë të familjes, miq dhe ish-kolegë të të dyshuarit.
Zoti Veltri tha se hetuesit po shikojnë gjithashtu nga afër deklaratat e tjera që i dyshuari ka bërë gjatë viteve, duke përfshirë intervistat që ai ka dhënë për mediat në lidhje me përpjekjet për të rekrutuar ushtarë afganë dhe të tjerë për të luftuar në Ukrainë.
Historia e të dyshuarit në internet tregon se ai, në një moment, dukej se mbështeste zotin Trump. Megjithatë, vitet e fundit, postimet e tij duket se sugjerojnë se ai ishte i zemëruar me zotin Trump.
Në një libër të vetë-botuar, në vitin 2023, Ryan Routh duket se inkurajonte Iranin të vriste ish-presidentin.
“Ju jeni të lirë të vrisni Trumpin”, shkroi ai në librin “Lufta e Pafitueshme e Ukrainës”, duke e quajtur kandidatin republikan për president një “budalla” dhe “bufon”.
Megjithatë, nuk dihet nëse Ryan Routh e ka bërë komplotin me dikë tjetër.
"Deri tani nuk kemi informacione se ai ka bashkëpunuar me dikë tjetër", u tha gazetarëve agjenti i FBI-së Veltri.
Hetuesit gjithashtu po përpiqen t'u përgjigjen pyetjeve se si i dyshuari vendosi të fshihej dhe të priste në një zonë të mbuluar me shkurre në perimetrin e fushës së golfit.
“Ishte një aktivitet që nuk ishte i përfshirë në kalendarin e lëvizjeve të ish-presidentit”, tha Ronald Rowe, drejtori në detyrë i Shërbimit Sekret të Shteteve të Bashkuara, agjencia përgjegjëse për mbrojtjen e ish-presidentit Trump.
“Ajo ndodhi jashtë axhendës së zotit Trump. Nuk ishte pjesë e aktiviteteve të planifikuara”, tha ai. "Pra, nuk kishte asnjë postim të tij, sepse ai nuk pritej të ishte atje."
Zoti Rowe megjithatë, mbështeti agjentët e Shërbimit Sekret që mbrojnë ish-presidentin, duke thënë se masat e reja "po funksionojnë" pavarësisht se i dyshuar kishte arritur në një distancë prej 365 deri në 455 metra larg zotit Trumpit me një armë gjysmë automatike.
I dyshuari “nuk pati fushëpamje të drejtpërdrejtë të ish-presidentit”, tha zoti Rowe. “Ai nuk e shkrehu asnjëherë armën” .
"Vigjilenca e agjentëve dhe veprimi i shpejtë i tyre ishte në përputhje të plotë me rregullat tona dhe unë i përgëzoj ata dhe partnerët tanë për reagimin shembullor", shtoi ai.
Ish-presidenti Trump falenderoi punën e agjentëve të Shërbimit Sekret gjatë një fjalimi në platformën e mediave sociale X, por gjithashtu shtoi: "Ne kemi nevojë për më shumë njerëz në ekipin e agjentëve që më mbron".
Presidenti Joe Biden dha një mesazh të ngjashëm për gazetarët në Shtëpinë e Bardhë të hënën.
"Shërbimi Sekret ka nevojë për më shumë ndihmë", tha zoti Biden.
"Mendoj se Kongresi duhet t'u përgjigjet nevojave të tyre", tha Presidenti Biden. "Mendoj se ne mund të kemi nevojë për më shumë personel."
Ronald Rowe, drejtor në detyrë i Shërbimit Sekret, mirëpriti mbështetjen nga Presidenti Biden.
"Ne kemi bërë më shumë me më pak burime për dekada", tha zoti Rowe, duke shtuar se personeli i Shërbimit Sekret po përballet me shumë sfida.
“Kemi nevoja urgjente tani dhe për të ardhmen”, tha ai. "Jemi duke diskutuar për këtë dhe jam i sigurt se do të marrim atë që na nevojitet."
Por në komentet për rrjetin ‘Fox News Digital’ të hënën, ish-presidenti Trump u duk se fajësoi presidentin Biden dhe kandidaten demokrate për presidente Kamala Harris.
“Retorika e tyre po nxit sulmet me armë ndaj meje, kur unë jam ai që do të shpëtojë vendin dhe janë ata që po e shkatërrojnë vendin – si nga brenda ashtu edhe nga jashtë”, tha zoti Trump.
I dyshuari “i besoi retorikës së zotit Biden dhe zonjës Harris dhe bazua në këtë ai veproi”, shtoi zoti Trump.
Presidenti Joe Biden e dënoi atentatin e dytë kundër paraardhësit të tij, duke e quajtur dhunën politike një veprim jo-amerikan.
"Nuk ka vend për dhunë politike në Amerikë. Asnjëherë. Kurrë", tha Presidenti Biden gjatë një fjalimi në një konferencë të kolegjeve dhe universiteteve afrikano-amerikane në Filadelfia.
“Në Amerikë, ne i zgjidhim mosmarrëveshjet në mënyrë paqësore, në kutinë e votimit. Jo me tytën e një arme”, tha Presidenti Biden të hënën.
“Amerika ka vuajtur shumë herë tragjedinë e plumbit të një vrasësi”, shtoi ai. "Kjo nuk zgjidh asgjë dhe thjesht përçan vendin."
Ky është atentati i dytë në dy muaj ndaj ish-presidentit Trump.
Më 13 korrik, një 20 vjeçar plagosi ish-presidentin Trump dhe vrau një mbështetës të tij gjatë një tubimi elektoral në pjesën perëndimore të Pensilvanisë. Dy persona të tjerë u plagosën nga të shtënat e tij.
Udhëheqësit e një Komisioni dypartiak të Kongresit, që po heton atentatin e 13 korrikut ndaj zotit Trump thanë se ata kanë ftuar në një seancë informimi drejtuesin e Shërbimit Sekret për incidentin e së dielës.
"Ne jemi të kënaqur që ish-presidenti nuk u dëmtua, por mbetemi thellësisht të shqetësuar për dhunën politike dhe e dënojmë atë në të gjitha format e saj", thanë në një deklaratë të përbashkët ligjvënësi republikan Mike Kelly dhe ai demokrat Jason Crow.
Një pjesë e të dhënave në këtë artikull u morën nga agjencia e lajmeve Associated Press.
6 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Po rrini se kerma Trap i organizon vete atentatet. Te besohet te njellosh me plumb dhe ti çpoje veshin e mos ti prek tullumbacen?. E mbani mend ate djalin ne
lali,nuk e di sa ja ke idenë e qitjes me pushkë,në rastin tonë ishte një pushkë gjysëmautomatike,ku precizioni është më i ulët se i një pushke me shul manual!!nuk ma merr mëndja që të dalë dikush që nuk është idiot i lindur për të bërë një "provë të tillë"!në 120 të presë që dikush ta qëllojë në vesh!!gjithashtu duhet të jetë dhe më idiot ai që merr përsipër rrolin e qitësit!!mjafton që të ndodhë një diçka e paparashikueshme gjat trajektores së plumbit dhe shënjestra të shkojë në PS!!tek gjërat e paparashikueshme që mund të ndodhin,janë:një valë ajëri,jo normale dhe e lëviz disa milimetra afër shënjestrës,një kacabun që ndërpret trajektoren dhe e ndrshon për pak milimetra o 1 cm,një kollitje,lemzë a teshtimë e shënjestrës,një rrahje jo normale e zemrës së qitësit,një lemzë në të njëjtën kohë me tërheqjen e gishtit,e shumë e shumë faktorë të tjerë,që do të bënin që shënjestra të shkonte në PS!!edhe qitësit më të mirë,kanë tolerancën e tyre në saktësi!!psh një qitës që në 100 m arrin rrezultatin maksimal 1000 pikë me 100 fishekë,nuk do të thotë se i fut të gjithë në një vrimë pa u dalluar se janë më shumë se 1 plumb!!qëndra e tabelës ka një diametër gati 3cm,ose 1 inç!!pra nuk ka idiot që i rri përballë një plumbi,edhe sikur ta ketë emrin tramp!!ai pati fatin që lëvizi kokën në momentin e duhur!!e vështirë ta bëjë dikush me vetëdije një veprim të tillë!!vetëm në cirk "kapet plumbi me dhëmbë"!!trapi pati fat dhe asgjë më tepër!!
Me siguri qe FBI nuk besoj se do ta kete te veshtire ta gjeje profilin e ketij qytetari ..........!!
lexuesi,"Me siguri qe FBI nuk besoj se do ta kete te veshtire ta gjeje profilin e ketij qytetari"?? ironi??apo thjeshtë një siguri e gabuar në vlersimin e profilit të një personi??normalisht profili krijohet duke mbledhur provat që janë zbuluar për një krim,dhe personi që ka kryer krimin nuk njihet!krijimi i një profili bën që të ngushtohet rrethi i personave tek të cilët mund të dyshohet!!këta e kanë në dorë personin që ka tentuar të bëjë atentatin,prandaj nuk kanë nevojë për një profil!!këta kanë nevojë të dinë qëllimin që e ka shtyrë këtë person të bëjë atnetatin!!aftësia e hetuesve mund ti afrohet shumë zbulimit të qëllimit që ka pasur atentatori ose shkakut që e ka shtyrë të bëjë një akt të tillë!!"ti afrohen shumë" për shkak se nuk është e thënë që të jetë e vërtetë edhe ajo që pohon i akuzuari!!një i akuzuar po ta luajë mirë rrolin nuk të jep shkakun real të veprimit të tij!mund të thotë "desha ta vrisja se gjatë një fjalimi të tij ai më tregoi me gisht duke më sharë me mënd"ti je shkërdhatë""!ec e vërtetoje se është apo jo e vërtetë!!
Kot spunon per FBi, si nesigurimin ne kohen e Dulles….Kalec
mendim i mënçur,sidomos i shkruar nga ti!!ka mundësi të më çosh një kopje të kartelës që mbushe ti në kohën e dullës??e di që nuk të pranuan për shkak të IQsë shumë të lartë 32.5!!