Protestat vazhduan gjatë natës nëpër qytete në Iran deri të shtunën në valën e indinjatës pas vdekjes këtë muaj të 22-vjeçares Mahsa Amini, ndërsa presidenti i Republikës Islamike Ebrahim Raisi tha se ato duhet të shtypen me vendosmëri.

Protestat shpërthyen në Iran një javë më parë në funeralin e 22 vjeçares kurde e cila vdiq pasi ra në koma pas ndalimit nga policia e moralit, sipas së cilës ajo nuk e kishte vënë siç duhej hixhabin.

Vdekja e saj ringjalli zemërimin për kufizimet e lirive personale në Iran, kodet e rrepta të veshjes për gratë dhe një ekonomi të dobësuar nga sanksionet.
Tridhjetë e pesë persona janë vrarë në demonstratat njëjavore, sipas televizionit shtetëror të Iranit.

Media shtetërore e citoi të shtunën presidentin Iranian Raisi të thoshte se Irani duhet “të merret me vendosmëri me ata që kundërshtojnë sigurinë dhe qetësinë e vendit.”
Presidenti “theksoi se ishte e domosdoshme të bëhej dallimi mes protestës dhe prishjes së rendit dhe sigurisë publike dhe i quajti ngjarjet . trazira,” sipas medias shtetërore.

Gratë kanë luajtur një rol të spikatur në protesta, duke hequr dhe djegur hixhabët. Disa i kanë prerë flokët publikisht ndërsa turmat e indinjuara bëjnë thirrje për rënien e Udhëheqësit Suprem Ayatollah Ali Khamenei.

Agjencitë iraniane të lajmeve raportuan të shtunën se 739 protestues ishin arrestuar në provincën veriore të Gilanit, në Detin Kaspik.

Një llogari e një grupi aktivistësh në Twitter, 1500tasvir, tha se kanalet e komunikimit dhe linjat telefonike tokësore me qytetin veriperëndimor të Oshnavieh dhe linjat ishin ndërprerë.

Oshnavieh është një nga disa qytete në Iranin veriperëndimor, ku jetojnë shumica e 10 milionë kurdëve të vendit, që mbajti një tubim të premten. Grupi kurd i të drejtave të njeriut Hengaw postoi një video që tregonte se protestuesit kontrollonin disa pjesë të qytetit të premten.

Protestat janë më të mëdhatë që kanë përfshirë vendin që nga demonstratat për çmimet e karburantit në vitin 2019, kur rreth 1,500 njerëz u vranë në një goditje ndaj protestuesve. Ishte konfrontimi më i përgjakshëm në historinë e Republikës Islamike./ VOA

1 Komente

G
Genti

24 Shtator 2022, 17:23

Keto protesta duhet te detyrojne rregjimin tiranik te Ajatollaheve te largohen nga pushteti dhe Irani ti kthehet shtetit laik sic duhet te jete. Kur ngrihen grate ne proteste dhe shkelin hixhabin dhe presin floket kjo tregon se eshte kaluar caku ku populli duron nje tirani fetaresh ekstremiste dhe injorante. Nese ndodh keshtu dhe populli Iranian e largon junten e Ajatollheve nga pushteti atehere kjo do rezonoje ne gjithe rajonin. Nje vale clirimi nga islami radikal dhe injoranca qe ai perfaqeson do perhapej kudo ne vendet ku islami sundon duke detyruar perfaqesuesit te tij te kalojne ne hije ose ne periferine e jetes publike. Ky do jete clirim i vertete i vendeve Arabe dhe vendeve me shumice islame. Kjo do shtyje edhe popullin ne Afganistan te revoltohet ndaj talebaneve dhe te rimare ne dore pushtetin. S'ka rregjim dhe tirani qe i mbijeton revoltes se nje populli te tere.

Përgjigjjuni