Te fundit
BSH: Pse nuk e fiksojmë kursin e Euros
4 Prill 2026, 18:15Ekonomia
TEMA
Banka e Shqipërisë ka vlerësuar se, një vendim i mundshëm për të kaluar në një regjim të fiksuar të kursit të këmbimit do të kishte sjellë një goditje të fortë në parametrat kryesorë makroekonomikë të vendit.
Vlerësimet ekonometrike të Bankës së Shqipërisë sugjerojnë se ndjekja e opsionit të ndërhyrjes për të ruajtur një nivel të caktuar të kursit të këmbimit do të kishte sjellë pasoja negative në ekonomi.
Më konkretisht, në një skenar hipotetik ku kursi i këmbimit kundrejt Euros do të mbahej fiks gjatë periudhës 2023-2025 (në nivelin e tremujorit të parë të vitit 2023, apo 115.5 lekë/euro), vlerësohet se norma e inflacionit do të rritej deri në intervalin 6 – 7% në periudhën 2024-2025, nga niveli mesatar faktik prej 2.2% i kësaj periudhe.
Këto nivele inflacioni do të kërkonin rritjen e normës bazë deri në nivelin 7%, çka do të ishte një shtrëngim i qenësishëm i politikës monetare dhe do të impononte një kosto të lartë mbi huamarrësit.
Shtrëngimi i kushteve financiare do të frenonte kërkesën agregate, duke e ulur rritjen ekonomike deri në 2.6%, nga 3.9% që ka qenë aktualisht.
Ngadalësimi ekonomik do të rriste me 1.2 pikë përqindje normën e papunësisë për vitin 2005, duke e çuar atë në nivelin mesatar prej 9.7%, dhe duke shkaktuar vështirësi financiare për bizneset dhe individët. Po ashtu, raporti i kredive me probleme të bizneseve do të rritej me pothuaj 3 pikë përqindje, duke kërcyer nga niveli 4.6% në 7.5%.
Megjithatë, Banka e Shqipërisë vëren se ndryshimi i koniunkturës ekonomike në periudhën 2024-2025 krijoi hapësira për një prani të shtuar të saj në tregun valutor.
Më konkretisht, rënia e inflacionit nën objektiv në këtë periudhë, si pasojë e goditjeve të ofertës në çmimet e mallrave bazë dhe të naftës, rriti rreziqet potenciale që një forcim i shpejtë dhe i mëtejshëm të kursit të këmbimit mund të kishte mbi stabilitetin monetar.
Në këtë kontekst, një prani më aktive e Bankës së Shqipërisë në treg u konsiderua e nevojshme si masë mbrojtëse ndaj rrezikut, me probabilitet të ulët, por me kosto të lartë, të shmangies së kursit nga bazat e veta, duke reduktuar njëkohësisht edhe rrezikun potencial të zhvendosjeve të pritjeve inflacioniste nga objektivi.
Megjithatë, Banka e Shqipërisë thekson edhe njëherë se ndërhyrjet në tregun valutor nuk kanë synuar dhe nuk synojnë mbajtjen e kursit në një nivel të caktuar, por zbutjen e shpejtësisë së forcimit të tij, në funksion të reduktimit të rreziqeve që luhatjet e larta të kursit në tregun valutor mund të kenë mbi stabilitetin monetar e financiar dhe në funksion të ankorimit më të mirë të pritjeve inflacioniste.
Në përmbledhje të analizës së saj, Banka e Shqipërisë vlerëson se regjimi i lirë i kursit të këmbimit dhe përqasja e saj ndaj forcimit të Lekut në vitet e fundit i kanë mundësuar vendit një rritje ekonomike të lartë, të qëndrueshme dhe joinflacioniste.
Sipas Bankës së Shqipërisë, forcimi i kursit të këmbimit të Lekut përfaqëson një fenomen strukturor, për sa kohë dhe në masën që përmirësimi i bilancit të pagesave dhe reduktimi i primeve të rrezikut në tregun financiar vlerësohen të jenë të qëndrueshëm.
Përmirësimet strukturore që kanë diktuar forcimin e kursit të këmbimit janë pasqyruar në forcimin jo vetëm të kursit nominal, por edhe atij real të këmbimit.
Në vija të përgjithshme, sipas Bankës së Shqipërisë, forcimi i kursit ilustron një konvergjencë më të shpejtë të të ardhurave dhe të çmimeve të ekonomisë shqiptare me partnerët tanë tregtarë të Bashkimit Evropian.
Ky ritëm më i shpejtë konvergjence është i qëndrueshëm për sa kohë ai bazohet në rritjen e produktivitetit të ekonomisë shqiptare dhe reduktimin e primeve të rrezikut në tregun e brendshëm financiar.
Në veçanti, zhvendosja e fuqisë punëtore drejt sektorit të turizmit dhe shërbimeve të lidhura me të, sektorë të cilët janë në gjendje të paguajnë paga krahasimisht të larta, ilustron një rritje të produktivitetit të përgjithshëm të punës në ekonomi.
Po ashtu, toleranca që investitorët vendas kanë shfaqur ndaj niveleve relativisht të ulëta të normave të interesit në Lekë, si dhe rritja e interesit të investitorëve të huaj për të investuar në tregjet financiare shqiptare, janë dëshmi e primeve më të ulëta të rrezikut në to.
Këto konkluzione sugjerojnë se forcimi i kursit të këmbimit bazohet në faktorë strukturorë dhe pasqyron një lëvizje më të shpejtë konverguese të ekonomisë shqiptare, të paktën në afatin e shkurtër dhe të mesëm./ Monitor
6 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Kursi i ndryshueshëm nuk ka llogjikë ekonomike, por mbahet për interesa të veçanta.Këtu nuk ka studime."Argumentet"e bankës mbulojnë këto interesa. Kështu mbahen kot pikat e konvertimit të monedhës,në vend që të bëheshin në bankat,dhe të na hiqeshin matrapazët nga qafa.
Atehere mesoje prej meje o Nikoll se matrapazet me te medhenje apo dallkauket me te poshter jane bankat! Duke filluar nga bankat qendrore e pastaj ato te nivelit te dyte. Fajdexhinjte jane shume here me korrekt dhe te ndershem.
Mos e fiksoni se humbin shume drogaxhijtë.Per popullin vari lesht.
Kursi i euros llogaritet me çmimin e importit tē drithit ( fad), ç' do vit drithi ngrihet, euro bie, po ashtu dhe dollari llogaritet me çmimin e naftēs, sa mē e lart tē jetē çmimi importit, aq mē poshtē bēhet kēmbimi, po ashtu dhe Paundi britanik, me importin e energjis, sa mē shtrenjt ështē importi, aq mē lirē bēhet kēmbimi, pasi pensionisti nē vēndin tonē, nuk mund ti pērballoj ndryshimeve, ata qē s'punojn nuk mund tē dalin nē pension me 200€minimum jetik, dhe paga minimale nuk mund tē cēnohet, ndaj ministria financave bēn luhatje tē kursit pa rrezik protestash apo ndjekje nga SPAK pasi ēshtē interes kombetar.Ashtu siq u pa e nevojshme nga Amerikanēt qē Kosova tē mos ishte pjes e botērorit pēr shkak tē mbushjes sē stadiumit, basteve sportive, dhe reklamave televizive nē botē, pasi do biente audience televizive dhe interesi fifa-s.
Xha Brahos faleminderit,por nuk keni argumente,Ti dhe banka.
Kursin devizor e dikrojnë "oligarket"e karavellit! Ata bëjnë fitime marramendëse nga Import-Exporti dhe blerja e devizave në tregun e zi.Shqipëria êshtê jash qdo norme të ligjshme.