Te fundit
Vendimet për "Ben Qimen" e Arben Gropën/ Prokuroria kërkon nga KLD verifikim (VIDEO)
4 Gusht 2014, 10:51Sociale
TEMA
Prokuroria ka kërkuar nga Këshilli i Lartë i Drejtësisë dhe Ministria e Drejtësisë, verifikimin e disa vendimeve të dyshimta të marra nga gjykatat.
Një prej këtyre vendimeve ka të bëjë me Arben Gropën.
Ky i fundit u la nga gjykata me “arrest shtëpie” dhe nga kjo përfitoi që të arratisej.
Vendimi tjetër lidhet me Arben Isufaj, i njohur ndryshe me emrin “Ben Qimja”, që u la gjithashtu në “arrest shtëpie”
Në një konferencë për mediat, drejtoresha e kabinetit në Prokurorinë e Përgjithshme, Florida Ballauri, tha se organi i akuzës i konsideron të pabazuara në prova vendimet e gjykatave për çështjen e “Ben Qimes”, si dhe caktimin e masës së sigurisë për Arben Gropën, i cili rezulton i arratisur, por dhe çështjen e shtetasit Erjon Sadikaj.
“Kërkojmë nga KLD dhe Ministria e Drejtësisë që të vlerësojnë procedurën që është ndjekur për caktimin e masës se sigurisë për Arben Gropën.
Në vlerësimin e Prokurorisë së Përgjithshme ky vendim është i pabazuar ne prova.
Shtetasit Gropa i është krijuar mundësia t’i shmanget drejtësisë.
Kërkojmë verifikim edhe për vendimin për shuarjen e masës së sigurisë për shtetasin Arben Isufaj dhe vendosjen ndaj tij të masës arrest në shtëpi.
Duhet verifikim edhe për vendimin për lirimin e shtetasit Erjon Sadikaj. Në vlerësimin e prokurorisë ky vendim është i pabazuar në prova”, tha Ballauri.
Deklarata e plotë e Prokurorisë
Prokuroria e Përgjithshme kërkon nga Këshilli i Lartë i Drejtësisë (KLD) dhe Ministria e Drejtësisë të vlerësojnë procedurën që është ndjekur për vendimmarrjen e gjyqtarëve në disa gjykata të ndryshme të Shqipërisë, për të cilat, në vlerësimin e institucionit tonë janë tërësisht të pabazuar në ligj, në prova.
Për Prokurorinë e Përgjithshme, gjykata, nëpërmjet këtyre vendimeve, ka lejuar shkeljen e ligjit, të cilat sjellin pasoja të pariparueshme.
Për më tepër, në vlerësimin e organit të Prokurorisë, këto vendimeve përbëjnë edhe cënim të marrëdhënieve të besimit të mirë dhe reciprocitetit të institucioneve shqiptare me shtetet e huaja, veçanërisht me ato të Bashkimit Europian.
Më konkretisht, Prokuroria e Përgjithshme, në bazë të nenit 55 të ligjit nr. 8737, dt. 12.02.2001 “Për organizimin dhe funksionimin e Prokurorisë në Republikën e Shqipërisë”, i ndryshuar, kërkon nga Këshilli i Lartë i Drejtësisë dhe Ministria e Drejtësisë që të vlerësojnë procedurën që është ndjekur për vendimmarrjet, si më poshtë:
Së pari: Vendimin e trupit gjykues të Gjykatës së Apelit Vlorë, dt. 20.02.2014, e përbërë nga kryesues Alma Liçaj dhe anëtarë Skënder Damini dhe Gjinovefa Gaba, në caktimin e masës së sigurimit “arrest në shtëpi” për shtetasin Vangjel Zijaj (Arben Gropa) për efekt të shqyrtimit të kërkesës për ekstradim. Fillimisht, ndaj këtij shtetasi ishte vendosur masa e sigurisë “arrest në burg”. Në vlerësimin e Prokurorisë së Përgjithshme, ky vendim është tërësisht të pabazuar në ligj dhe në prova. Në bazë të këtij vendimi, shtetasit Gropa i është krijuar mundësi t’i shmanget drejtësisë. Në datë 24.07.2014, Ministria Drejtësisë ka lejuar ekstradimin e këtij shtetasit për në Itali, bazuar në vendimin e forms së prerë të Gjykatës së Apelit, dt. 03.07.2014. Ky shtetas, i cili gjendej në “arrest shtëpie” rezulton që është larguar nga vendi i qëndrimit dhe nuk është bërë e mundur ende të gjendet. Prokuroria e Rrethit Gjyqësor Fier, në datë 30.07.2014, ka paraqitur pranë Gjykatës së Rrethit Gjyqësor Fier kërkesën për ndryshimin e masës së sigurisë, duke kërkuar rikthimin në ‘arrest me burg” për këtë shtetas, si edhe është regjistruar procedimi penal ndaj tij për veprën penale të largimit nga vendi i qëndrimit.
Në bazë të vendimit të Gjykatës së Apelit Romë, Itali, ky shtetas është dënuar me 32 vjet burgim (pjesa e mbetur e pavuajtur e dënimit 29 vjet e 5 muaj e 27 ditë burgim), për kryerjen e veprës penale të “Prostitucionit dhe pjesëmarrjes në organizatë kriminale me qëllim trafikimin e drogës”.
Së dyti:Vendimin dt. 15.07.2014 të gjyqtares së Gjykatës së Rrethit Gjyqësor Fier, Igerta Hysi, e cila ka vendosur shuarjen e masës së sigurisë “arrest me burg” për efekt ekstradimi, për shtetasin Arben Isufaj, duke vendosur ndaj tij masën e sigurisë “arrest në shtëpi”. Në vlerësimin e Prokurorisë së Përgjithshme, ky vendim është tërësisht i pabazuar në ligj dhe në prova
Ky shtetas është shpallur në kërkim ndërkombëtar nga autoritetet italiane të drejtësisë, për shkak se Gjykata e Torinos Itali, me vendimin nr. 14754/04, datë 22.06.2010, ka caktuar masën e sigurisë “arrest në burg”, si edhe është lëshuar urdhër arresti ndërkombëtar për veprat penale të “Pjesëmarrjes në organizatën kriminale, me qëllim trafikimin e lëndëve narkotike”.
Së treti: Vendimin dt. 16.07.2014 të gjyqtarit të Gjykatës së Rrethit Gjyqësor Vlorë, Laurent Fuçia, i cili ka vendosur shuarjen e masës së sigurisë “arrest me burg”, për qëllime ekstradimi, duke urdhëruar lirimin e menjëhershëm për shtetasin Erjon Sadikaj.
Në vlerësimin e Prokurorisë së Përgjithshme, ky vendim tërësisht të pabazuar në ligj dhe në prova. Ky shtetas, aktualisht, i është shmangur drejtësisë dhe nuk gjendet.
Ndaj këtij shtetasi, Gjykata e Leçe-s, Itali ka lëshuar Urdhër-Arrestin datë 01.07.2011 për veprën penale të “Pjesëmarrjes në organizatë kriminale” dhe të “Trafikimit të lëndëve narkotike”.
Ndërkohë që po shqyrtohej kërkesa e Prokurorisë për ekstradimin e këtij shtetasi, në Gjykatën e Vlorës po zhvillohej paralelisht gjykimi nga autoritetet shqiptare për “armëmbajtje pa leje” dhe “Prodhim dhe shitje e lëndëve narkotike”. Në përfundim të këtij procesi, ndërkohë që ishin pezulluar afatet për shqyrtimin e kërkesës për ekstradim, gjykata e dënon me 5 vjet burgim, si edhe ka vendosur pezullimin e ekzekutimit të dënimit, duke e vënë këtë shtetas në periudhë prove me afat 4 vjeçar. Gjithashtu, gjykata ka vendosur gjithashtu lirimin e menjëhershëm të këtij shtetasi.
Në konsideratë të Prokurorisë së Përgjithshme, edhe vendimi i gjykatës për dënimin e të pandehurit me një dënim me kusht është tërësisht i pabazuar ne ligj, prova.
Ky shtetas ndërkohë që mbahej në burgim për t’u ekstraduar në Itali për veprat penale “Pjesëmarrje në organizate kriminale” dhe “Trafikim të lëndëve narkotike”, është hetuar dhe gjykuar në Shqipëri për dy vepra të tjera “Mbajtje pa leje të armëve luftarake dhe “Prodhim dhe shitje e lëndëve narkotike”.
Pra, është e qartë rrezikshmëria e lartë e këtij personi, si në territorin e Republikës së Shqipërisë, ashtu edhe jashtë saj.
Prokuroria e Përgjithshme gjykon se, në asnjë rast, një personi të kërkuar nga autoritetet e huaja për një vepër me rrezikshmëri të tillë të lartë shoqërore dhe aq më tepër te dënuar në Shqipëri për dy vepra penale, nuk mund t’i pezullohet ekzekutimi i dënimit dhe të vendoset në provë.
Krahas kërkesave drejtuar Këshillit të Lartë të Drejtësisë dhe Ministrisë së Drejtësisë, organi i prokurorisë po vijon të ndjekë procedurat ligjore të ankimit në gjykatën më të lartë për këto raste.
Prokuroria e Përgjithshme shpreh bindjen për angazhimin maksimal të dy institucioneve, nisur edhe nga përvoja e mëparshme. Vlen të përmendim impenjimin e Këshillit të Lartë të Drejtësisë dhe Ministrisë së Drejtësisë pas kërkesës pak muaj më parë të Prokurorisë së Përgjithshme për vlerësimin e procedurave të ndjekura nga gjyqtari i Gjykatës së Rrethit Gjyqësor Berat, Shyqyri Çobo. Pas kërkesës së organit të Prokurorisë, ndaj këtij gjyqtari ka nisur procedimi disiplinor.
Në këtë kuadër, Prokuroria e Përgjithshme është e bindur në angazhimin e institucioneve të drejtësisë për vlerësimin e drejtë dhe korrekt të procedurave që ndiqen në vendimmarrjet e gjyqtarëve.
1 komente në “Vendimet për “Ben Qimen” e Arben Gropën/ Prokuroria kërkon nga KLD verifikim (VIDEO)”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Ne celularet e tyre pervec te tjereve jane numrat e krereve te larte te LSI-se, te kryetarit te Bashkise Fier si edhe te disa deputeteve te Qarkut Fier. Nuk jane jetim, perkundrazi kane mbeshtetje te forta te Politikes dhe Pushtetit Lokal. Ndaj duket se ankimimi i fundit i Prokurorise ka per tu kthyer mbrapsht, si edhe ankimimet dhe deklarimet e tjera.
Nuk kam besim per momentin, se do te vije dita e llogari-dhenies se bashkepuntoreve te personave te shume ditur prej popullit, qe kane mbeshtetur hapur apo fshehte aferat e dyshimta.