Veliaj: Keqardhje për vendimin e sotëm të Gjykatës, pallatet te Diga e Liqenit nuk do të ndërtohen

Duke iu përgjigjur edhe interesit të gazetarëve për vendimin e Gjykatës së Apelit Administrativ për pallatet poshtë Digës së Liqenit, kryebashkiaku Veliaj tha se ndihej i zhgënjyer. Më poshtë përgjigjet e plota të kryetarit të Bashkisë së Tiranës:

– Z. Veliaj, a keni ndonjë koment për vendimin e Gjykatës  së Apelit ?

Nesër do të shohim se si kushërinjtë do të gjykojnë kushërinjtë e tyre për një fitim 220 milionë euro. Sigurisht që jam i zhgënjyer dhe i revoltuar. Kjo nuk ishte një mënyrë dinjitoze për t’iu përgjigjur interesit publik dhe i garantoj se Tirana nuk do të harrojë këtë që bënë gjyqtarët. Besoj se ishte e nevojshme të ndodhte kjo për të ilustruar pse reforma në drejtësi është kaq jetike për vendin. Në momentin që kushërinjtë do të gjykojnë kushërinjtë dhe luhen 220 milionë euro, unë e di si do të dalë rezultati nesër; e dija edhe para një jave, por e bëra gjithë këtë organizim për të demaskuar mënyrën se si funksionojnë gjyqet në Shqipëri.

Nëse deri dje ishin 98% e qytetarëve të Shqipërisë pro reformës në drejtësi, besoj se sot edhe ai 2% që kishte mbetur është 100% pro reformës. Dua të falenderoj një nga gjyqtarët që i rezistoi tundimit, pati kurajën të qëndronte për atë që është e drejtë dhe zgjodhi popullin dhe jo korrupsionin që vjen nga firmat e ndërtimit. Nesër do të shohim një gjyq farsë, ku kushërinjtë do të gjykojnë kushërinjtë, ashtu siç ndodh rëndom kur të gjithë qytetarëve u hyhet në hak.

Dua të sqaroj disa gjëra: Së pari, Bashkia e Tiranës sapo ka depozituar një padi, e cila kërkon që për sa kohë që nuk ka një vendim të Gjykatës së Lartë, e cila ka marrë në shqyrtim opinionin e Komitetit të Digave për të mos ndërtuar, atëherë ky gjyq do të pezullohet. Fillimisht duhet të dëgjojmë nga Gjykata e Lartë, e cila jep vlerësim mbi refuzimin e kësaj leje nga Komiteti i Digave dhe vetëm pasi të kemi këtë vendim nga Gjykata e lartë, atëherë mund të gjykohet në themel kjo çështje. Ndaj, sapo e kemi depozituar këtë padi, me ligjet e këtij shteti, Gjykata Administrative duhet fillimisht të shqyrtojë padinë që sapo kemi depozituar, të japë opinion, pra ose të vazhdojë diskreditimin, ose të vendosë që nuk ia vlen të fyesh një popull të tërë i cili e ka marrë një vendim, e ka një dëshirë, e ka votuar për këtë projekt, i cili po e sheh përditë paligjshmërinë.

Një gjë është e sigurt dhe nuk e luan as topi: Ndërtimi te diga nuk do të ndodhë! Bashkia e Tiranës ishte përgatitur të provonte lidhjen farefisnore dhe siç thotë ligji, deri në brezin e tretë përbën konflikt interesi. Ne e kishim këtë të provuar, u refuzua që ne të paraqiteshim si palë dhe vendimi u mor në një dhomë të mbyllur me 3 veta. Por, të paktën njëri pati kurajën që të votonte kundër këtij vendimi të pabesë për qytetin e Tiranës. Për sa kohë që gjykata vendos fshehurazi, unë kam gjithë të drejtën time që pa i deklaruar strategjitë tona në publik, të kem filluar punën paralele për bllokimin e atij ndërtimi.

Një gjë është e sigurt, aty nuk do të ketë ndërtime, por terrene sportive dhe parqe për qytetarët. Kësaj çështjeje do t’i shkoj deri në fund, qoftë edhe për të diskretituar këtë sistem të kalbur që kemi në drejtësi. Ndërkohë, dua t’i garantoj qytetarët e Tiranës se jo vetëm nuk do të ketë ndërtime tek diga, por do të merren të gjitha masat që te diga të mos ketë edhe teksa ne vazhdojmë këtë proces gjyqësor, ka disa alternativa që ne po i  shqyrtojmë dhe kemi filluar t’i vëmë në operacion. Dua t’i garantoj gjithashtu që asnjë punë nuk do t’i ngelet mangët Tiranës. Ritmi i punëve do të vazhdojë çdo ditë pa u ndalur.

Dua të sqaroj këtu edhe mediat e PD-së: Nuk kam thënë se Tirana nuk i do njerëzit e bashkisë tjetër; jo, ajo që kam thënë është se Tirana nuk i duron dot vandalizmat dhe dikush, jo nga një bashki tjetër, por nga qielli të bjerë, e që shkatërron Tiranën, Tirana nuk i honeps dot sjelljet vandaliste. Këtu nuk ka të bëjë me racizëm, këtu ka të bëjë me këdo që pështyn Tiranën, që thyen në Tiranë, që shkatërron në Tiranë, që pshurr në Tiranë, që ndot në Tiranë, që fyen e që sillet harbutshëm me pronën publike.

Garancia që u jap qytetarëve është se nuk do të ketë ndërtime te diga dhe projektet e Tiranës do të vazhdojnë pa u ndërprerë. Përkundrazi jam sot më i frymëzuar edhe të ekspozoj shkeljet e gjyqësorit, por edhe t’i rri punëve në kokë në Tiranë që Tirana të shohë ditë më të mira. Punë, punë, punë, kjo është përgjigja jonë për të gjithë ata që shkelin në besë Bashkinë e Tiranës dhe misionin tonë për të ndërtuar Tiranën. Di t’ju them, të gjithë atyrë që marrin vendime kundër Tiranës, nga sot e tutje u humbet e drejta ti kërkoni shërbime Bashkisë së Tiranës dhe parimi është shumë i thjeshtë, i bën dëm qytetit mos prit që qyteti të të shërbejë! Vath në vesh për ata që marrin vendime tradhtare kundër interesit publik të Tiranës. Nëse nuk i shërbeni qytetit, qyteti dhe bashkia nuk ka kanë asnjë detyrim t’ju shërbejë juve. Kush nuk respekton ligjin, kush nuk respekton qytetin, nuk do të ketë ndihmë nga Bashkia e Tiranës.

– Si do të veprojë Bashkia e Tiranës në rast se gjykata jep vendim për lejimin e punimeve, a ka një plan tjetër Bashkia për të bllokuar punimet?

Kur kushërinjtë nesër t’u japin kushërinjve çekun 220 milionë euro, bashkia do u thotë: Atë çek griseni sepse s’ka asnjë vlerë pasi ndërtimi aty nuk do të bëhet. I kemi marrë të gjitha masat që ndërtimi aty nuk do të ndodhë. Nuk mund të ketë ndërtim kur Komiteti i Digave thotë se këto ndërtime janë një gropë 220 milionë euro që i bën hatanë gjithë pjesës së njësisë 5 dhe kush banon në njësinë 5, të flejë i sigurt se aty nuk do të ketë më ndërtime dhe i kemi marrë të gjitha masat që ndërtime të mos ketë.

Jam i interesuar ta bëj publik këtë ekspozim të pacipë të Gjykatës, deri në fund dhe transparent deri në fund. Ndaj, edhe ky në vetvete është një mision publik. Kam punët e tjera në Tiranë, por do i dedikoj kohë edhe kësaj që ky ekspozim të bëhet i plotë, aty ndërtim nuk do të ketë, por më pëlqen të shoh se si këta po vetëdiskretitohen dhe se si po pranojnë që nesër kushërinjtë të votojnë kushërinjtë e tjerë dhe të fitojnë 220 milionë euro për t’i bërë hatanë të tjerëve. Hataja nuk do të ndodhë, njerëzit të rrinë të qetë, Bashkinë e kanë në krye të punëve, qyteti do të vijojë të zhvillohet, nuk ka njeri që të pengojë padrejtësisht zhvillimin e këtij qyteti dhe kush ia bën këtë pabesi qytetit, do marrë reston nga qyteti i Tiranës.

Veliaj: Tirana nuk i duron dot vandalizmat, as ata që sillen harbutshëm me pronën publike

14:30 Sociale

Mbyllet ndeshja Flamurtari-Skëndërbeu me rezultatin 0-2. Skëndërbeu shpallet kampion i Superligës. Të gjitha rastet dhe golat me VIDEO

18:53 Sociale

Bashkia e Kamzës replikon me Veliajn: Qytetarët tanë, punëtorë e të zgjuar. Ti dhe Rama i urreni veriorët

13:49 Sociale

Përfundon ndeshja Partizani-Teuta me fitoren e durrsakëve me rezultatin 1-2. Të gjitha golat dhe rastet me VIDEO

18:57 Sociale

SHËNIM/ Enea Jorgji i preferuari i dyshes Duka-Takaj

13:27 Sociale

FOTOT/ Bashkia e Tiranës shtron rrugën “Piro Goda” në Kombinat, Veliaj: Mbajtëm premtimin e dhënë një vit më parë

13:00 Sociale

FOTOT/ “Rilindja” e Elbasanit

11:49 Sociale

Infermierë nga Shqipëria me perspektivë të re në Gjermani

11:10 Sociale

Bie kërkesa e Bashkisë: Gjykata Administrative rrëzon kërkesën e Veliajt për ndryshimin e trupës gjykuese

10:35 Sociale

Fuga i rikthehet sërish Pëllumb Xhufit: Mjerë historia pêr historianin shpifës. Diçka e ka pickuar dhe unë i jam bërë pengesë

09:44 Sociale