Lulzim Basha ka thënë nga Kavaja, se Rama kërkon t’i bashkohet “Republikës së re”.
“Ai e ndjen se ky bashkim i madh është i pathyeshëm, i pamposhtshëm, është bashkimi kombëtar në 25 qershor.
Ndaj po bën çdo përpjekje të ngjitet si vagoni i fundit trenit të fitores së Republikës së re, por nuk ka dhe nuk mund të ketë vend në këtë tren për krimin, korrupsionin, taksat e larta, për shtypjen e qytetarëve”, deklaroi Basha në mitingun përmbyllës në Kavajë.
Prej kohësh flitet për një koalicion të mundshëm PD-PS pas zgjedhjeve të 25 qershorit, që pas marrëveshjes së 17 majit Rama-Basha.
Kjo mundësi nuk u përjashtua as nga kryeministri Edi Rama mbrëmjen e djeshme, ndërkohë që edhe gjatë fushatës, Basha e Rama janë treguar të kujdesshëm të mos e sulmojnë fort njëri-tjetrin, por janë marrë më shumë me LSI-në.