Te fundit
Mustafa Nano: Me betejën për kryeprokurorin e ri, duan të fshehin qëllime të tjera
13 Dhjetor 2017, 10:10Blog
TEMA
Mustafa Nano ka komentuar sot, betejën politike për kryeprokurorin e ri të përkohshëm.
Sipas tij, ky është një debat pa sens.
“Ka njerëz që dyshojnë se mazhoranca kërkon të zgjedhë një njeriun e vet në krye të Prokurorisë së Përgjithshme në këtë moment. Tani, të dyshosh te kjo mazhorancë, nuk bën ndonjë mëkat. Mirëpo në këtë rast, këmbëngulja e mazhorancës për të zgjedhur një kryeprokuror të përkohshëm të vetin, do të ishte idiotike. Nuk ka për t’i hyrë në punë, pasi nga ky Prokuror nuk pritet ndonjë gjë.
Ai është aty i përkohshëm. Ka për të qenë më i përkohshëm sesa na e merr mendja. Sikur gjërat të rrjedhin në mënyrë natyrale (dhe me “natyrale” kam parasysh edhe avashllëkun emblematik tonin), Prokurori i Përgjithshëm do të jetë në atë detyrë jo më shumë se 3-4 muaj.
Por edhe sikur të rrijë më shumë sesa kaq, ai nuk është se do ketë në dorë të bllokojë ndonjë proces të nisur, apo të iniciojë ndonjë proces tjetër. Prokurorët, sipas ndryshimeve kushtetuese, nuk kanë më varësi më nga Prokurori i Përgjithshëm. Duket se Rama e ka të qartë këtë gjë, dhe prandaj është treguar i hapur.
“Hajde të merremi vesh bashkë”, i ka thënë ai Bashës. Ky i fundit, nga ana e vet, duket se ka vetëm një betejë: Prokuror i Përgjithshëm duhet të mbetet ky që është derisa të zgjidhet i riu prej organeve të reja. Tani, edhe po të rrijë Llalla edhe ca kohë, nuk është se prishet ndonjë gjë. Por puna është se një gjë e tillë nuk ka bazë kushtetuese.
Jo të gjithë njerëzit e dinë se, me miratimin e ndryshimeve kushtetuese, Prokurori i Përgjithshëm do të ketë një rol tek-tuk administrativ, e tek-tuk dekorativ. Deri më sot, ai ka qenë në komandë të gjërave. “Prokurorët janë të organizuar dhe funksionojnë pranë sistemit gjyqësor si një organ i centralizuar”, thuhej në Kushtetutë. Dhe kjo e bënte Prokurorin e Përgjithshëm një nga njerëzit më të pushtetshëm në Shqipëri. Nuk është më kështu.
Prokuroria nuk është më organ i centralizuar. Në nenin 148, pikën 2 të Kushtetutës së re thuhet se “Prokuroria është organ i pavarur që garanton mbarëvajtjen, kontrollin e veprimeve të saj dhe respekton pavarësinë e brendshme të prokurorëve për hetimin dhe ndjekjen penale, sipas ligjit”. Vini re! Flitet për “pavarësinë e brendshme të prokurorëve për hetimin dhe ndjekjen penale”. Nga ana tjetër, prokurorët pezullohen e shkarkohen prej Këshillit të Lartë të Prokurorisë”, shkruan Nano për Mapo.
“Përveç kësaj, brenda institucionit të Prokurorisë janë futur struktura e Prokurorisë së Posaçme dhe njësia e posaçme hetimore, të cilat do duhet t’u interesojnë në mënyrë të veçantë politikanëve të nivelit të lartë. Në nenin 15, pikën 1, të ligjit mbi organizimin e funksionimin e Prokurorisë, thuhet se “Prokuroria e Posaçme ushtron ndjekjen penale dhe përfaqëson akuzën në gjyq në emër të shtetit për veprat penale të korrupsionit, krimit të organizuar dhe çështjet penale, sipas nenit 135, paragrafi 2, të Kushtetutës”.
Ç’është ky paragraf në nenin 135 të Kushtetutës? Çfarë thuhet në të? Ja: “Gjykatat e posaçme gjykojnë veprat penale të korrupsionit dhe të krimit të organizuar, si dhe akuzat penale kundër Presidentit të Republikës, Kryetarit të Kuvendit, Kryeministrit, anëtarit të Këshillit të Ministrave, gjyqtarit të Gjykatës Kushtetuese dhe të Gjykatës së Lartë, Prokurorit të Përgjithshëm, Inspektorit të Lartë të Drejtësisë, Kryetarit të Bashkisë, deputetit, zëvendësministrit, anëtarit të Këshillit të Lartë Gjyqësor dhe të Këshillit të Lartë të Prokurorisë dhe drejtuesve të institucioneve qendrore ose të pavarura, të përcaktuara në Kushtetutë ose në ligj, si dhe akuzat kundër ish-funksionarëve të sipërpërmendur”.
Siç shihet, Prokuroria e Posaçme dhe Gjykata e Posaçme do të kenë për detyrë të ndjekin këmba-këmbës zyrtarët e lartë, duke filluar nga kryetarët e Bashkisë deri te Presidenti e Kryeministri i Republikës. Kur ambasadori Lu tha se në fillim të vitit të ri do të kemi arrestimin e peshqve të mëdhenj, kishte parasysh prokurorët e prokurorisë së posaçme. Dhe këta të fundit do të zgjidhen sërish nga Këshilli i Lartë i Prokurorisë.
Ngado që t’i vish rreth institucionit të prokurorisë, të shfaqet Këshilli i Lartë i Prokurorisë. Kështu që beteja për fatin e Prokurorit të Vjetër apo për emërimin e atij të riut, është një teatër, nëpërmjet të cilit duan të fshehin qëllime të tjera”, vijon më tej argumentin e tij, Nano.(TemA)
1 komente në “Mustafa Nano: Me betejën për kryeprokurorin e ri, duan të fshehin qëllime të tjera”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Me sakte nuk mund te thuhet.Lepuri fshihet ne vend tjeter.Dhe qellimi kryesor eshte te vazhdoje te jete akoma ne detyre kryetari i krimit te pergjithshem,sic citon dhe avokat Ngjela,dmth pryeprokurori i Berisho-Likes e kompani,qe ti mbroje sa te mundet,sic ka bere deri me tani,duke mbyllur te gjitha dosjet e korrupsionit dhe te krimeve te 21mjanarit,te gerdecit etij etj e duke fjetur mbi to.Te gjitha te tjerat jane llafe pazari per tu gjendur ne muhabet dhe per te bere zhurme e presjon mbi qeverrine dhe Edi Ramen.