Te fundit
Llogaridhënia në Librazhd, Balla: Do të auditojmë dhe kontrollojmë cilësinë e çdo punimi që është bërë deri tani
30 Maj 2018, 18:58Politika
TEMA
Llogaridhënia me qytetarët u ndal në Lunik të Librazhdit ku për më shumë se 3 orë çdo banor i kësaj zone shprehu shqetësimet dhe mendimet e tij dhe mori përgjigjet nga Kryetari i Grupit Parlamentar të Partisë Socialiste, Taulant Balla, zv. Kryeministres Senida Mesi, zv. ministri i Transporteve Artan Shkreli, zv. ministri i Mbrojtjes Petro Koçi dhe zyrtarë tjerë, të cilët u përgjigjën drejtpërdrejt për fushat që mbulojnë.
Ishte shqetësimi i një qytetari në lidhje me pronën dhe pamundësinë për ta marrë atë për shumë vite që riktheu vëmendjen tek çështja e Reformës në Drejtësi.
“E shihni çdo natë në televizion se sa dhimbje po shkakton Reforma në Drejtësi. Edhe këto dallgët që mundohet të krijojë opozita, vijnë për shkak të dhimbjeve që shkakton kjo reformë.
Shumë gjyqtarë e prokurorë, jo vetëm që janë larguar nga sistemi i drejtësisë. Kanë bërë pasuri, duke mos bërë drejtësi, njerëz që kanë bërë para e vila duke u paguar nga njëra palë në dëm të palës tjetër, pavarësisht se pala tjetër është ajo që kishte të drejtë.
Para një viti pikërisht këtë i kërkuam popullit, votën për ta çuar reformën në drejtësi deri në fund. Tashmë reforma në drejtësi do të shkojë deri në fund dhe kush ka të drejtë do marrë drejtësi në gjykatë dhe kush nuk ka të drejtë, s’do të mund ta marrë padrejtësisht atë, tha Balla.
Duke folur për cilësinë e dobët të punimeve në investimet e kryera, Balla u shpreh se do të bëhet audit dhe kontroll për cilësinë e çdo punimi që është kryer.
“Na duhet të auditojmë dhe të kontrollojmë çdo gjë që është bërë deri tani. Në Prrenjas, për shembull, kemi investuar 4.3 miliardë lekë, por cilësia e punimeve aty është e paimagjinueshme.
Në sheshin e qytetit të Prrenjasit janë investuar 1 miliard lekë, por pleqtë thonë që u ngulet shkopi prap në baltë. Pra, për ne është shumë e rëndësishme që t’u qëndrojmë gjërave te koka deri në fund dhe për këtë po ashtu kemi nevojë për ndihmën e çdo qytetari”, – deklaroi Balla.
Ndërsa zv. Kryeministrja Senida Mesi, duke ju përgjigjur shqetësimeve të ngritura në lidhje me punësimin theksoi fort se pikërisht ky është prioriteti më i madh i qeverisë shqiptare.
“Nëse flas në terma të përgjithshëm dhe aty ku janë prioritetet e qeverisë, sigurisht e para është punësimi dhe duan që çdo vendimmarrje që neve marrim të prekë sado pak numrin e të punësuarve. Kemi bërë një punë të mrekullueshme për qasjen e investitorëve, karshi biznesit, sepse mendojmë që vetëm sipërmarrja e lirë dhe private është ajo që punëson.
Ne mendojmë që reforma në shërbimet publike është një reformë e cila duhet të vendoset në shinat e duhur dhe duhet t’ju shërbejë qytetarëve.
Fjala “shërbej” duhet të ngulitet në mendjen tonë të parën, që jemi administratë publike dhe pastaj në mendjet tuaja. Është e domosdoshme që ju të kuptoni se në jemi këtu pasi paguhemi me taksat tuaja, ne rrogën e marrim prej jush. Jemi të emëruar nga ju dhe na është besuar të punojmë për ju dhe me ju”, – përfundoi Mesi.
Po ashtu diskutimet në Lunik u ndalën në disa çështje me rëndësi të madhe për jetën e përditshme të këtyre banorëve si rruga që lidh këtë zonë, uji i pijshëm dhe problemet e energjisë elektrike, të cilat shkaktohen nga moti i keq, në një zonë ku linjat tashmë janë të amortizuara.
Lini një Përgjigje
Më të lexuarat
24 oret e fundit
Javen e fundit
Blog Tema
