“Lufta civile” turke në arsimin shqiptar

Me blerjen e shkollave dhe universitetit të New York-ut, përfaqësuesit e Erdoganit në Shqipëri e sollën konfliktin mes këtij të fundit dhe kundërshtarit të tij Gylenit në skenën e arsimit shqiptar. Shkollat turke të Gylenit ishin instaluar tashmë rehat që prej mbi dy dekadash duke krijuar një rrjet të gjerë të diplomuarish, një pjesë e të cilëve me njëfarë lidhjeje shpirtërore e kulturore me to. Deri vonë ato përfitonin edhe mbështetjen e shumëllojshme të qeverive shqiptare.

Pas një periudhe negociatash me shkolla të ndryshme, edhe fondacioni Maarif, dora pa doreza e Erdoganit në Shqipëri, ka materializuar praninë e vet përmes blerjes së shkollës 9-vjeçare, gjimnazit dhe universitetit të New York, ndërkohë që ka afishuar planet për blerjen e shkollave të tjera.

Përveç Tiranës fondacioni synon të blejë edhe shkolla të tjera të licensuara në qytete të tjera të vendit. Qëllimi zyrtar i Maarifit, siç shprehet formalisht është tërheqja e nxënësve nga shkollat e atij që qeveria turke e konsideron si terroristi Gylen si dhe krijimi i lidhjeve arsimore të nxënësve me Turqinë. Një pjesë e analistëve politikë e vendosin këtë orientim të ri në kuadër të tundimeve neo-otomane të shtetit turk.

Të dy palët synojnë krijimin e një formimi arsimor ndikues që i tërheq nxënësit drejt një drejtimi a një tjetri. 2.000 vjet më parë Çezari dhe Pompei ndesheshin në bregdetin e Ilirisë në kuadër të luftës së tyre për pushtet. Në atë kohë në lojë ishte Roma. Në 2018, përballja mes Erdoganit dhe Gylenit në një nivel shumë më pak të lavdishëm zhvillohet jo në fushat përpara Durrahiumit, por në bankat e rreth 15 shkollave me nxënës shqiptarë.

Arsimi shqiptar nuk ka asgjë për të fituar nga kjo ndeshje. Ndeshja turko-turke i sheh nxënësit shqiptarë si financues të përpjekjeve kundër njëri-tjetrit. Shkollat më të njohura të Gylenit si “Mehmet Akif” e “Turgut Ozal” vazhdojnë të tërheqin për inerci një pjesë të familjeve shqiptare që i shohin me imazhin e përpara 20 viteve kur bënin kontrast me shkollat publike.

Por në 2018, shkolla kryesore, “Turgut Ozal”, megjithëse mbetet motori ekonomik që mban gjithë perandorinë arsimore të Gylenit në Shqipëri, është larguar prej kohësh nga kreu i renditjes në provimet e Maturës. Shkollat e Gylenit investojnë fort në përgatitjen e nxënësve për Olimpiadat, shfaqjet e fëmijëve dhe aktivitetet publike duke njohur shijen e shtresës së mesme shqiptare për t’u mburrur me shkollën e fëmijës siç mburren me markat e veshjeve. Por ndërkohë lavdia e dikurshme është venitur.

Fondacioni Maarif është ende për t’u provuar në aftësitë menaxheriale. Por një gjë është e sigurtë: Erdogani vendosi të futet në tregun arsimor shqiptar për të luftuar Gylenin. Arsimi nuk është prioriteti kryesor, aq më tepër kur regjistrimet në shkollat e dy palëve do të bëhen sipas linjave të përplasjes Erdogan-Gylen.

Gjatë 2 viteve të shkuara të gjithë punonjësit e kompanive turke në Shqipëri që kanë lidhje me Erdoganin janë urdhëruar të heqin fëmijët nga shkollat e Gylenit. Tashmë, këta nxënës, por edhe nxënësit që vijnë nga familje shqiptare pro Erdoganit do të orientohen drejt shkollës 9-vjeçare, gjimnazit dhe universitetit të New York-ut në Tiranë. Vështirë të të shpëtojë ironia e faktit që Fondacioni i Erdoganit do të menaxhojë shkolla që mbajnë një logo amerikane në kulmin e epokës së akullnajave mes Erdoganit e Amerikës.

Do të jetë interesante të shohësh njëkohësisht në diplomat e gjimnazistëve apo studentëve të New York logon e Maarifit të Erdoganit si dhe statujën e lirisë në New York, gjithmonë nëse kjo logo dhe emri do të qëndrojnë pa ndryshuar deri në fund të vitit të ardhshëm shkollor.

Një pyetje interesante lidhet me synimin për të blerë shkolla të liçensuara. A nuk kishte mjaftueshëm kapacitet Maarifi për të marrë licensa për hapjen e shkollave në Shqipëri? Ekzistonte një frikë se licensat mund të mos jepeshin nga shteti shqiptar?

Me shumë gjasa përplasja Erdogan-Gylen do të prekë më tepër shqiptarët e rreshtuar pas njërit apo tjetrit. Pjesërisht edhe ato familje që nuk e kanë shumë idenë e tregut arsimor. Por përplasja do të profilizojë akoma më tepër shkollat e të dy palëve brenda dallimeve, gjë që mund të ftohë familjet shqiptare që nuk duan as njërin, e as tjetrin.

Megjithatë, duke qenë se Shqipëria ka mjaftueshëm përkrahës të secilës palë sa për të financuar shkollat përkatëse, përplasja premton të jetë e gjallë dhe e gjatë. Gjithsesi një përplasje që nuk premton asgjë të mirë për arsimin shqiptar.(CNA.al)

Studimi i ri, valët e të nxehtit do të bëhen të zakonshme

10:08 Sociale

FOTOT skandaloze: Përpunonin mish në kushte skandaloze brenda pikës së basteve, AKU bllokon 1.6 ton

09:32 Sociale

Shërbimet publike, qeveria gati miratimin e kartës së të drejtave për qytetarin

08:27 Sociale

Studimi: Rreth 900 mijë të rinj mbi 25-vjeç nuk dinë asnjë gjuhë të huaj

08:19 Sociale

Rama publikon videon nga puna e 1 mijë të rinjve: Mikpritja e parë e turistëve...

08:11 Sociale

Studimi alarmues: Temperaturat e larta do bëhen të zakonshme

19:48 Sociale

Emigrantët, Brukseli zyrtar deklarohet kundër marrëveshjes Shqipëri-Itali: Vetëm nëse dëshirojnë vetë ata...

19:24 Sociale

Tahiri, mesazh nga pushimet në vend-origjinën e tij: Kanë rënë çatitë, po mbahen themelet

18:36 Sociale

Rama jep lajmin e mirë nga Shëngjini: Për gjysmë ore do shkohet drejt Malit të Zi me rrugën e re

18:24 Sociale

Veliaj: Kemi hapur 100 kantiere pune në Tiranë, në periferi po çojmë të njëjtin standard si në qendër

15:13 Sociale