Te fundit
Një skicë e trishtë për Shqipërinë normale!
16 Tetor 2018, 19:40Politika
TEMA
Nga Astrit Patozi
Shqipëria normale është sot më e papërfaqësuar se asnjëherë më parë. Asaj nuk i lejohet refuzimi, madje as mospërfillja, sepse edhe kjo e fundit e ka çmimin e vet. Ngaqë është përdhunshëm e detyruar të zgjedhë patjetër njërin mes dy “Babaleve”, nëse do që të ketë një zë publik.
Edhe po qe e neveritur prej të dyve, është e detyruar që patjetër të rreshtohet në njërën prej turmave të klakerëve, që duartrokasin me ose pa lekë liderin e tyre, nëse do që dikush ta numurojë. Në mos gjithmonë, të paktën vetëm atëherë kur ka zgjedhje.
Shqipërisë normale nuk i lejohet as të mendojë me kokën e vet, sepse është e detyruar të pranojë njërin nga dy versionet zyrtare, edhe sikur të jetë e bindur plotësisht që janë të dyja gënjeshtra të trasha. Të udhëheqësit në qeveri, apo të atij tjetrit në opozitë.
Që do të thotë se e vërteta nuk duhet kërkuar askund tjetër, përveçse tek njëri prej tyre, madje në jo pak raste, tek të dy njëkohësisht. Dhe për këtë nuk ka nevojë domosdoshmërisht të presësh 17 majin. Sepse në këtë vend nuk lejohet të arsyetosh vetë apo të kërkosh shpjegime, larg qoftë, prova dhe fakte, jo e jo.
Shqipërisë normale nuk i lejohet as të kthejë kokën nga ana tjetër, nëse është e lodhur nga luftërat e vërteta apo të rreme me “Babale”. Sepse e ka të pamundur të shpëtojë nga pusitë, që fillojnë në mëngjes me produktet apo fjalimet që dalin prej fabrikave të dy partive dhe mbarojnë në darkë me konspektimin e tyre nga të gjitha mediat elektronike.
Shqipërisë nuk i lejohet të flasë e jo më të debatojë për tema të tilla të “rëndomta”, si taksat, çmimet, mjedisi, shërbimet publike, administrata, drejtësia, reforma zgjedhore, shteti, kushtetuta etj, sepse është e detyruar të pranojë si kauza kombëtare vetëm hallet personale dhe familjare të udhëheqësit në qeveri dhe të atij në opozitë. Të cilëve, çuditërisht, jo rrallë u përputhen agjendat.
Shqipërisë normale i ndalohet madje dhe që të qëndrojë mënjanë, sepse kjo i llogaritet që punon për llogari të armikut nga të paktën njëri prej liderëve, në mos nga të dy njëherësh. Shqipëria normale është e detyruar, jo vetëm të pranojë, por edhe të zgjedhë patjetër njërin prej tyre, jo vetëm një herë në dy vjet, kur shkon të votojë, por edhe çdo ditë tjetër që i ka falur Zoti.
Ndaj dhe banorët e saj janë sot më të dobët, më të pambrojtur dhe më të pamotivuar se kurrë, edhe pse me letra ne quhemi vend i lirë. Sepse të vetmen gjë që zgjedhin vetë dhe me dëshirë ata kanë, ose mbijetesën këtu, ose ikjen si refugjatë, duke braktisur dhe zbrazur Shqipërinë.
PS. Shqipëri normale quhet bashkësia e qytetarëve të pështirosur nga banaliteti dhe egërsia e race politikanësh, që e kanë futur atdheun mes këmbëve dhe po e shqyejnë pa mëshirë, duke na treguar se këtë “sakrificë” po e bëjnë për të mirën tonë. Popullsia e saj shtohet dita-ditës në përpjestim të drejtë e zvogëlimin e njerëzve që mund ta përfaqësojnë atë ende në të gjitha nivelet e pushtetit apo të hapësirës publike. Dhe jam shymë i sigurt që, nëse nuk do të ketë reagim, më e keqja nuk ka ardhur ende.
2 komente në “Një skicë e trishtë për Shqipërinë normale!”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Po kur do te hiqesh edhe ti si filozof e intelektual. Ne fakt je nje lolo qe rri tek pragu i shtepise se Berishes dhe pret te maresh porosine e radhes. Ne se je intelektual dhe ke pak integritet, nuk duhet t’i besh njesh partite, mbasi njera, ajo ne opozite po ben agresion te felliqur ne te gjitha drejtimet, ndersa tjetra ajo ne fuqi vetem po mundohet te mbrohet dhe jo tamam. Nuk e di se perse atakon Bashen, kur e di shume mire se ai qe po i ben keto qelbesirlleqe eshte Berisha yt. Dil e fol troc qe nuk ta mban nga gangsteri Berisha dhe me qe s’ke cfare ti besh atij(gomarit) i bie Lulit(samarit). Por perse e fut edhe Ramen ne kete valle? Ai duhet telendisur per paaftesi, si frikacak qe po lejon jashteqitjen e Shqiperise, Berishen tend me co. te livadhisin. Ne se e kritikon per kete, atehere edhe ne do te jemi dakort me ty. Por ti ske goje mbasi edhe pse e di kush eshte mortja e Shqiperise, nuk e thua, por shkruan per te treguar se je gjalle dhe je dikushi. Ne fakt ti je askushi. Rri te dera e Berishes te maresh porosine e radhes per ti blere ndonje gje andej nga pazari. Edhe pse e di se listen e deputeteve e beri Berisha, ti prap ke frike tia permendesh emrin dhe atakon Lulin. Te gjithe e dine qe Luli vetem zbaton urdherat e Berishes. Cudi! Si se ditke ti?!
Shkrim i sakte i zotit Patozi. Vec te tjerave, nje e keqe e madhe tek ne eshte fakti se ne tjetrin e shohim te veshur me nje kostum nje here dhe keshtu e mbajme mend. Ndodh qe kostumi nuk na pelqen, ose, sipas rastit, edhe na pelqen. Dhe ndonese tjetri ndryshon per mire a per keq, ne te pozicionuadit ne fronte kundershtare nuk ndryshojme, pse jemi rritur te ushqyer me sloganin antinjeri “O me ne, o kunder nesh. Rruge te mesme nuk ka.” Edhe nje here, per mendimin tim, shkrimi i Z. Patozi, permbajtja eshte e sakte dhe percjell mesazh per ata qe duan te kuptojne.