Vendimi i konfirmimit në detyrë të Donika Prelës u shpall në 5 shkurt, por megjithëse kanë kaluar 30 ditë zyrtare pune nga data e njoftimit, Komisioni i Pavarur i Kualifikimit nuk e ka publikuar ende vendimin me shkrim.

Nga Vladimir Karaj

Komisioni i Pavarur i Kualifikimit shkel afatet ligjore për zbardhjen e vendimit për Drejtuesen e Prokurorisë së Krimeve të Rënda, Donika Prela. Trupa gjykuese e drejtuar nga Roland Ilia, me relatore Valbona Sanxhaktarin dhe anëtar Olsi Komicin shpalli më 5 shkurt konfirmimin në detyrë të Prelës si dhe njoftoi se vendimi me shkrim do të komunikohej brenda 30 ditëve.

Afati maksimal i zbardhjes, pa llogaritur ditën e njoftimit të vendimit është plotësuar të enjten më 21 mars, por KPK nuk e ka zbardhur ende atë në faqen e vet zyrtare. Afati 30 ditor për Komisionin e Pavarur të Kualifikimit është detyrim ligjor që buron nga pika 7 e nenit 55 të ligjit “Për rivlerësimin kalimtar”.

Donika Prela drejton Prokurorinë e Krimeve të Rënda prej majit të vitit 2018 si e komanduar nga Prokurorja e Përgjithshme e Përkohshme, Arta Marku. Prela është gjithashtu kandidate për Strukturën e Posaçme kundër Korrupsionit dhe Krimit të Organizuar, e njohur ndryshe si SPAK.

Konfirmimi i Prelës kaloi përmes një sërë akuzash publike, kryesisht nga Partia Demokratike e cila e akuzoi atë si të njëanshme. Akuzat publike të deputetit të PD-së, Enkelejd Alibeaj e detyruan KPK-në që ta shtynte njoftimin e vendimit nga data 29 janar më 5 shkurt.

Prela po ashtu pati një seancë dëgjimore jo të lehtë. Ajo u përball me pikëpyetje mbi të ardhurat e bashkëshortit dhe transaksionet me pasuritë e paluajtshme në seancën dëgjimore me Komisionin e Pavarur të Kualifikimit më 22 janar. Prela u mbrojt duke dorëzuar në Komision dokumente shtesë mbi të ardhurat familjare.

Drejtuesja e Prokurorisë së Krimeve të Rënda, Donika Prela replikoi edhe me vëzhguesin e ONM-së, Theo Jacobs, i cili ngriti dyshime për mospagimin e taksave nga bashkëshorti për një pjesë të të ardhurave. Jacobs e krahasoi dosjen e saj të vetingut me shijen e keqe të një ilaçi të kapërdirë pa ujë në mëngjes, por që kalon në kohën e drekës.

Prokurorja Prela u përgjigj se ajo dhe bashkëshorti i saj kishin jetuar në Shqipëri dhe jo në ndonjë vend të BE-së, ku marrëdhëniet e punës fillojnë dhe mbarojnë në mënyrë të ligjshme. “Bashkëshorti im ka nënshkruar një kontratë dhe i është përmbajtur detyrimeve të saj. Legjislacioni shqiptar ngarkon me përgjegjësi punëdhënësin për detyrimet dhe nuk ka asnjë dispozitë që tregon se tatimi në burim mund të paguhet në mënyrë vullnetare,” tha Prela.

Drejtuesja e Prokurorisë së Krimeve të Rënda u ngarkua me barrën e provës edhe për burimet financiare të një të afërmi të bashkëshortit, i cili u kishte dhënë 15 mijë euro hua për blerjen e një apartamenti në vitin 2007 si dhe dha sqarime mbi denoncimin e një qytetari lidhur me apartamentin ku banon aktualisht, i blerë për 110 mijë euro në vitin 2018.

Pas komandimit të saj në Prokurorinë e Krimeve të Rënda, Prela ka qenë disa herë në qendër të sulmeve kryesisht nga opozita që e akuzon për pengim apo mbyllje të hetimeve ndaj zyrtarëve dhe ish-zyrtarëve të lartë të shumicës qeverisëse.

1 komente në “KPK shkel afatin për zbardhjen e vendimit ndaj Donika Prelës”

timos says:

22 Mars, 2019 18:14 te 6:14 pm

Zoti Kryetar i Keshillit te Ministrave te Republikes se Shqiperise,
Une qe shkruaj jam nje shqiptar qe punoj prej shume vitesh jashte Atdheut tim Shqiperise , por qe e nise diten e punes duke pire ate filxhanin e domosdoshem te helmit cdo mengjes ( leximi i gazetave kryesore te kraheve te ndryshem te politikes shqiptare) per te ruajtur kontaktin me cfare po ndodh ne Atdhe. Eshte e papranueshme te hedhesh bazamentet e drejtesise se re (reformuar) shqiptare me njerez te inkriminuar si zonja D. Prela. Meqe e niset cojeni deri ne fund kete pastrim te drejtesise shqiptare e sidomos te njerit prej organeve te saj kryesore sic eshte ai i akuzes . Eshte i patolerueshem jo vetem shtyrja e vendimit, por duhet patjeter dhe perjashtimi i menjehershem i kesaj figure te korruptuar ne te gjitha aspektet e karakterit dhe integritetit te saj moral and professional. Per me teper kur Zj. Prela aktualisht eshte ne pozicion drejtues brenda sistemit te drejtesise aktuale dhe me fuqine dhe privilegjet e saj mund te ndikoje ne marrjen e vendimit te gabuar.
Zoti Kryeminister, je padyshim i pari lider shqiptar qe po tenton te vesh bazat e shtetit ligjor ne Shqiperi qe nga themelimi i tij, dhe shqiptaret e historia do t’a vleresojne ne maksimum kontributin Tuaj. Ata qe e konceptuan dhe e ngriten ne sistem drejtesine e korruptuar shqiptare per te ruajtur vehten dhe privilegjet e familjeve te tyre , jane sot ne “protesta” shoqeruar nga grupe militantesh e kriminale rreth tyre, e kush e di s’e kush i paguan. Te lutem Zoti Kryeminister, shpresat e atij populli te shumevuajtur jane tek ju dhe tek ajo pjese e forces suaj politike te paperzjere ne zullumet e ketyre tre dekdave te fundit. Mos lejoni qe njerez si zj. D. Prela te perfshihet ne organet e reja te drejtesise, mos perfshirja e saj nuk i heq asnje presje kuptimit te drejtesis se re qe presin shqiptaret, perfshirja e saj ngre shume pikepyetje per drejtesine e re qe po ngrihet.
Ju Uroj suksese

Përgjigjjuni