Te fundit
DETAJET: Super-grabitja në aeroport, ja bashkëpunëtorët nën survejim të Muratajt dhe lidhjet e vjetra
19 Prill 2019, 13:32Kronika
TEMA
Mjeshtër i grabitjeve të bankave, kështu është cilësuar Klement Çala, 31-vjeçari që dyshohet të ketë bashkëpunuar me Admir Murataj edhe në grabitjen e 9 prillit në aeroportin e Rinasit.
Emri i tij ka dalë gjatë hetimeve për ngjarjen që mori vëmendjen e të gjithëve, jo vetëm brenda kufijve. Vrasja dhe identifikimi i Murataj, bëri që policia të verifikojë emrat pranë tij dhe bashkëpunëtorët nga e kaluara.
Policia nisi vëzhgimin dhe dyshon se ish-polici me iniciale M.H. Aleks Pepa dhe Klement Çala kanë bashkëpunuar me Murataj edhe në grabitjen e fundit të miliona eurove nga një avion që do të udhëtonte drejt Austrisë. Por arrestimi i tyre kërkon prova, të cilat grupi hetimor po i verifikon nëse do i çojnë tek personat e dyshuar.
LIDHJA E VJETËR
Admir Murataj dhe Klement Çala kanë pasur njohje që në Greqi, ku edhe kanë bashkëpunuar në të kaluarën për grabitje të tjera. Në Shqipëri ai është shpallur në kërkim në vitin 2017, bashkë me Admir Muratajn, si të përfshirë në grabitjen e autoblindave me para në Qafë Kashar më 9 shkurt.
Bashkëpunimi i mëhershëm i tyre ka qenë në Greqi në vitin 2013, ku bashkë me Murataj grabitën 1 milion euro në Bankën Kombëtare Greke në qendër te qytetit të Larisës dhe është shpallur në kërkim që prej vitit 2013.
I arratisur nga burgu i Trikallas në 22 mars 2013, si pjesëtar i grupit prej 11 personash të Marjan Kolës, Klement Çala, u shpall menjëherë në kërkim nga policia greke.
Rreth orës 8:40 në mëngjesin e së enjtes të 16 majit 2013, Çala së bashku me një person tjetër, të dhënat e të cilit ende nuk dihen, kanë hyrë fillimisht si klientë në bankë dhe më pas nën kërcënimin e armëve të tipit ‘Kallashnikov’ kanë grabitur rreth 1 milion euro. Ata kanë ikur nga vendi i ngjarjes përmes një dritareje.
Pak orë pas grabitjes është gjetur një makinë e djegur në zonën e Larisës, e cila ishte raportuar si e vjedhur që prej 17 tetorit, të 2011 në Athinë. Skenari duket i ngjashëm me grabitjet e transfertave bankare Tiranë-Rinas.
Çala ishte identifikuar si autor i plagosjes së një efektivi të policisë greke dhe vrasjes së një qytetareje të pafajshme gjatë shkëmbimit të zjarrit me trupat e policisë. Policia greke kishte gjetur gjurmë ADN-je të Klement Çalës në furgonin e bardhë të vjedhur në Korinth, me të cilin të arratisurit nga burgu i Trikalasë kishin tentuar t’i shpëtonin arrestimit.
Më 29 qershor 2015, Klement Çala, i shpallur në kërkim ndërkombëtar është arrestuar nga policia e Vlorës. Policia lokale finalizoi me sukses operacionin “Streha e fundit”, ku u bë i mundur arrestimi i 29-vjeçarit Çala banues në Elbasan, si edhe i një 31-vjeçari tjetër të shpallur në kërkim.
Në momentin e ndalimit Çala po lëvizte në lagjen “24 maji” me automjetin e tij tip “Benz” me targë, AA 447 KO. Ai ruajti gjakftohtësinë dhe tentoi t’i shmangej arrestimit duke u paraqitur me emrin Semir Koca. Për këtë identitet ai dispononte edhe një pasaportë dhe një kartë identiteti, që i përkisnin Republikës së Kosovës. Pas verifikimeve me policinë e Kosovës rezultoi se ishte identitet i rremë.
Përveç akuzave të autoriteteve greke që e kishin shpallur në kërkim ndërkombëtar për vepra penale, pjesëmarrje në organizatë kriminale, mbajtje armësh dhe e materialeve shpërthyese, grabitje me armë, vrasje dhe vrasje e mbetur në tentativë ndaj punonjësve të policisë etj, Çalës iu shtuan dhe akuzat e reja pas arrestimit nga policia e Vlorës.
Nuk dihen ende rrethanat, por pas vetëm tre muajsh Çala është liruar nga burgu ndërsa për të ishte lëshuar një urdhër ndërkombëtar arresti. Nuk dihet se si mundi, Klement Çala të dilte nga burgu duke pasr një numër kaq të madh akuzash mbi shpinë.
Më 16 dhjetor 2016, Prokuroria e Krimeve të Rënda ka mbyllur dosjen hetimore dhe ka dërguar për gjykim një nga të arratisurit nga burgu i Trikallas në Greqi në mars të vitit 2013, si pjesë e grupit të Marjan Kolës.
Shtetasi Klement Çala akuzohet për disa vepra penale, si ajo e “vrasjes me dashje të punonjësit të policisë”, mbetur në tentativë, dy herë, si edhe për veprat penale të krijimit të organizatës kriminale, largimit nga burgu dhe armëmbajtje pa leje”.
Akuza e fundit për Klement Çalën dhe e shkuara e tij kriminale e bëjnë atë një person me rrezikshmëri të lartë.(BW)
6 komente në “DETAJET: Super-grabitja në aeroport, ja bashkëpunëtorët nën survejim të Muratajt dhe lidhjet e vjetra”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Germoni, germoni se qenin e ngordhur do gjeni!…..
–
Erdhi dhe pergjigja nga Izraeli qe verifikoi vidjon e Ramutit: Pergjigja: “Vidjo jo e vertete, e trazuar dhe montuar nga keqberesit e PDse”
undefined
Sunitus shqipfoles, fatkeqesisht ste merr vesh kaptina .
Pas 3 muaj doli nga burgu. Kjo eshte drejtesia shqiptare.. Ai qe nxorri nga burgu perse nuk e futin sot ne burg??
Lirimi nga burgu I nje te arrestuari eshte I mundur vetem me dy menyra:ose ka nje vendim gjykate qe e shpall tre pafajshem,ose I ndryshon masen e sigurise,ose ka nje urdher nga ata qe e kane arrestuar dhe qe administrojne burgjet..Cilidoqofte ai person,duhet arrestuar pa asnje hezitim dhe kjo nuk eshte e veshtire te percaktohet.
Nuk arrij te.kuptoj nje gje ketu. Nese jane persona nen survejim pse u dashkan bere publike??? Apo qe ata te marrin masat per te qendruar”te paster”?? Nese jepen emra te tjere per te terhequr vemendjen tek personat reale eshte tjeter gje pastaj por une nuk e kuptoj pse kerkohet me kaq ngulm nga gazetaret qe te dine c’do gje per rrjedhen e hetimit. C’do gje ka kohen e vet dhe askush qe eshte nen hetim apo survejim nuk duhet ta dije.