Te fundit
“Acid klorhidrik plus H2O shëron Covid-in”: Lirohen dy kuruesit e rremë nga Mamurrasi
18 Korrik 2020, 10:29Kronika
TEMA
Gjykata e Kurbinit ka vendosur të lirojë nga qelia e paraburgimit, dy personat e arrestuar në Lezhë pasi mashtronin qytetarët se kishin ilaçe që do i shëronin nga Covid-i.
Gjykata vendosi masën “detyrim paraqitje” për 57-vjeçarin Frederik Frrokaj dhe nipin e tij 30-vjeçar, Henri Frrokaj, të dy banues në Mamurras.
Ata akuzohen se prodhonin ilaçe në mënyrë artizanale dhe ia shisnin qytetarëve me pretendimin se do t’i shëronte nga COVID-19, kundrejtë pageses 20.000 lekë të reja.
Dy personat ishin vënë nën hetim prej 2 muajsh, pas shqetësimeve se një mjek kishte shpikur një ilaç kundër Covid-it.
Frederik Frrokaj bënte postime në Facebook, ku bënte thirrje për prodhim të substancave për kurimin e virusit COVID-19 nga një përzierje e acidit klorhidrik me H2O, duke pretenduar se me këtë përzierje kishte shpikur ilaçin për kurimin e këtij virusi.
Gjatë operacionit të arrestimit, ai u kap duke i shitur ilaçin një klienti.
Nga kontrolli në banesën e tij u gjetën baza materiale, medikamente dhe preparate që shërbenin për të përgatitur ilaçin që këta shtetas tregtonin.
Frrokaj pasi bënte prodhimin e këtyre medikamenteve në kushte artizanale dhe jashtë kushteve laboratorike, në kushte shtëpie, ia jepte nipit të tij, i cili, pasi takonte personat e interesuar, ua shiste atyre kundrejt pagesës 20.000 lekë të reja, me premtimin se shëronin COVID-19.
Në banesën e 57-vjeçarit janë gjetur dhe sekuestruar në cilësinë provës materiale dhe pesë pajisje mjekësore pa faturë tatimore, të cilat dyshohet se mund t’i ketë futur kontrabandë.
Lini një Përgjigje
Më të lexuarat
24 oret e fundit
Javen e fundit
Blog Tema
