Te fundit
Teutës i mjafton goli i Bregut, vazhdon kriza e Vllaznisë. Laçi mposht Kukësin
3 Mars 2021, 18:26Sport
TEMA
Teuta i ka dhënë një tjetër goditje shumë të rëndë shpresave të Vllaznisë se mund të fitojë titullin kampion në këtë edicion, pasi mundi sot me shifrat 1-0 shkodranët në “Niko Dovana” dhe praktikisht ka zhdukur diferencën që ata kishin krijuar në kryesimin e kampionatit.
Ekipi i Brdariç ka vazhduar serinë e ndeshjeve pa fitore duke e çuar në 7 dhe tashmë është e qartë se vetëm ndonjë mrekulli mund t’i mbajë shumë gjatë në kryesim.
Në ndeshjen e sotme, diferencën e ka bërë një gol i shkëlqyer i Dejvi Bregut në pjesën e parë me një gjuajtje që u ndal në rrjetën e portës së Zogoviç pas një pjese të parë ku Teuta u shfaq më konkrete e kërkoi më shumë golin. Ndërkohë, në pjesën e dytë Vllaznia u zgjua disi dhe Brdariç provoi në çdo mënyrë që të ndryshonte rrjedhën e sfidës, por nuk kishte në fund as fatin me vete, pasi Hoxhaj goditi traversën e portës së Frashërit me një goditje dënimi, duke mos iu gëzuar dot një goli që do t’i jepte frymëmarrje ekipit ndërsa një gjuajtje e Cise përfundoi jashtë ngjitur me shtyllën.
Kështu, Vllaznia tani ka vetëm 1 pikë avantazh ndaj Teutës e Laçit që janë ndjekësit më të afërt e 2 ndaj Partizanit të vendit të katërt, në një kampionat që është hapur plotësisht.
Laçi vazhdon ecurinë fantastike në kampionat dhe është ngjitur në vend të dytë. Bardhezinjtë e Duros mposhtën 1-2 Kukësin në “Elbasan Arena”, duke siguruar fitoren e gjashtë në shtatë takimet e fundit. Emiliano Musta gjeti rrjetën në minutën e katërt dhe kaloi shumë shpejt miqtë në avantazh.
Eurogol i afrikanit Eze, i cili dërgoi topin në trekëndëshin e Sherrit. Ekipi i Duros reagoi shpejt dhe u rikthye në avantazh në minutën e 74-t. Redon Xhixha u frenua në mënyrë të parregullt nga Eze dhe kryesori akordi një penallti të diskutueshme.
Regi Lushkja nuk gaboi nga pika e bardhë, gol që i dhuroi tre pikë fantastike ekipit kurbinas. Suksesi i sotëm e ka ngjitur Laçin në vend të dytë me 40 pikë, një më pak se Vllaznia kryesuese, dhe po aq sa numëron edhe Teuta.
Lini një Përgjigje
Më të lexuarat
24 oret e fundit
Javen e fundit
Blog Tema
