Te fundit
Tabaku nga fasoneria: Sektori në kolaps, “Made in Albania” po humbet terren
14 Shkurt 2026, 09:20Ekonomia
TEMA
Nga një fasoneri ku mijëra produkte përgatiten për tregjet europiane, deputetja e Partisë Demokratike, Jorida Tabaku, ngriti alarmin për atë që e cilësoi si “kolaps total” të sektorit të prodhimit fason, një nga punëdhënësit më të mëdhenj në vend dhe një shtyllë kyçe e eksporteve shqiptare.
Në një video të publikuar në rrjetet sociale, Tabaku analizoi shkaqet që, sipas saj, kanë çuar sektorin drejt krizës, duke paralajmëruar se bashkë me një grup deputetësh do të paraqesë një paketë konkrete masash për ta nxjerrë fasonerinë nga situata e rëndë.
“Sektori që ka vuajtur më shumë problemet e ekonomisë, sektori që sot është në një kolaps total, është sektori i prodhimit fason,” – deklaroi ajo.
Sipas Tabakut, kriza e fasonit nuk është e papritur dhe as e izoluar, por rezultat i tre faktorëve të kombinuar që kanë rritur ndjeshëm kostot dhe kanë ulur konkurrueshmërinë:
1. Rritja e pagës minimale dhe e sigurimeve shoqërore.
Ajo argumentoi se rritja e pagës minimale ka sjellë rritje të menjëhershme të sigurimeve që paguhen nga punëdhënësit dhe punëmarrësit, duke shtuar me rreth 30% barrën e kostove për sektorin.
“Kjo e ka rritur ngarkesën e shpenzimeve me 30%, që do të dalin nga xhepi i punonjësve dhe punëdhënësve,” – theksoi Tabaku.
2. Taksimi i inputeve me 8–15%.
Deputetja e PD tha se Shqipëria është i vetmi vend në rajon që aplikon këtë nivel taksimi për inputet e prodhimit, duke e bërë produktin shqiptar më të shtrenjtë dhe më pak konkurrues në tregjet ndërkombëtare.
“Në total, taksat e rrisin me 30% shtesë koston e produkteve,” – u shpreh ajo.
3. Zhvlerësimi i euros.
Sipas Tabakut, rënia e euros ka pasur “pasoja katastrofike” për eksportuesit, pasi të ardhurat realizohen në euro, ndërsa kostot paguhen në lekë.
“30% shtesë vjen në këto produkte të zhvlerësuara vetëm si rezultat i euros,” – deklaroi ajo, duke shtuar se kjo është arsyeja pse shumë produkte shqiptare nuk po shiten dot jashtë.
Në fund të deklaratës së saj, deputetja e PD paralajmëroi një nismë konkrete nga opozita.
“Ne duhet ta shpëtojmë këtë sektor me politika konkrete, me masa konkrete. Për këtë arsye, bashkë me një grup kolegësh, do të sjellim një paketë propozimesh për ta nxjerrë sektorin nga kriza,” – u shpreh ajo.
Tabaku ka ngritur në mënyrë të vazhdueshme shqetësimin për rënien e konkurrueshmërisë së prodhimit vendas dhe për ndikimin e politikave fiskale dhe monetare tek eksportuesit. Vizita e sotme në fasoneri shihet si pjesë e kësaj linje qëndrimesh, ndërsa mbetet për t’u parë se cilat do të jenë masat konkrete që opozita do të propozojë në Kuvend për një nga sektorët më të ndjeshëm të ekonomisë shqiptare.
2 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Tre pika të paqarta për ekonomisten Tabaku: 1. U rritën pagat 30% = u rrit kostoja 30%!!! Ç'pjesë të kostos zë paga, që influencoka 100% në kosto? Sidomos në fasoneri, ku pjesën dërrmuese e zë lënda e parë. 2. Taksimi 8÷15% mbi inputet, nuk e rrit me 30% koston. Si?! Duke patur parasysh strukturën me siguri më pak. Taksat e tjera, që aludon zonja, janë mbi fitimin; s'kanë lidhje me koston, por me çmimin. 3. Zhvlerësimi i euros. Duke patur parasysh se punohet kryesisht me material importi dhe peshën specifike të tij në kosto, kjo ul kostot reale. Nuk duhet harruar, që mbivlera e abstraguar në industrinë tekstile minimalisht shkon sa dyfishi i pagave siguracione herë shpejtësinë e qarkullimit të kapitalit të avancuar. Ç'ligj do të paraqesë zysha me dobësi të theksuara profesionale. Thjesht, thuaj, si e djathtë që jam, kërkoj të ulen detyrimet e pronarëve të fasonerive, për të maksimalizuar fitimet. Dihet qysh herët që fasoneria është industria që përshtatet më lehtë në ekonominë e tregut pa shpenzime të mëdha. Efektiviteti vjen si rezultat i rritjes së rendimentit nëpërmjet rinovimit teknologjik, jo të uljes së taksave dhe detyrimeve ndaj shoqërisë, o "ekonomiste".
O tabake me duket se je bere ti kaps?