Te fundit
Google heq dorë nga zotimi kundër armëve me inteligjencë artificiale
15 Shkurt 2025, 20:44Hi-Tech
TEMA
Kompania e teknologjisë Google kohët e fundit ka hequr dorë nga politika e saj e deritanishme kundër prodhimit të armëve me inteligjencë artificiale. Korrespondenti i Zërit të Amerikës, Matt Dibble njofton nga Silicon Valley se si po sinjalizohet për një orientim drejt prodhimit të mjeteve me inteligjencë artificiale për qëllime ushtarake.
Për vite me radhë, Google, kompania gjigante e teknologjisë, e themeluar me parimin “Mos bëj keq”, përfshinte në faqen e saj angazhimin kundër prodhimit të armëve dhe teknologjive që shkaktojnë dëm, ose që mund të përdoren për përgjim.
Por javën e kaluar kjo frazë u hoq nga faqja e parimeve të inteligjencës artificiale të kompanisë.
Alphabet-i, kompania mëmë e firmës Google, nuk iu përgjigj menjëherë një kërkese për koment për këtë çështje. Në një postim në blog nga drejtuesit e Google-it ku shpjegohet politika e re thuhet se:
“Ka një konkurrencë globale që po zhvillohet për të udhëhequr në sektorin e inteligjencës artificiale, brenda një peizazhi gjeopolitik gjithnjë e më kompleks. Ne besojmë se demokracitë duhet të udhëheqin në zhvillimin e inteligjencës artificiale”.
Disa vëzhgues e shohin lëvizjen si një dëshmi se kompania tani po mbështet haptazi teknologjitë e saj të inteligjencës artificiale për përdorim në luftë.
Inteligjenca artificiale po përdoret gjithnjë e më shumë në fushëbetejë, nga Ukraina dhe deri në Gazë. Dhe kompanitë e teknologjisë në Silicon Valley, që dikur nuk dëshironin që mjetet e tyre të përdoren për qëllime shkatërrimtare, janë larguar tashmë nga politikat e vjetra kundër përdorimit ushtarak.
Kompanitë Open AI, Meta dhe Anthropic kanë të gjitha projekte të inteligjencës artificiale me ushtrinë amerikane ose kompanitë kontraktore të mbrojtjes.
Inteligjenca artificiale përdoret kryesisht për përcaktimin e objektivave për sulmet me dronë, në disa raste edhe me armë plotësisht autonome.
Studiuesi i mirënjohur i inteligjencës artificiale, Stuart Russell, i cili kundërshton armët autonome, mori pjesë në takimin e nivelit të lartë për inteligjencën artificiale në Paris. Ai foli për agjencinë e lajmeve AFP.
“Gjithnjë e më shumë, përparimi i luftës në Ukrainë diktohet nga përdorimi i dronëve të operuar në distancë, ose i dronëve plotësisht autonomë. Ky ka qenë një ndryshim rrënjësor. Kështu që unë mendoj se shumë strategë ushtarakë mendojnë se pa këtë lloj aftësie, thjesht nuk mund të luftosh në një luftë moderne”, tha zoti Russell.
Lidhjet e kompanisë Google me ushtrinë nuk janë diçka e re. Në vitin 2017, pavarësisht nga parimet e deklaruara të kompanisë, ajo ndihmoi në ndërtimin e një sistemi për përzgjedhjen e objektivave, të quajtur Project Maven, për Departamentin amerikan të Mbrojtjes.
Një vit më vonë, pasi mijëra punonjës protestuan, kompania Google i dha fund kontratës.
Kohët e fundit, kritikët thonë se Projekti Nimbus, një kontratë prej 1.2 miliardë dollarësh ndërmjet kompanive Google, Amazon dhe qeverisë izraelite për shërbimet kompjuterike, është përdorur për mbikëqyrje dhe përzgjedhje të objektivave në luftën e Gazës.
Për zotin Russell dhe vëzhgues të tjerë, ndryshimi i politikës së kompanisë Google është shqetësues.
“Duhet të supozojmë se nuk është rastësi që ky ndryshim në politikë vjen me një administratë të re që ka hequr të gjitha rregulloret mbi inteligjencën artificiale që ishin vendosur nga administrata Biden dhe tani po i kushton një theks të madh përdorimit të inteligjencës artificiale për aftësitë ushtarake”, thotë zoti Russell.
Ndërsa inteligjenca artificiale përparon me shpejtësi, qeveritë dhe bizneset po shqetësohen gjithnjë e më shumë se mos mbeten prapa./VOA
2 Komente
Lini një Përgjigje
Më të lexuarat
24 oret e fundit
Javen e fundit
Blog Tema
O të mjerë që besoni në demokracinë e rrjeteve sociale. Në kapitalizëm asgjë nuk ndërtohet për të qenë sociale, që nga produktet farmaceutike e deri në fjalën e fundit të kibernetikës, përfshirë dhe atë të inteligjencës artificiale, që nga manipuliml mendjes së njerëzve e deri tek manipulimi i tregut; madje edhe politika bëhet për qëllime fitimi. Mjetet sociale të sotme janë "iniciativa" të individit, apo grupe individësh privatë, që i zhvillojnë ato. Kush i financon? Bankat? Një pjesë e mirë e shpikjeve në kibernetike dhe inteligjencë artificiale janë financuar fillimisht nga lobe ushtarake dhe në përfitime të produkteve me karakter ushtarak, pastaj, për qëllime fitimi të mëtejshëm, janë shtrirë e zgjeruar për qëllime civile, por në rastin më të nevojshëm të kthyeshme menjëherë në dobi të ushtrisë. Nga ana tjetër, porositë e ushtrisë janë kontrata të frutëshme dhe të garantuar me të ardhura të sigurta, duke zëvendësuar parullën: çarmatosja është gatanci për paqen, me parullën imperialiste: që armatosja është garanci për paqen. Zhvillimet e inteligjencës artificiale, edhe zgjerimi dhe futja e tyre me qëllim shërbimi social dhe paqësor, duan fonde të mëdha financiare dhe këto fonde, i zotëron ushtria, që sot nxiten të rriten. Zotëruesit e rrjetave sociale, siç është Google, ose nuk kanë mjete të mjaftueshme edhe nëse aktivizojnë kapitalin e tyre të akumuluar prej vitesh, ose nuk duan të rrezikojnë dhe tentojnë tek fondet e ushtrisë për zhvillimin e përdorimit e inteligjencës artificiale në fushën ushtarake. Google është një "ndërmarrje" kapitaliste, si gjithë ndërmarrjet e tjera, pavarësisht se quhet rret social... pra rrjet shërbimi... nuk është për tu çuditur vendimi që ka marrë. Kaq, sa për një shënim, pa i hyrë hollësive.
O të mjerë që besoni në demokracinë e rrjeteve sociale. Në kapitalizëm asgjë nuk ndërtohet për të qenë sociale, që nga produktet farmaceutike e deri në fjalën e fundit të kibernetikës, përfshirë dhe atë të inteligjencës artificiale, që nga manipuliml mendjes së njerëzve e deri tek manipulimi i tregut; madje edhe politika bëhet për qëllime fitimi. Mjetet sociale të sotme janë "iniciativa" të individit, apo grupe individësh privatë, që i zhvillojnë ato. Kush i financon? Bankat? Një pjesë e mirë e shpikjeve në kibernetike dhe inteligjencë artificiale janë financuar fillimisht nga lobe ushtarake dhe në përfitime të produkteve me karakter ushtarak, pastaj, për qëllime fitimi të mëtejshëm, janë shtrirë e zgjeruar për qëllime civile, por në rastin më të nevojshëm të kthyeshme menjëherë në dobi të ushtrisë. Nga ana tjetër, porositë e ushtrisë janë kontrata të frutëshme dhe të garantuar me të ardhura të sigurta, duke zëvendësuar parullën: çarmatosja është gatanci për paqen, me parullën imperialiste: që armatosja është garanci për paqen. Zhvillimet e inteligjencës artificiale, edhe zgjerimi dhe futja e tyre me qëllim shërbimi social dhe paqësor, duan fonde të mëdha financiare dhe këto fonde, i zotëron ushtria, që sot nxiten të rriten. Zotëruesit e rrjetave sociale, siç është Google, ose nuk kanë mjete të mjaftueshme edhe nëse aktivizojnë kapitalin e tyre të akumuluar prej vitesh, ose nuk duan të rrezikojnë dhe tentojnë tek fondet e ushtrisë për zhvillimin e përdorimit e inteligjencës artificiale në fushën ushtarake. Google është një "ndërmarrje" kapitaliste, si gjithë ndërmarrjet e tjera, pavarësisht se quhet rret social... pra rrjet shërbimi... nuk është për tu çuditur vendimi që ka marrë. Kaq, sa për një shënim, pa i hyrë hollësive.