Kontrolle në burgun e Malandrinosit, policia gjen thikë dhe çelësa në qelinë e një shqiptari

Oficerët e Drejtorisë për Luftimin e Krimit të Organizuar kanë zhvilluar një operacion kontrolli në burgun e Malandrinosit, ku janë ushtruar kontrolle në disa qeli të të burgosurve.

Sipas informacioneve paraprake, policia u përpoq të hynte në qelinë e një të dënuari shqiptar, për të cilin kishte të dhëna se mund të mbante sende të paligjshme. Ndërhyrja fillimisht hasi në vështirësi, pasi i burgosuri kishte bllokuar hyrjen e qelisë duke e siguruar atë me një copë druri.

Pas ndërhyrjes së forcave të policisë, qelia u hap me forcë dhe u krye kontrolli i plotë i saj. Gjatë kontrollit, oficerët gjetën një thikë me këllëf të zi si dhe disa çelësa, të cilët dyshohet se mbaheshin në mënyrë të paligjshme brenda ambientit të burgut.

Operacioni u shtri edhe në qeli të tjera të institucionit penitenciar, ku në total u kryen 16 kontrolle.

Autoritetet kanë nisur hetimet për të zbuluar mënyrën se si sendet e ndaluara kanë hyrë në burg dhe nëse në këtë rast ka persona të tjerë të përfshirë.