Te fundit
Deputetët evakuohen nga Kuvendi pas kërcënimit me bombë, seanca shtyhet për në mbrëmje
5 Korrik 2025, 13:39Rajoni
TEMA
Autoritetet e sigurisë i kanë larguar të gjithë deputetët, mediat dhe të pranishmit e tjerë nga ndërtesa e Kuvendit të Kosovës të shtunën paradite, pas një kërcënimi me bombë, duke detyruar shtyrjen e seancës konstituive për në mbrëmje.
Policia konfirmoi për Radion Evropa e Lirë se sot në orët e paradites kishte pranuar informatë përmes një mesazhi “për një kërcënim me mjet shpërthyes në objektin shtetëror të RKS-së”.
Policia tha se i ka njoftuar prokurorinë dhe hetuesit policorë, të cilët, së bashku me njësitë dhe ekspertët përkatës për deminim, janë duke marrë veprimet e duhura të kontrollit në objekt.
Arben Loshi, zëvendës i sekretarit të Përgjithshëm të Kuvendit, tha se policia kërkoi evakuimin e të gjithëve nga ndërtesa dhe oborri i Kuvendit, sepse “një person ka bërë një telefonatë në gjuhën anglez duke kërcënuar se një bombë e vendosur brenda ndërtesës së Kuvendit do të shpërthejë brenda 10 minutave”.
Ai tha se, pas alarmit për bombë, seanca që duhej të fillonte në orën 11:00, do të mbahet sonte në orën 20:00.
Loshi theksoi se skuadra anti-bombë e policisë është i kryer kontrollet brenda dhe jashtë ndërtesës së Kuvendit.
Deputeti i Lëvizjes Vetëvendosje, Glauk Konjufca, tha se bëhet fjalë për një “kërcënim të qartë”.
“Edhe policia po mendon ashtu”, tha Konjufca duke u larguar nga ndërtesa Kuvendit.
I pyetur se si ka ardhur ky kërcënim, Konjufca tha se “më sa e di vetëm përmes telefonatës”.
Ndërkohë, nga pamjet televizive u pa mbërritja e një numri të oficerëve të Njësisë Speciale të Kosovës në ndërtesën e Kuvendit.
Oficerët u panë duke i kontrolluar me qen automjetet e parkuara në oborrin e Kuvendit.
“Na dhanë udhëzime të dalim [nga ndërtesa], sepse ka një kërcënim me gjasë. Nuk e dimë çka po ndodh dhe na kërkuan të dalim. Policia na tha për çështje të sigurisë”, tha Abelard Tahiri, deputet i Partisë Demokratike të Kosovës.
Vlora Çitaku, deputete e PDK-së, tha se sigurimi u kërkoi të largohen nga ndërtesa e Kuvendit, pa u dhënë sqarime.
“Siç duket ka pasur ndonjë kërcënim për ndonjë sulm apo diçka të ngjashme. Nuk kemi informatë të saktë, vetëm na thanë të largohemi”, tha Çitaku.
Deputetja e Aleancës për Ardhmërinë e Kosovës, Time Kadrijaj, tha se ajo dhe deputetët e tjerë të kësaj partie ishin duke u futur në sallë për të marrë pjesë në seancë, kur iu kërkua të largohen nga ndërtesa e Kuvendit.
“Nuk kemi informacion. Ne ishim në zyrën e grupit parlamentar të përgatitur për të shkuar në seancë, por na thanë të dalim jashtë se paska kërcënim”, tha ajo.
Deputetët u mblodhën sot për ta vazhduar seancën konstituive të Kuvendit, në përpjekjen e tyre të 42-të për ta bërë Kuvendin që nga 15 prilli.
Katër muaj pas zgjedhjeve të 9 shkurtit, Kosova vazhdon të jetë pa institucione të reja, ndërsa afati kushtetues 30-ditor për konstituimin e Kuvendit po soset.
Gjykata Kushtetuese e nxori më 26 qershor një aktgjykim i cili i detyron deputetët që brenda 30 ditëve ta konstituojnë Kuvendin.
Seanca e thirrur për ta zgjedhur kryetarin e Kuvendit dhe për të vazhduar me hapat e tjerë të konstituimit po dështon, për shkak të mungesës së pajtueshmërisë ndërmjet partive politike rreth formimit të një komisioni për votim të fshehtë për kandidaten për kryetare të Kuvendit, Albulena Haxhiu.
Prej kohësh, partitë më të mëdha kanë kundërshtuar propozimin e Vetëvendosjes që Haxhiu, ministre në detyrë e Drejtësisë, të zgjidhet në krye të Kuvendit.
Ato e kanë cilësuar Haxhiun si “figurë përçarëse” dhe i kanë kërkuar Vetëvendosjes, si fituese e zgjedhjeve, të vijë me një emër tjetër.
Pavarësisht kësaj, Vetëvendosje nuk ka hequr dorë, duke thënë se propozimi i emrit të kryetarit është e drejtë ekskluzive e fituesit të zgjedhjeve dhe se Haxhiu është kandidate meritore.
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Allahu ekbar Allahu ekbar