Ambasadorja e Izraelit në Shqipëri, protesta legjitime por kujdes me elementet antisemit, rrezikojnë të nxisin urrejtje!

Ambasadorja e Izraelit në Tiranë, Galit Peleg, ka komentuar për herë të parë përdorimin e simboleve dhe mesazheve anti-izraelite gjatë protestave për projektin turistik në Zvërnec, duke i cilësuar ato shqetësuese dhe duke paralajmëruar për rrezikun e nxitjes së antisemitizmit. Në një intervistë për “Albanian News Cast” me gazetarin Arbër Hitaj, diplomatja tha se disa nga pankartat e shfaqura në protestë i kujtuan asaj Gjermaninë e viteve ’30, kur problemet e brendshme u faturoheshin hebrenjve.
Peleg komentoi gjithashtu flotiljen e ndaluar që synonte të shkonte drejt Gazës, pjesë e së cilës ishte edhe një aktivist shqiptar. Sipas saj, këto iniciativa nuk kanë karakter humanitar, por synojnë provokimin politik ndaj Izraelit. Ambasadorja deklaroi se në këto anije nuk gjenden ndihma reale për palestinezët, por shpesh “drogëra të lehta dhe prezervativë”, duke i cilësuar flotiljet si një “spektakël” të organizuar nga aktivistë profesionistë.
Duke folur për luftën në Lindjen e Mesme, ambasadorja izraelite u shpreh se nuk mund të ketë një të ardhme të qëndrueshme për Gazën për sa kohë territori kontrollohet nga Hamasi. Ajo tha se diskutimet për zgjidhjen me dy shtete janë zbehur pas sulmit të 7 tetorit 2023, ndërsa theksoi se çdo plan për rimëkëmbjen e Gazës varet nga dobësimi dhe largimi i Hamasit nga pushteti.
Intervista e plotë për gazetarin Arbër Hitaj
Le ta nisim bisedën me situatën në Lindjen e Mesme. Kemi zhvillime të reja në Liban, ndërsa lufta në Gaza vijon. Si e shihni situatën?
Situata mbetet e ndërlikuar. Ne jemi në gjendje lufte që prej 7 tetorit 2023. Nuk ka nevojë të rikujtojmë sulmin, masakrën dhe tronditjen që përjetoi Izraeli atë ditë, si dhe luftën që pasoi.
Izraeli nisi një operacion të gjerë në Gaza për të neutralizuar Hamasin. Më pas lufta u shtri edhe në fronte të tjera, veçanërisht në përballjen me Iranin, në bashkëpunim me Shtetet e Bashkuara të Amerikës.
Ne e dimë se regjimi iranian është pas shumë prej zhvillimeve destabilizuese në Lindjen e Mesme. Ai mbështet dhe eksporton terrorizëm, ndërsa mbetet shqetësues edhe programi i tij bërthamor.
Sa i përket Libanit, Hezbollahu, si një përfaqësues i Iranit në rajon, vendosi të përfshihej në konflikt pavarësisht paralajmërimeve tona. Irani i shtyn ata vazhdimisht, sepse kufiri verior është fronti më i afërt me Izraelin.
Që prej asaj kohe, veçanërisht veriu i Izraelit është goditur nga raketa, dronë dhe sulme të vazhdueshme nga Hezbollahu.Disa muaj më parë u arrit një armëpushim, por Hezbollahu e ka shkelur atë pothuajse çdo ditë, me sulme të vogla, raketa apo dronë shpërthyes. Izraeli është kundërpërgjigjur sipas rrethanave.
Negociatat me Iranin po zhvillohen nga administrata amerikane dhe Presidenti Trump, ndërsa Izraeli vazhdon të përballet me një luftë ekzistenciale në veri, pasi qytetarët tanë ende jetojnë nën kërcënimin e sulmeve të përditshme.
Si e shihni situatën në Liban?
Po shohim një ndryshim inkurajues. Gjithmonë kemi thënë se populli libanez nuk është armiku ynë.
Kur isha fëmijë, kufiri me Libanin quhej “gardhi i mirë”. Banorët e jugut të Libanit vinin dhe punonin në Izrael. Nuk kishim marrëveshje paqeje, por kufiri ishte fleksibël.
Gjërat ndryshuan me fillimin e aktiviteteve terroriste kundër Izraelit.
Sot po shohim sinjale shprese. Në qeverinë dhe parlamentin libanez, por edhe mes gazetarëve, po dëgjohen gjithnjë e më shumë zëra që flasin hapur për mundësinë e normalizimit të marrëdhënieve me Izraelin dhe eliminimin e aktivitetit terrorist të Hezbollahut.
Mendoj se kjo lidhet edhe me dobësimin e Iranit, i cili është sponsori kryesor i Hezbollahut.
Në Izrael jetojnë mijëra qytetarë me origjinë nga Libani, kryesisht të krishterë, të cilët u larguan pas tërheqjes së Izraelit nga Libani. Për vite me radhë ata u injoruan në Liban, por së fundmi mediat libaneze kanë nisur t’i intervistojnë, duke i parë si një urë lidhëse mes dy vendeve.

Çfarë po ndodh në Gaza?

Vëmendja kryesore është përqendruar në veri, por operacionet në Gaza vazhdojnë.
Për sa kohë Hamasi përpiqet të ruajë pushtetin, ushtria izraelite vazhdon operacionet kundër terroristëve, përfshirë individët që morën pjesë në sulmin e 7 tetorit.
Hamasi vazhdon të kontrollojë popullsinë. Shikojmë vazhdimisht pamje të tmerrshme që tregojnë mënyrën se si trajtohen vetë palestinezët nga kjo organizatë.
Gaza nuk mund të rimëkëmbet për sa kohë kontrollohet nga një organizatë terroriste që nuk kujdeset për popullin e saj.
A është ende në tryezë zgjidhja me dy shtete?
Diskutimet për zgjidhjen me dy shtete praktikisht u ngrinë pas 7 tetorit.
Nuk është hequr nga tavolina, por aktualisht nuk është një temë që dominoi debatin.
Prioriteti tani është që Gaza të mos kontrollohet më nga terrorizmi dhe që banorët e saj të kenë mundësi të jetojnë dhe të rindërtojnë jetën.
Kjo mund të realizohet përmes një administrimi ndërkombëtar, siç po propozojnë Shtetet e Bashkuara.
Jam i lumtur që edhe Shqipëria, ashtu si Kosova, është pjesë e përpjekjeve ndërkombëtare për rimëkëmbjen e Gazës.
Megjithatë, asnjë plan nuk mund të funksionojë pa dobësuar Hamasin. Objektivi i Hamasit nuk është e ardhmja e palestinezëve, por mungesa e një të ardhmeje për Izraelin.

Ka raportime ndërkombëtare për mungesa ushqimore në Gaza. Cili është vlerësimi juaj?

Furnizimet ushqimore për Gazën nuk janë ndërprerë asnjëherë.
Ka pasur shumë lajme të rreme në media që pretendojnë të kundërtën.
Në Gaza hyjnë vazhdimisht ushqime, ilaçe dhe produkte për foshnjat. Problemi kryesor është shpërndarja e tyre pasi kalojnë kufirin.
Hamasi përpiqet të kontrollojë furnizimet, fillimisht për interesat e veta dhe më pas për përfitime politike.
Kemi parë raste kur palestinezët janë dhunuar nga Hamasi vetëm sepse përpiqeshin të merrnin ushqime nga depot.
Amerikanët po kërkojnë mënyra alternative shpërndarjeje, por sfida mbetet kontrolli që ushtron Hamasi.
Çfarë mendoni për flotiljen që u nis drejt Gazës dhe për aktivistët që morën pjesë në të?
Sipas mendimit tim, këto flotilje janë më shumë një spektakël sesa një mision humanitar.
Ata nuk sjellin ndihmë reale. Synimi i tyre është provokimi.
Në to marrin pjesë aktivistë profesionistë, persona që kërkojnë publicitet apo individë të lidhur me organizata që kanë afërsi me Hamasin.
Nëse synimi është ndihma humanitare, ekzistojnë rrugë të tjera për ta dërguar atë në Gaza.
Këto flotilje përdoren kryesisht për të krijuar tensione dhe për të sulmuar politikisht Izraelin.
Dua të ndalemi te Shqipëria. Ju keni parë protestat për projektin në Zvërnec. Në disa prej tyre janë shfaqur elementë anti-izraelitë. Si e komentoni?
Protestat janë një gjë shumë e mirë. Ato tregojnë se Shqipëria është një demokraci dhe se qytetarët mund të shprehin lirisht mendimet e tyre.
Unë i kuptoj plotësisht shqetësimet e protestuesve.
Por ajo që pamë në lidhje me Izraelin ishte shumë e pafat.
Disa persona po përpiqen të përdorin një protestë legjitime për të promovuar agjenda të tjera, madje të rrezikshme.
Kur pashë posterat ku kryeministri Rama paraqitej si hebre fetar, me simbole hebraike, më kujtoi elementë që kemi parë në Gjermaninë e viteve ’30, kur problemet e brendshme të vendit i faturoheshin pakicës hebraike.
Të përdorësh çështje të brendshme dhe t’ua atribuosh hebrenjve është një rrugë shumë e rrezikshme.
Dua ta them qartë: është lajm i rremë që Izraeli apo hebrenjtë po blejnë Shqipërinë apo territore shqiptare.

Jetojmë në kohën e inteligjencës artificiale dhe është shumë e lehtë të prodhosh imazhe apo lajme të rreme.

A mendoni se pas këtyre veprimeve mund të ketë grupe apo aktorë që duan të dëmtojnë marrëdhëniet Shqipëri-Izrael?

Nuk kam asnjë dyshim se bëhet fjalë për një grup shumë të vogël njerëzish që po helmojnë këto protesta.
Po ashtu nuk kam dyshim se ka aktorë që nuk duan të shohin marrëdhënie të mira mes Izraelit dhe Shqipërisë.
Ata nuk mund ta ndryshojnë historinë apo miqësinë mes dy popujve, por mund të dëmtojnë ndjenjën e sigurisë dhe mikpritjes që ndjejnë izraelitët kur vizitojnë Shqipërinë.
Dhe kjo do të ishte një humbje për Shqipërinë, sepse mikpritja dhe toleranca janë ndër asetet më të çmuara të saj.

VIDEO/ “Investimet e mia janë të ligjshme dhe në shërbim të Shqipërisë” - Gjergj Luca: Nuk më trembin protestat, por ëndrrat që nuk realizohen

20:15 Sociale 8 komente

VIDEO/ Protesta për Zvërnecin në Gjirokastër, pjesëmarrje minimale pavarësisht thirrjeve

19:32 Sociale 6 komente

Velipoja, sezon me fluks pushuesish/ Vizitorët vlerësojnë pastërtinë, organizimin dhe përmirësimin e kushteve

17:40 Sociale 2 komente

VIDEO/ Për gratë dhe vajzat “loja” është e manipuluar që në fillim - “Anulim Loje”, instalacioni që e kthen pabarazinë gjinore në përvojë

17:00 Sociale 9 komente

Protesta për Zvërnecin vijon në Britaninë e Madhe, shqiptarët mblidhen për të dytën ditë para ambasadës në Londër

15:10 Sociale 17 komente

ARRSH hap procedurën për 6 mbikalime këmbësorësh në autostradën Tiranë–Durrës

14:40 Sociale 1 koment

38 protokolle kombëtare për trajtimin e kancerit, Sala: Pacientët të marrin të njëjtin standard në çdo spital

14:30 Sociale 4 komente

Narrativa të fabrikuara: Si u deformuan protestat për Zvërnecin

13:40 Sociale 9 komente

Protesta për Zvërnecin zhvendoset edhe në Bruksel, shqiptarët mblidhen pranë institucioneve të BE-së

13:30 Sociale 27 komente

Propaganda anti-Izrael kap protestat shqiptare? Videoja pretendon se “u përzunë kolonët nga Sazani”

20:55 Sociale 7 komente