Berisha kopjon fjalimin e Ramiz Alisë për tokën e bujqësinë

Nga Gjergj Erebara*

Politikanët përsërisin shpesh të njëjtën gjë, veçanërisht për faktin se këshilltarët që përgatisin fjalimet janë të njëjtët. Kështu ndodhi kur Kryeministri Sali Berisha mbajti një fjalim për sektorin e energjisë kur erdhi në pushtet dhe “Top Channel” zbuloi se të njëjtin fjalim e kishte mbajtur edhe paraardhësi i tij, Fatos Nano. Shkaku qe i thjeshtë: i njëjti zyrtar që kishte përgatitur fjalimin e Nanos, kishte përgatitur edhe fjalimin e Berishës.

Ka gjithashtu një legjendë që thotë se një këshilltar në Ministrinë e Ekonomisë gjatë kohës së qeverive socialiste, arriti t’i shesë pesë a gjashtë ministrave të ndryshëm të njëjtin fjalim.

Dy ditë më parë, Kryeministri Berisha mbajti një fjalim mbi bujqësinë, i cili në shqetësimet e ngritura, ngjan pikë për pikë me një fjalim të Ramiz Alisë.

“Vendi ynë është nevojtar për tokë, prandaj të luftojmë për ta shtuar atë”, – deklaroi Alia më 5 mars 1988, ndërsa vizitonte një kooperativë bujqësore në Lushnjë.

“Ministria e Bujqësisë duhet të mbajë parasysh çdo minutë, çdo orë e çdo ditë, se jemi vendi me sipërfaqen e tokës bujqësore më të paktë për frymë në Europë, gjithsej 1800 metër katror për frymë”, deklaroi Berisha në mbledhjen e qeverisë ndërsa media e interpretoi fjalën e tij si një rikthim te fushata e viteve ’70 “t’u ngjitemi maleve dhe kodrave dhe t’i bëjmë ato pjellore si edhe fushat.”

Jo vetëm nga shqetësimi i ngritur, por edhe nga formulimi, duket se Kryeministri i sotëm ka huazuar fjalimin e Alisë. Nuk është e sigurt nëse Berisha e ka gjetur fjalimin e Alisë nëpër librat e historisë, apo e ka marrë nga këshilltari i përbashkët. Dihet se këshilltari i sotëm i Kryeministrit për bujqësinë dhe mjedisin, Lufter Xhuveli, ka qenë gjithashtu zyrtar i bujqësisë në kohën e komunizmit.

Mundet që Berisha të ketë thjesht të njëjtin shqetësim, dhe përputhja mes dy fjalimeve të jetë një koincidencë, por kjo mundësi është e vogël, për shkak se toka e pakët është një shqetësim që i përkiste ekonomisë shqiptare të kohës së komunizmit, ndërsa sot, kur e gjithë bota ushqehet me drithëra të importuara nga Rusia, Kanadaja apo Australia, sasia e tokës për frymë nuk përbën kurrfarë shqetësimi.

Duket se Berisha bën një gabim që Alia nuk e bën: Kryeministri i sotëm del në konkluzionin që Shqipëria është vendi me tokën më të paktë bujqësore për frymë në Europë, gjë që është e pavërtetë, pasi Italia e Gjermania kanë edhe më pak tokë për frymë sesa Shqipëria.

Edhe renditja e suksesit në bujqësi me shifra margjinale që nuk shprehin ndonjë realitet, është shumë i ngjashëm mes Alisë dhe Berishës.

“Po bëhen disa vjet që ekonomia jonë po përparon me rritje frontale. Që nga fillimi i viteve ’80 deri më sot, prodhimin bujqësor e blegtoral ju e keni shtuar gati 50 për qind, me një ritëm katër herë më të shpejtë se ai i shtimit të popullsisë”, deklaronte Alia në fshatin Sevasteri të Vlorës. Shifrat ishin të gënjeshtërta. Që nga viti 1980, prodhimi bujqësor për frymë ishte në pakësim. Popullata po rritej më shpejt sesa prodhimi bujqësor.

“Lajmi shumë i mirë ishte lajmi që dha dje Ministria e Bujqësisë, sipas së statistikave të saj, ka një rritje prej 31 për qind të eksporteve bujqësore në gjashtëmujorin që kaloi, krahasuar me gjashtëmujorin e një viti më parë”, deklaroi Kryeministri Berisha të mërkurën e shkuar. Sipas Institutit të Statistikave, Shqipëria eksportoi 4.96 miliardë lekë mallra të grupit “Ushqim, pije dhe duhan” gjatë gjashtëmujorit të parë të këtij viti, me rritje 18.1 për qind në krahasim me gjashtëmujorin e parë të vitit 2010, kur u eksportuan 4.2 miliardë lekë. Eksportet e ushqimeve përbëjnë 5 për qind të totalit të eksporteve të bujqësisë dhe përbën 0.371 për qind të Prodhimit të Brendshëm Bruto të vendit.

Shqetësimi për tokën

Shqipëria gjatë regjimit komunist jetonte me besimin se është e mundur që popullata të rritet shpejt, ndërsa prodhimi i ushqimeve të rritet edhe më shpejt. Ky besim rridhte nga fakti që Karl Marksi kishte folur me përbuzje për Robert Malthus, një demograf anglez i shekullit të tetëmbëdhjetë, i cili besonte se popullata rritej më shpejt se ushqimet dhe se kjo gjë shpërthente gjithmonë me krizë në fund.

Në vitin 1975, në Shqipëri u hap për kultivim këneta e fundit e disponueshme dhe pas kësaj, qeveria iu rikthye tokave të pafrytshme që më herët përdoreshin si kullota. Në vitin 1985, qeveria e kohës u bind se tokat e hapura në zonat kodrinore nuk jepnin frute dhe rrjedhimisht hoqi dorë nga hapja e tokave të reja. Vetëm në këtë kohë, qeveria u ndërgjegjësua për herë të parë që toka qe e fundme, por nuk hoqi dorë nga politika e nxitjes së riprodhimit të popullatës.

Sot shumë gjëra kanë ndryshuar. Shqiptarët kanë emigruar në masë, popullata po ulet, vendi po urbanizohet dhe sasia e tokës bujqësore për frymë po rritet.

Dy fjalimet e ballafaquara me njëri-tjetrin, tregojnë se njëzet vjet postkomunizëm dhe ekonomi tregu nuk i kanë mësuar gjë udhëheqësisë së vendit.

*SHQIP

Vritet komandanti i rebelëve në Libi, mendohej se bënte lojë të dyfishtë

11:23 Politika

Greva e minatorëve zgjerohet, gati të hyjnë gratë e tyre dhe 100 minatorë të tjerë

10:55 Politika

Drejtuesit socialistë të minibashkive bojkotojnë takimin me Bashën. Qytetarët zhgënjehen, nuk e takojnë dot kryebashkiakun

10:52 Politika

Gjykata e Lartë: Nuk ka prova të sakta që gardistët qëlluan ndaj viktimave më 21 janar

10:46 Politika

OKB injoron kërkesën e Serbisë

10:08 Politika

Deputeti demokrat: Kjo kryesi nuk është më e moralshmja

10:05 Politika

Droja e Presidentit përballë Kryeministrit

21:58 Politika

Një libër kundër prishjes së piramidës. I vetmi shkrim pro, ai i Fevziut

21:04 Politika

Tifozat Kuq e Zi, homazhe në Tiranë për policin e vrarë në Kosovë

20:51 Politika

Greqia: Të shqetësuar për rritjen e nacionalizmit në Shqipëri

19:10 Politika