Meta në “Top Story”: Të gjitha zgjedhjet e pjesshme pas 23 qershorit kanë dalë mbi 70 përqind

Kryetari i Lëvizjes Socialiste për Integrim, Ilir Meta, flet për Sokol Ballën në Top Story

Z. Meta, çfarë keni arritur ju si mazhorancë deri më tani nga ato që keni premtuar para 23 qershorit?

Besoj se ekziston një frymë mjaft realiste e përballimit të sfidave më të mëdha që ka vendi, ekziston një përgjegjshmëri mjaft më e lartë e kuptimit të 2 prioriteteve më të mëdha, pra të përballimit të situatës kritike ekonomike dhe së dyti për forcimin e sundimit të ligjit në vend. Dhe besoj se në këto pak javë të funksionimit të parlamentit dhe të qeverisë së re janë dhënë mesazhe mjaft premtuese dhe energjike në këto dy drejtime. Së pari kemi një angazhim tepër serioz të qeverisë së re dhe të mazhorancës së re për të stopuar degradimin e standardeve të ekonomisë sonë duke i parë të vërtetat në sy dhe duke i dhënë zgjidhje, të cilat padyshim që kanë një kosto sot por që sjellin një stabilizim jo vetëm për ekonominë tonë por edhe garantojnë një rritje afatmesme dhe afatgjatë më pas. Angazhimi kryesor është pikërisht ai që tashmë është bërë mjaft publik për të zgjidhur çështjen e detyrimeve të papaguara të shtetit ndaj biznesit dhe ndaj sipërmarrjes, që po lëngon për shkak të kësaj dhe që ka sjellë një situatë serioze për mbijetesën e shumë sipërmarrjeve dhe shumë bizneseve në drejtim të ruajtjes së vendeve të punës dhe njëkohësisht edhe në drejtim të rritjes së nivelit të kredive të këqija në sistemin bankar dhe shumë elementë të tjerë. Me këtë iniciativë jam i bindur se do të marrim një ripërtëritje e cila do të synojë stabilizimin e situatës makro-ekonomike në vend, gjallërimin e biznesit, injektimin e impulsive të reja për zhvillimin e ekonomik në drejtim të investimeve, të rritjes të konsumit e kështu me radhë. Pra një klimë shumë më miqësore ndaj biznesit dhe sipërmarrjes. Ndërkohë kemi aksione të vendosura për forcimin e ligjit, të cilat mund edhe të interpretohen sikur janë kundër sipërmarrjes por që në fakt synojnë të çrrënjosin evazionin fiskal i cili i merr në mënyrë të padrejtë shoqërisë, shtetit dhe qytetarëve shumë të jashtëzakonshme të cilat janë devijuar në përfitime për persona apo për grupe të caktuara. Mjafton këtu të përmend disa aksione të cilat janë bërë në këtë drejtim si në raport me kazinotë apo lojërat e fatit, kapja në flagrancë të veprimeve manipuluese për rimbursimin e TVSH-së në mënyrë fiktive, të cilat rezultonin humbje shumë të mëdha për buxhetin e shtetit dhe që shtonin xhepin e zyrtarëve të lartë, kjo çështje tashmë është bërë mjaft prezentë, apo dhe përpjekjet për të vendosur kontrollin mbi territorin e vendit për ti dhënë fund paligjshmërisë përsa i takon ndërtimeve pa leje njëkohësisht dhe degradimit të mjedisit dhe të potencialeve tona për një zhvillim të qëndrueshëm dhe në funksion të turizmit. Pra, besoj se në të dyja këto drejtime kjo është një qeveri e cila ka nisur me mjaft seriozitet, me mjaft përkushtim, me mjaft energji por të mendoj dhe me një vizion të qartë sepse këto janë dy kolonat kryesore ku do të mbështetet e ardhmja e sigurt e gjithë qytetarëve shqiptarë. Kjo për arsye se qeveria e mëparshme, ose kryeministri i mëparshëm, paraqiste një panoramë shumë më pozitive të situatës ekonomike në vend ndërkohë që realiteti nuk më mbetet thjesht mua që ta gjykoj por i mbetet dhe qytetarëve shqiptarë. Unë mendoj që gjykimin e bënë edhe me votë në 23 qershor. Edhe bashkëpunimi mjaft serioz i qeverisë së re me Fondin Monetar Ndërkombëtar dhe me Bankën Botërore, si partnerë tepër të rëndësishëm në vendin tonë që në momentet e para të hapjes së pluralizmit politik për realizimin e reformave të tregut të lirë është mjaft i rëndësishëm dhe është një bashkëpunim që mund tju them që unë ja kam kërkuar kryeministrit të mëparshëm kur ne kemi qenë në koalicion prej disa vitesh. Madje mund tu them se  ky ka qenë dhe qëndrimi i guvernatorit i cili vazhdon të jetë i njëjti, z. Fullani, apo edhe i ish  Ministrit të Financave duke vlerësuar me realizëm që në atë kohë të gjitha simptomat përkeqësuese të ekonomisë sonë edhe për arsye të krizës evropiane dhe globale. Pra, unë mendoj që kjo qeveri është përqendruar qartë tek ekonomia dhe tek forcimi i ligjit.

Z. Meta mendoni se në këto dy muaj keni humbur apo keni fituar në opinioni publik?

Absolutisht rezultati do të jetë më i thellë se më 23 qershor për dy arsye. Ju e nisët këtë emision me një tension të krijuar për shkak të emisionin “Fiks Fare” që kishte lidhje me zgjedhjet në Korçë. Kjo është një çështje që po merret prokuroria dhe unë përfitoj nga rasti të shpreh qëndrimin tim që prokuroria duhet mbështetur nga të gjithë, të bëj punën e saj dhe ta zbardhë deri në fund këtë çështje. Por, nuk janë bërë zgjedhje të pjesshme vetëm në Korçë, janë bërë dhe në Karbunarë, dhe në komunën më të madhe të Shkodrës, në Rrethina madje dhe në kohën kur ishte qeveria e mëparshme në pushtet, nuk kishte ardhur qeveria e re në mos gaboj apo u bën dhe në Komunën e Dardhasit në Pogradec, në Qarkun e Korçës dhe rezultatet ishin të këtij niveli, 75-80%.

Nuk mendoni se ajo që ne pamë për zgjedhjet në Korçë e zbehu atë rezultat të thellë që u arrit atje?

Nuk dua atë hyj dhe të bëj gjykime për emisionin fiks fare. E rëndësishme është që për Partinë Demokratike “çakalli” u kthye në punë. Unë besoj që media ka të drejtën e saj të bëjë investigime, t’i paraqesë ato, por jam i bindur që drejtësia duhet të thotë fjalën e saj. Ky ka qenë edhe qëndrimi i Kryeministrit dhe kryetarit të Partisë Socialiste dhe mendoj që të gjithë ne bashkohemi me këtë qëndrim. Tani opozita ka disa arsye të cilat kanë të bëjnë me faktin se ajo ende është në një pozicion tranzicioni, pra nga kalimi në qeveri, në kalimin vërtetë në opozitë. Nuk dëshiron që ta pranojë këtë  rezultat, ashtu sikurse nuk dëshiron të pranojë rezultatin e 23 qershorit, edhe pse të gjithë e dimë se ishte një rezultat ku qeveria dhe administrata u përdor në mënyrë fare flagrante, në funksion të Partisë Demokratike apo një administrim zgjedhjesh ku Partia Demokratike kontrollonte totalisht KQZ-në, katër me zero. Megjithatë ju e dini se cili ishte ky rezultat, ashtu sikurse mund t’ju them se në Korçë diferenca ka qenë e thellë edhe në vitin 2011, në favor të Partisë Socialiste dhe LSI-ja me PD-në këto zgjedhje.

Le të rikthemi tek zgjedhjet në Korçë dhe tek pamjet që na solli emisioni Fiks Fare? Si mendoni ju, ishte apo jo blerje e votës?

Nuk mundem që ta gjykoj, sepse të jem i sinqertë me ju, nuk i kam parë pamjet e emisionit. Kam parë gazetat, ka parë lajmet, dhe nuk kam pasur mundësi që të shikoj pamjet filmike. Dhe nuk mund të gjykoj për këtë çështje, por gjithsesi unë kam një qëndrim shumë të qartë : Prokuroria ka gjithë mbështetjen ta zbardhi këtë çështje, dhe në rast se kemi të bëjmë me blerje vote, të vërë para përgjegjësisë ligjore të gjithë personat që mund ta kenë realizuar këtë gjë. Por nuk mund të paragjykoj, sepse ju e dini që për zgjedhjet e 23 qershorit ka pasur angazhim të madh për të transportuar, ndihmuar anëtarë apo simpatizantë nga forca të shumta nga qielli, deti apo toka. Por mua nuk më takon fare të hyj në këtë çështje. Qëndrimi im mbetet ky, dhe besoj se ky është edhe qëndrimi i z. Rama, që prokuroria ta zbardhi këtë çështje dhe të marrë vendimet e veta të pavarura.

A keni folur me z. Rama për këtë çështje?

Jo, nuk kam pasur mundësi që të flas për këtë çështje, për arsye sepse ai ka qenë jashtë vendit, unë kam pasur angazhime të tjera, por besoj që ky që dhashë pak më lart, është një qëndrim shumë parimor.

Përse ishte i nevojshëm ky lloj sforcimi?

Ju po pyesni një person i cili as nuk ka vajtur në Korçë për të bërër fushatë. Natyrisht që kanë qenë përfaqësues të LSI-së. Megjithatë edhe një herë se çfarë ishte kjo le t’ia lëmë fjalën Prokurorisë.

Z. Meta, nuk do të ishte më e ndershme nga mazhoranca që përballë kësaj situate, përballë një situate të thellë në Korçë dhe pas denoncimit të ‘Fiks Fare’, që ta merrnit ju iniciativën të parët dhe të anulonit zgjedhjet në Korçë dhe t’i ribënit ato?

Nuk mund ta bëjë mazhoranca sepse jemi në kushtet e shtetit të së drejtës, ku ka rol KQZ-ja, ka rol Kolegji Zgjedhor. Partia Demokratike në bazë të provave që ka ajo apo edhe provave të dokumentuara nga emisioni në fjalë ka të drejtë t’i paraqesë ato.

Po ju vetë a do ishit dakord për një gjë të tillë? A do të ishte ndoshta një akt edhe moral i mazhorancës së re, që sillet ndryshe me ligjin, me opinionin publik, me median dhe me të vërtetën  dhe të thoshte që  në rast se duan t’i përsërisin zgjedhjet, ndjekim rrugët ligjore por dhe ne nuk jemi kundër?

Për momentin në të cilin ne flasim besoj se kjo do ishte e parakohshme, por në rast se organet e drejtësisë provojnë pikërisht këtë pretendim, që ngre edhe opozita, kjo do të ishte një çështje tjetër.

Z. Meta një ndër kushtet e përmendura nga rekomandimet e Komisionit në tetor për marrjen e statusit ishin zgjedhjet e lira, zgjedhjet më të mira dhe më të ndershme që ishin mbajtur ndonjëherë në Shqipëri. A mendoni se kjo që ndodhi në Korçë, mënyra se si e përdori opozita mund të sjellë shqetësime tek partnerët tanë ndërkombëtare dhe mund të mos sjellë marrjen e statusit në dhjetor?

Nuk e besoj sepse të gjithë do të kenë mundësi të monitorojnë këtë proces, ku është angazhuar edhe Prokuroria. Së dyti, e gjithë bota ishte e shqetësuar për zgjedhjet e 23 qershorit, ishte e shqetësuar për mënyrën se si në mënyrë antikushtetuese dhe të paligjshme u hoq një anëtar i KQZ-së që të sigurohej një shumicë imponuese në Komisionin Qendror të Zgjedhjeve, sigurisht jo për të garantuar transparencën e procesit, apo shqetësimin për një angazhim ekspresiv të shumë segmenteve të shtetit, të cilat normalisht janë të depolitizuara, që nga Policia, që nga institucione të tjera në fushatën elektorale, nga presionet e jashtëzakonshme që iu bënë administratës publike për të marrë pjesë në zgjedhje dhe njëkohësisht për të votuar në favor të forcave që ishin në qeveri e kështu me radhë. Dhe mendoj se qytetarët shqiptarë e dhanë verdiktin e tyre në mënyrë mjaft qytetare, mjaft të kulturuar, pavarësisht nga trysnia, pavarësisht nga presioni, ishte një diferencë tepër bindëse sikurse ne e kishim paralajmëruar në këtë emision vetëm pak ditë para zgjedhjeve. Shqipëria e kaloi testin. Në rast se qeveria bën presion mbi Prokurorinë apo mbi Gjykatat për të bllokuar hetimin dhe verifikimin e së vërtetës sigurisht ky është një problem serioz. Por në rast se këto gjëra funksionojnë, në rast se provohet se vërtet ka diçka të tillë serioze, siç pretendon opozita dhe njëkohësisht tregohet se sistemi funksionon, këtu nuk ka pse të ketë shqetësime të tilla sepse ngjarje të tilla ndodhin edhe në vende të tjera, edhe më të zhvilluara se Shqipëria. Rëndësi ka të funksionojë sistemi.

Z. Meta ju keni krijuar një klimë tjetër në Kuvendin e Shqipërisë. Gjatë këtyre javëve që ju keni drejtuar Parlamentin nuk i keni ndërprerë asnjëherë punimet e seancës për shkak të sherreve apo incidenteve që kanë qenë një rutinë në seancat e Kuvendit shqiptar. Opozita ka paralajmëruar një protestë simbolike ditën e hënë përpara Kryeministrisë lidhur me ngjarjet e Korçës. A po acarohet situata politike për të cilën ju jeni munduar personalisht këto muaj që ta qetësoni?

Këtë këngën e blerjes së votës ata e kanë kënduar edhe pas 23 qershorit kur bënë zgjedhjet brenda partisë së tyre. Ju e dini që ata që humbën akuzuan palën tjetër, pala tjetër palën tjetër e kështu me radhë.

Pala humbëse ju akuzoi pikërisht juve….

Nuk asnjë problem. Partia Demokratike mendoj që duhet të shikojë drejt së ardhmes. Nuk duhet ta përjetojë me shumë dëshpërim kalimin në opozitë sepse në fund të fundit ishte 8 vite në qeverisjen e vendit. Dhe mund të mos kishte qenë në këto 8 vite në rast se e majta do të kishte pasur zhvillime më të përgjegjshme dhe më të natyrshme. Këtë nuk duhet ta harrojnë demokratët. Kanë bërë punë të mira pa asnjë diskutim. Fajin kryesor nuk duhet ta gjejë as tek PS-ja, as tek LSI-ja dhe tek askush tjetër. Fajin kryesor duhet ta gjejnë tek arroganca e tyre. Në fund të seancës së Kuvendit foli deputeti Erion Braçe dhe shumica e fjalës së tij ishte leximi i një editoriali të z. Fundo, i cili ka qenë zëdhënës i z. Bode, ku bënte një analizë të kristaltë për zgjedhjet e Korçës, se ai është edhe korçar vetë. Analiza e tij ishte krejt e kundërt me atë që z. Bode  ishte i detyruar të thoshte në media, natyrisht si përfaqësues politik i Partisë Demokratike. Tregonte realisht shkaqet reale se pse është kjo situatë në Partinë Demokratike dhe pse është ky rezultat. Nuk është mirë për një parti e cila në 23 vite të ekzistencës së saj ka vlera të rëndësishme dhe historike, që nga pluralizmi, që nga shumë ngjarje që kanë të bëjnë që edhe me anëtarësimin e Shqipërisë në NATO. Edhe me hapat e caktuar drejt Bashkimit Evropian. Edhe në raport-progresin e fundit të Komisionit Evropian duhet ta gjejë veten pozitivisht për shumë elementë pozitivë. Nuk ka arsye që të reagojë si një parti pa përvojë dhe sikur kalimi në opozitë është një fatëkeqësi dhe padrejtësi, të cilin “fajin e kanë shqiptarët të cilët nuk kuptuan reformat dhe nuk kuptuan situatën shumë të mirë ekonomike, madje edhe të kohëve të fundit”. Partia Demokratike do të bëjë miting. Është e drejtë e tyre që të bëjnë miting. Madje do ti referofsha edhe analistit Artan Hoxha sipas të cilit kjo është një parti që ka lindur në miting dhe natyrisht që bërja e mitingjeve nga ana e opozitës është edhe një mënyrë për të fituar vëmendje, për protagonizëm, për të shprehur pikëpamjet e saj, sepse natyrisht nuk është i mjaftueshëm vetëm Parlamenti një herë në javë apo edhe dy-tre herë duke përfshirë komisionet gjatë një jave. Por e rëndësishme është që Partia Demokratike i qëndron angazhimit të saj për të kontribuar në marrjen e statusit të vendit kandidat. Ne e kemi futur sot (dje) edhe një mocion për debat të kërkuar nga  kryetari i grupit parlamentar të Partisë Demokratike. Edhe një propozim të tyre, një projektrezolutë për të mbështetur marrjen e statusit të vendit kandidat. Edhe manifestimet i shoh si një mënyrë, si një instrument për të shprehur pikëpamjet dhe mendimet e tyre. Ajo që mund të garantoj unë sot  është që Partia Demokratike i ka pasur, i ka dhe do t’i ketë të gjitha hapësirat edhe përtej rregullores, jo për meritën time, por për meritën e mazhorancës. Natyrisht që unë jam i detyruar si kryetar Kuvendi, që kur njëra palë kërkon në mënyrë strikte respektimin e rregullores, të respektojë rregullores. Por, falë një filozofie të përbashkët që kemi edhe me z. Rama, por edhe me z. Ruçi si kryetar i grupit të Partisë Socialiste, e kemi gjykuar të nevojshme që më mirë të akuzohemi për tolerancë sesa të akuzohemi për arrogancë.  Shpresoj që opozita dhe PD-ja të shfrytëzojnë këtë hapësirë në mënyrë konstruktive sepse edhe në zgjedhjet e 23 qershorit ku mendoj se shqiptarë dhanë një mesazh pro atyre politikave dhe propozimeve konstruktive.

Z. Meta, ju iu referuat me të drejtë për një klimë tjetër në Kuvend. Por pati disa shkëndija dhe u duk se opozita po i frynte një zjarri që nuk ekzistonte, sidomos pas ngjarjeve të Korçës duket se ka një rritje tensioni. Në këtë klimë të re mini-tensioni apo shkëndijash, nëse do ta ndanit përgjegjësinë, kush ka më shumë përgjegjësi opozita apo mazhoranca?

Nuk dua të vihem në një pozitë që të bëjë këtë gjykim apo vlerësim, sepse unë besoj që mazhoranca ka bërë dhe po bën çdo gjë për të mbajtur angazhimet e saj për të cilat i duhet të marrë dhe vendime, por absolutisht, gjithçka është bërë në respekt të opozitës, sepse flitet shumë për shembull për çështjen e ndërhyrjes që iu bë ligjit për statusin e nëpunësit civil, që u miratua me konsensus më 30 maj. Por është po kaq e vërtetë për arsye që dihen, raport-progresi i Komisionit Evropian tregoi qartë që kjo ndërhyrje ishte e domosdoshme për të zhbllokuar situatën, e cila mund dhe do të bllokohej pas hyrjes në fuqi më 1 tetor të këtij ligji. Përpara se kjo iniciativë të kalojë në qeveri, kjo e fundit kërkoi takime dhe bisedime me përfaqësuesit e opozitës…

Po, por ama pasi e kishit bërë aktin normativ….

Nuk ishte bërë, nuk kishte kaluar akti normativ. Ka dokumente për këtë. Përpara se të miratohej akti normativ është kërkuar ky takim. Nuk ka ndodhur ndonjëherë në Shqipëri që qeveria përpara se të ndërmarrë një iniciativë të tillë të kërkojë të bisedojë me opozitën. Ndoshta po të ishte bërë ky takim ndoshta mund të mos kishte kaluar akti mund të themi, por në fund të fundit një qeveri që e kërkonte këtë komunikim përpara një akti të tillë, kur këtë mund ta bëjë në çdo kohë tregon një përqasje tjetër, një sjellje tjetër dhe një respekt ndaj opozitës. Përveç edhe shumë rasteve të tjera kur ne kemi treguar vullnetin më të madh për të respektuar opozitën.

Marrim një rast tjetër, rastin e raporteve të përfaqësimit në parlament në drejtimin e komisioneve parlamentare apo në delegacionet e përhershme të Kuvendit të Shqipërisë në institucionet ndërkombëtare. Që nga delegacioni për Parlamentin Evropian, për Asamblenë Parlamentare të Këshillit të Evropës, të NATO-s, OSBE-së e kështu me radhë. Opozita, edhe pse rregullorja e Parlamentit thotë qartë se përfaqësimi bëhet në bazë të rezultatit të zgjedhjeve dhe ne e dimë që rezultati i zgjedhjeve të opozitës së sotme është shumë më i dobët se i opozitës së vitit 2009, pra të PS-së që kishte 66 mandate, përsëri ishte një vullnet i mirë i kësaj mazhorance që PD-ja të kishte të paktën përfaqësimin që kishte PS-ja në vitin 2009 dhe mund të them që në disa raste e ka edhe më të avancuar. Apo marrim një rast tjetër të një klime të re dhe pozitive. I krijua për herë të parë Aleanca e Grave Parlamentare, një gjë shumë pozitive pasi flasim për të rritur rolin e tyre në vendimmarrje për të rritur rolin e tyre në Parlament dhe shpeshherë kemi parë që ato e sulmojnë ndonjëherë njëra-tjetrën. Duket që ka një frymë më pozitive, edhe kryetare u zgjodh një përfaqësuese nga ana e opozitës me konsensus. Pra, ekziston një predispozicion mjaft pozitiv. Unë mund t’u them edhe një gjë tjetër. Në rast se nuk do të ketë kamera në Parlament nuk do të shihnit ju ashtu skenash me hedhje lekësh, etj., por do të shikoni një klimë tjetër. Por kur ka kamera në vend që të merren me problemin duan të japin mesazhe drejt militantëve për t’u thënë atyre qëndroni të fortë, sepse ne do t’u mbrojmë fort, etj.

Z. Meta, një nga miratimet e para të qeverisë së re ishte anulimi i ligjit për importet e mbetjeve urbane. Ju keni votuar pro tij në legjislaturën e kaluar. Tek cili prej dy veprimeve keni gabuar?

Duhet parë i gjithë konteksti që u hap përpara se të miratohej ky ligj por edhe tani me vendimin  ri. Pra, ne kemi qenë pjesë aktive e atij debati që në fillim. Madje edhe me ndërhyrjen e përfaqësuesve tanë, të z. Haxhinasto që në atë kohë ishte Zv. kryeministër, është kërkuar që të mos lejohej importimi i mbetjeve me origjinë të papërcaktuar. Ky miratim është shoqëruar me debate të mëdha të cilat më shumë se sa me standardet e ligjit kishin të bënin me standardet e agjencive ligjzbatuese, në mënyrë që ky ligj të mos keqpërdorej dhe të sillte probleme dhe mpakte negative për mjedisin dhe shëndetin e qytetarëve. Në atë kohë PS ka kundërshtuar hapur dhe e ka pasur si një ndër kryepremtimet elektorale bllokimin e importimit të mbetjeve. Pas zgjedhjeve të 23 qershorit ne kemi bërë një koalicion ku PS është forca kryesore e këtij koalicioni dhe si premtim kryesor i PS-së dhe për ne nuk ka qenë një pretim mbrojtja e këtij ligjit. Në këtë kuadër ne kemi shprehur mirëkuptimin tonë. Ne nuk kemi votuar asnjëherë për të bllokuar iniciativa të ndryshme. Natyrisht që kemi vijat e kuqe në çdo koalicion, kemi pasur edhe me PD-në, dhe natyrisht që nuk është përgjegjësia jonë për të bllokuar sa herë që ne kemi një mendim jo të njëjtë apo qoftë edhe të ndryshëm. Natyrisht që është përgjegjësia jonë për çështje që kanë të bëjnë me integrimin evropian, me të drejtat themelore të njeriut, me Kushtetutën, me përmbushjen e detyrimeve të vendit si vend i NATO-s apo edhe me disa premtime tona kryesore në fushatë elektorale që të mbajmë premtime të qartë kur është e nevojshme.

Z. Meta, seriozisht e keni me lajmin më të ri që mund të vijnë armët kimike të Sirisë në Shqipëri?

Ekziston një deklaratë e ministrit të Jashtëm që jemi kontaktuar nga SHBA-të, por nuk ka një vendim. Ne jemi vend anëtar i NATO-s. Është një vend i angazhuar për luftën kundër terrorizmit dhe ka dhënë një kontribut të spikatur në këtë drejtim, madje edhe përpara 11 shtatorit. Kjo është një nga arsyet pse jemi anëtar i NATO-s prej disa vitesh. Në jemi aktivë në të gjitha përpjekjet të cilat kanë të bëjnë me paqen, me demontimin, eliminim e armëve kimike e kështu me radhë. Unë nuk mund të flas këtu në emër të qeverisë dhe as të Ministrisë së Jashtme e cila është pika e parë e kontaktit në raportet midis dy vendeve dhe dy qeverive. Unë mund t’ju them se nuk ekziston një vendim i tillë. Është normale që SHBA-të dhe NATO sepse angazhimi kryesor ka qenë i kësaj aleance, edhe me këtë çështje janë të interesuar për ti dhënë një zgjidhje. Është normale që të kontaktojnë me të gjitha vendet anëtarë të aleancës që mund të kontribuojnë në këtë drejtim, por unë mund t’ju them me bindje të plotë që ky vendim do të jetë transparent, do të jetë në interes të vendit, dhe në fund fare fjalën e fundit do ta thotë Parlamenti. Kështu që mos të mjaftohemi me gjykime dhe paragjykime të nxituara.

A do t’i pyesni qytetarët për shkatërrimin e armeve kimike në Shqipëri?

Unë nuk jam ekspert as i armatimit, as i çarmatimit, dhe as i mjedisit. Ashtu sikurse ndaj të njëjtin mendim me ju, që nuk kam besim se ne i kemi këto kapacitete, sepse përderisa vende të tjera më të mëdha dhe më të zhvilluara nuk pranojnë se i kanë këto kapacitete, nuk mund të vazhdojmë më me teorinë që dy luanë ka bota. Absolutisht jo! Por, e kuptoj që kjo situatë është për shkak të lajmeve që dalin nëpër media, diku këtu e diku jashtë, do të vijojë të amplifikojë, por unë kam shumë besim dhe e theksoj çështjen e transparencës, sepse kjo është çështje që mbetet për tu verifikuar. Nuk ka asnjë arsye që ne të marrim vendime që cenojnë të ardhmen e qytetarëve tanë, gjeneratave të ardhme, absolutisht jo. Por nuk kemi pse të nxitojmë  me paragjykime dhe fajësime. Shqipëria është anëtare e NATO-s, ka detyrimet e saj, dhe do të marrë ato përgjegjësi që janë në gjendje të mbajnë supet e saj. Nuk mund të marr përgjegjësi të cilat nuk i mbajnë supet e saj.

A ka vetë LSI një qëndrim të vetin për këtë çështje sot që do ta negociojë më pas?

Mund t’ju them me bindje të plotë se nuk kam dhe nuk kam kërkuar ndonjë informacion edhe më shumë sesa keni ju sepse jam i bindur që qeveria në gjykimin e kësaj çështje do të thellohet me shumë përgjegjshmëri dhe nuk kemi pse të nxitojmë dhe të paragjykojmë një vendim i cili kurrsesi nuk mund të jetë një vendim i mbyllur, i cili kurrsesi nuk mund të jetë një vendim jashtë syve dhe jashtë gjykimit të qytetarëve tanë. Prandaj them me qetësi.

Z. Meta a jeni konsultuar ju si partnerë të qeverisjes në lidhje me aksionet e fundit nga ministria e Brendshme, dhe nga vetë ministri Tahiri, për shembjen e ndërtimeve pa leje dhe a i mbështesni ato?

Ne mbështesim forcimin e ligjit përmes respektimit të ligjit dhe të shtetit të së drejtës. Paligjshmëria ishte ulur këmbëkryq, situata e rendit ishte degraduar në një mënyrë mjaft kritike sidomos vitin e fundit, përpara zgjedhjeve, akoma më keq pas tyre. Natyrisht që ka një motivim të policisë së shtetit, ka një angazhim mjaft evident. Nuk ka qenë më parë. Ka disa aksione të cilat janë zhvilluar dhe kanë fituar simpatinë e opinionit të gjerë. Ka dhe shqetësime për respektimin e ligjit apo shfaqjen e arbitraritetit këtu apo aty por këto nuk përbëjnë thelbin e kësaj që po ndodh. Ajo që po ndodh është një rizgjim jo vetëm i policisë por dhe i gjithë agjencive ligj zbatuese për të imponuar respektimin e ligjit, për të luftuar evazionin, për të luftuar korrupsionin, për të luftuar krimin dhe në këtë drejtim absolutisht që ky angazhim ka mbështetjen tonë të plotë.

Z. Meta sigurisht 1 milion vota që morët si koalicion ishin dhe kundër deformimit kaotik urban të dekadës së fundit, ku përgjegjësi madhore ka dhe qeveria që iku.  Por unë po them se ju u votuat dhe për një arsye tjetër, sepse shqiptarët u lodhën me qeverinë që thoshte ligji jam unë. Ju mendoni ndryshe?

Unë mendoj se ligji është ligji dhe ligjit do ti nënshtrohen të gjithë, si qeveria, si parlamenti që është i pari që duhet ti respektojë ligjet që nxjerr vet, si presidenti edhe si qytetari i thjeshtë i Republikës në skajin tonë më të largët.

Kam këtu vendimin nr. 932, të 30 shtatorit të qeverisë së koalicionit tuaj për Unifikimin e Kompetencave të Inspektoratit Ndërtimor Urbanistik Kombëtar me zonat me rëndësi kombëtare territoriale. Nëse ju thoni se jeni për respektimin e ligjit, përse pesë ministrat e LSI-së kanë votuar pro këtij vendimi, i cili në fakt shkel ligjin? 

Së pari, duhet lexuar i gjithë vendimi nga fillimi deri në fund. Duhet pasur në konsideratë i gjithë konteksti i këtij vendimi, por absolutisht që ky nuk është një vendim, i cili zëvendëson Gjykatat apo Prokurorinë me INUK. Ky është një vendim i cili mund të shikohet dhe mund të rivlerësohet në rast se vërtet sfidon Gjykatat apo Prokurorinë. Por, nuk besoj se është ky qëllimi i këtij vendimi.

Në një kaos urban duhet zgjidhje. Por ju e dini shumë mirë që nëse ka një gjë që na e kërkojnë ndërkombëtarët dhe që ne duam është që të respektohet ligji. A nuk mendoni se vullneti për të përmirësuar gjërat duhet të shoqërohet me respektin e ligjit?

Absolutisht po. E nënvizoj, për ne forcimi i ligjit duhet të realizohet përmes respektimit të ligjit. Nuk mund të gjykoj dot një rast apo një rast tjetër, sepse ndonjëherë biem edhe viktima të informacioneve të ndryshme që dalin nëpër media sipas interesave të qytetarëve të ndryshëm. Nuk mund të marr përsipër të them se nuk ka pasur asnjë arbitraritet, ashtu sikurse mund t’ju them se jam kundër çdo lloj arbitrariteti. Dhe e theksoj rëndësinë që çdo punonjës i Policisë, i Tatimeve, i INUK dhe i çdo institucioni duhet të jetë shumë përgjegjshëm në respektimin e ligjit sepse prodhon pasoja në kushtet e mosrespektimit për shtetin, gjyqe, vendime gjykatash, të cilat duhen zbatuar sepse është edhe një kërkesë e Bashkimit Evropian.  Paligjshmëria është bërë një fenomen në këtë drejtim mbarëkombëtar dhe kjo goditje është e domosdoshme, ashtu sikurse theksoj rëndësinë e profesionalizimit  në zbatimin e ligjit dhe evitimin e çdo lloj arbitrariteti. Ju përmendët një rast. Gjykata ka marrë një vendim tjetër, atëherë natyrisht që ky vendim i gjykatës i jep një drejtim të caktuar çështjes në fjalë. Pra, sistemi funksionon.

Sa i përket bashkëqeverisjes, ashtu siç keni premtuar edhe gjatë fushatës elektorale, a do të luajë LSI-a një rol balancues dhe ekuilibrues deri diku për tërhequr edhe frenat nëse kali ecën me shumë shpejtësi ?

“Të ecim më shpejt” ka qenë slogani ynë. Por natyrisht, mbi shinat e ligjit. Unë besoj se kjo qeveri ka treguar mjaft energji domethënëse në këto javë. Ka treguar një vizion. Vizioni është, sepse nga pikëpamja strategjike është shumë e qartë për të përballuar problemet e ekonomisë, për të frenuar rënien e saj, për ta stabilizuar dhe për të marrë masat për rritjen ekonomike  dhe gjallërimin e klimës së biznesit dhe forcimit të ligjit në të gjitha aspektet. Kështu që besoj se në këto dy shina, kjo qeveri dhe kjo mazhorancë ecën e sigurt dhe natyrisht rast pas rasti do të ketë edhe gabime. Por, unë besoj se ekziston e gjithë energjia pozitive për të reflektuar, për të reaguar me ndjeshmëri edhe ndaj vërejtjeve apo ndaj të kritikave të medias apo edhe të opozitës sepse kokëfortësia asnjëherë nuk është e dobishme dhe unë besoj se kjo mazhorancë e re nga mazhoranca e mëparshme ndryshon edhe nga aftësia për t’u vetëkorrigjuar gjatë ecjes më shpejt.

Z. Meta a keni një koment për marrje në ndjekje penale ndaj Shpëtim Gjikës?

Nuk kam asnjë koment. Mendoj se të dyshohet është diçka normale dhe natyrisht ky është një  proces ku drejtësia do të thotë fjalën e saj pa ndërhyrje prej politikës.

Si duhet ta shohë opinioni publik këtë fakt që mazhoranca e re po shikon të godasë brenda saj, aty ku mendon se ka shkelje, sesa tek kundërshtari politik?

Nuk besoj se ekziston një taktikë e tillë. Për rastet konkrete unë nuk mund të shprehem. Duhet të shprehet titullari i institucionit përkatës. Meqenëse ju përmendët çështjen e ndërtimeve pa leje apo aksionet e fundit të policisë, unë mund t’ju them se nuk  ka pasur dhe nuk ka qëllime selektive. Madje mund t’ju them që edhe kolegë nga e majta, madje më shumë se nga e djathta kanë shprehur shqetësime për raste të caktuara natyrisht si rezultat i reagimit qytetar apo të afërmve që mund të jenë prekur nga këto aksione. Pra nuk është se ka pasur dhe ka një politikë subjektive mendoj unë, dhe s’do të ndalem tek një rast i veçantë që thjesht na largon dhe mund të na largojë nga thelbi i këtyre aksioneve që synojnë forcimin e ligjit.

“Fundi i marrëzisë” u mirëprit nga opinioni publik, por po të dalësh sot në rrugët e Tiranës mbi 80 % e salloneve të lojërave elektronike janë rihapur. Para dy javësh një pronar kazinosh u ekzekutua në mes të kryeqytetit në kulmin e aksionit, ndërsa jo më larg se dy ditë më parë një mësuese është vrarë, mbytur nga burri i saj i cili humbte paratë në një kazino elektronike. Si ju duket ky bilanc dhe vërtetë i ka ardhur fundi marrëzisë?

Është një sfidë e madhe dhe është një problem i madh social në radhë të parë, por është edhe një problem financiar, sepse evazioni ka qenë i përmasave shumë të mëdha. Duke qenë një problem social duhet të kemi parasysh që edhe Kryetari i Bashkisë së Tiranës, z. Basha bëri një propozim, madje u mor edhe një vendim për spostimin e tyre në periferi të Tiranës, për disiplinimin, etj., sepse ato kanë mbirë kudo si kërpudha. Ndërkohë që, është një fakt i vërtetë që përmasa e informalitetit dhe evazionit në këtë fushë ka qenë e jashtëzakonshme. Kështu që aksioni mendoj unë ka qenë një aksion mjaft i domosdoshëm për t’i dhënë një goditje përfundimtare evazionit në këtë fushë, për të formalizuar këto lloj aktivitetesh ku qarkullojnë fusha të mëdha dhe përsa i takon perspektivës të kësaj fushe natyrisht qeveria do të ketë një qëndrim të qartë, duke qenë sepse janë bërë investime të mëdha dhe natyrisht që duhet të ketë një politikë të qartë se çdo të bëhet me këto lloj aktivitetesh, pra për mbylljen e tyre, për disiplinimin e tyre, etj. Por të gjithë besoj se jemi dakord pavarësisht nga kjo politikë që duhet të ndjekë qeveria dhe që duhet ta bëjë të qartë dhe do ta bëjë të qartë sa më parë, që në çdo rast formalizmi i këtyre aktiviteteve është një domosdoshmëri dhe është diçka që nuk mund të kundërshtohet.

Keni 85 mandate në Kuvend dhe nja pesë të tjera që u sillen vërdallë. Pse nuk bëni një ligj për kazinotë, një ligj për ndërtimet, një tjetër për bastet apo për çfarë të doni ju, dhe pastaj ta zbatoni në mënyrë që edhe të mos akuzoheni ndoshta edhe pa të drejtë që po favorizoni dikë në kurriz të dikujt tjetër?

Kjo është një qeveri që ka vetëm pak javë në zyrë. Të bëhet një ligj duhet një kohë e caktuar, ka një procedurë të caktuar. Ndërhyrjet që janë bërë, janë bërë për të goditur informalitetin, i cili ka qenë i përmasave shumë të mëdha në këtë fushë dhe këtë nuk mund të besoj se mund ta kundërshtojë dikush dhe askush nuk mund të jetë kundër goditjes së informalitetit. Unë besoj që qeveria shumë shpejt do të japë një përgjigje të qartë me perspektivën e këtij sektori.

A do të ketë një ligj për këtë?

Sigurisht, derisa do të ketë një politikë do të ketë edhe një legjislacion përkatës. Ju po flisni me Kryetarin e Parlamentit, ligjet bëhen në qeveri pastaj vijnë në parlament, nuk shkojnë nga parlamenti në qeveri.

Z. Meta, si do t’i përgjigjeshit kritikës së kjo qeveri përtej vullnetit dhe entuziazmit po shfaq edhe disa shenja arrogance?

Duhet të matemi shumë për të ndarë vendosmërinë nga arroganca. Ajo që dikujt mund t’i duket si vendosmëri dikujt tjetër mund t’i duket si arrogancë. Megjithatë, unë e theksoj se kjo mazhorancë e re nga mazhoranca e mëparshme absolutisht që ka një avantazh që ka të bëjë pikërisht me aftësinë për të reflektuar dhe për t’u përmirësuar çdo ditë.

Basha: Nuk ka ekuivalencë në historinë e PD me atë që ndodhi në Korçë

22:21 Politika

Rama: Ne s’jemi zgjedhur që të kënaqim opozitën. Deklaratat e Erdogan u keqkuptuan

21:32 Politika

Berisha përshëndet heqjen e sekuestros për “pallatin e Bashës”: Fitoi ligji

21:27 Politika

VIDEO LAJM/ Olldashi e ka me të gjithë: A do merremi seriozisht me çështjen e blerjes së votës?

19:19 Politika

TemA TV/ PD proteston ditën kur Fyle viziton Tiranën/ Rama: Një ministër i PS u bë qesharak kur thoshte më vodhën votat (VIDEO)

18:06 Politika

TemA TV/ Gjykata Administrative heq sekuestron mbi “pallatin e Bashës” (VIDEO)

16:30 Politika

PD nis protestat. Paloka: Të hënën dalim para Kryeministrisë

12:43 Politika

Tjetër tragjedi në miniera, humbasin jetën edhe dy persona të tjerë në Librazhd

14:32 Politika

Nishani liron Gjunkshin, dekreton Jeronim Bazon në vend të tij

12:33 Politika

A s’është e neveritshme kjo opozitë? PD: Fajin për vdekjen e 5 të rinjve në minierë e ka Edi Rama

12:13 Politika