Vakanca në Gjykatën e Lartë/ Ruçi: Takimi me Nishanin nuk ishte produktiv. Reagojnë Paloka dhe Vasili

Kryetari i Grupit Parlamentar të Partisë Socialiste, Gramoz Ruçi, e cilësoi si joproduktiv takimin me Presidentin Bujar Nishani në lidhje me vendin vakant të krijuar në Gjykatën e Lartë, pas përfundimit të mandatit të një anëtari.

Ruçi çeli serinë e takimeve që Kreu i Shtetit ka nisur me kryetarët e Grupeve Parlamentare në kuadër të konsultimeve për plotësimin e vakancës së krijuar.

Në përfundim të takimit, Ruçi theksoi se fryma e diskutimit me Presidentin Nishani nuk ishte në përputhje me vendimin e Gjykatës Kushtetuese përsa i takon raporteve mes Kreut të Shtetit dhe Kuvendit në lidhje me emërimet.

“Gjykata Kushtetuese është shprehur për një frymë kooperimi mes dy institucioneve, gjë që nuk po ndodh”, theksoi Ruçi. Sipas tij, në takim nuk është diskutuar për emra konkretë dhe se kriteret që duhet të plotësojnë kandidatët përcaktohen në ligjin për Gjykatën e Lartë dhe nga Kushtetuta.

“Ky këshillim duhej të ishte zhvilluar qysh në momentin që u krijua vakanca dhe jo të pritej kaq gjatë, kur thuhet se njerëzit për një çështje në Gjykatën e Lartë presin 5 deri në 10 vjet. Atëherë pse duhet që për një kohë të gjatë në këtë Gjykatë të ketë 3 vende vakante? Mendoj se takime të tilla nuk janë produktive, megjithëse prezenca ime në këtë takim të thirrur nga Presidenti në emër të grupit parlamentar të PS-së tregon qartazi se ne jemi të preokupuar për të zgjidhur këtë çështje”, tha Ruçi.

Ndërkohë, Kryetari i Grupit Parlamentar të PD-së, Edi Paloka, e konsideroi takimin me Presidentin Bujar Nishani si normal dhe mëse të mjaftueshëm.

“Diskutuam mbi kriteret ligjore dhe më tej se ato ligjore që duhet të plotësojnë kandidatët. Presidenti ka një listë me emra dhe mes tyre do të përzgjedhë një”, theksoi Paloka.

I pyetur në lidhje me deklaratën e bërë nga kreu i deputetëve socialistë që e cilësoi takimin si jo produktiv dhe jo kooperues, Paloka tha se “nuk pres gjë tjetër nga Ruçi apo Edi Rama, pasi lufta e kësaj mazhorance me Presidentin tashmë është e hapur dhe është në vijim të luftës që ka nisur ndaj të gjitha institucioneve”.

“Nuk ka lidhje as me emrat as me kriteret, çdo emër që do të japë Presidenti mazhoranca do dalë kundër. Për ne takimi  është i mjaftueshëm dhe në kushtet e nevojshme, ndërsa mazhoranca ka kohë që ka nisur luftën me institucionet e pavarura, ku përfshihet edhe Institucioni i Presidentit të Republikës”, theksoi Paloka.  

Ndërkohë, kryetari i Grupit Parlamentar i LSI-së Petrit Vasili pas takimit me Presidentin Bujar Nishani theksoi se është e rëndësishme që mes institucioneve të ketë një kooperim dhe jo imponime, sikundër ka ndodhur edhe pak javë më parë kur Kuvendi rrëzoi dy kandidaturat e propozuara nga Kreu i Shtetit për anëtarë të Gjykatës së Lartë.

“Ishim në një takim që eci në frymën e respektimit institucional dhe kooperimit që institucionet duhet të kenë mes tyre. Ky kooperim kërkon jo një proces të njëanshëm, por kërkon që institucionet të veprojnë në mënyrë bashkëpunuese. Shumë e dobishme është të ndërtojmë një proces që hap rrugën e një kooperimi real dhe jo që institucionet ti imponohen njëra-tjetrës. Ndaj gjyqësorit ka një perceptim negativ i cili mund të minimizohet vetëm përmes një kooperimi mes institucioneve. Duhet ti largohemi formalizmave dhe imponimeve që institucionet tentojnë ti bëjnë njëra-tjetrës. Duhet të ketë kooperime dhe mendojmë se vakancat në Gjykatën e lartë janë 3 dhe duhet të plotësohen njëherazi”, theksoi Vasili në deklaratën e tij pas takimit me Kreun e Shtetit.

Deputeti i PDIU-së Tahir Muhedini, pas takimit me Presidentin Bujar Nishani në lidhje me vakancën e krijuar në Gjykatën e lartë, theksoi se emir që duhet të propozohet nga Kreu i Shtetit duhet të jetë i gjithëpranueshëm.

“E rëndësishme është të zbatohet ligjshmëria, ndërsa kandidatura e propozuar duhet të jetë e pranueshme nga të gjitha palët”, theksoi Muhedini.

Presidenti Nishani prezantoi listën e kandidatëve për vendin vakant në Gjykatën e Lartë  ku ndër emrat e propozuar, të cilët vijnë nga radhët e gjyqësorit, janë Alaudin Malaj, Astrit Kalaja, Entela Prifti, Fatos Qato, Luan Dervishi, Sokol Ngresi. Ndërsa kandidatët që vijnë nga radhët e juristëve: Adnor Shameti, Ermir Dobjani, Genti Shala, Gjet Kola, Ilir Panda, Luan Daci, Pranvera Strakosha, Prel Martini, Rexhep Bekteshi, Sokol Sadushi dhe Shpëtime Pitaku.

Situata në Ukrainë/ Blushi: Shqipëria të mbajë një qëndrim më serioz

11:37 Politika

Gazetari britanik: Erdha për luftë, gjeta femra police në bulevard

10:25 Politika

Ja shkresa e formuluar nga Basha më 2005-ën: Taksitë 8+1 të kthehen bosh

10:25 Politika

Berisha e Basha, së bashku në samitin e PPE, shmangin takimet me Fylen

10:18 Politika

Fyle: Duhet reformuar sistemi i drejtësisë dhe administrata publike

09:44 Politika

Ambasada e SHBA në Tiranë: Kujdes me makinat, inspektojini para se të hipni

09:05 Politika

Tmerr në qendër të Laçit, vriten dy vëllezër/ Autori: Unë jam Jezu Krishti (VIDEO)

12:00 Politika

Topalli sulmon Bashën: Nuk e përfaqëson PD-në. Mitingu i 20 shkurtit nuk ishte i PD

00:58 Politika

DEKLARATA: Udhëheqësit e G – 7 dënojnë pushtimin e Ukrahinës dhe ngrijnë marrëdheniet me Rusinë

00:27 Politika

Berisha: Qeveria kërkon të zgjidhë revoltën e shoferëve të furgonave me anti-mitingje

16:56 Politika