Te fundit
Përse Lulzim Basha pranon të bëhet kaq qesharak?
12 Gusht 2017, 09:09Politika
TEMA
Nga Mimoza Koçiu
Kjo pyetje mundon këdo, që e ka sado pak për zemër funksionin bazik të opozitës si oponente e qeverisë, sidomos e një shumice tashmë arrogante, edhe në numra.
Paradoksi i ministrave teknikë të Lulzim Bashës, të cilët pas humbjes së thellë më 25 qershor, po bëjnë punën për të cilën Rama u votua në 2013, për ta kryer deri në shtator 2017, është rikthyer në këto ditë të nxehta vere, edhe për një arsye shumë të thjeshtë: i zoti i punës, Lulzim Basha, që ende nuk e ka zbardhur marrëveshjen e 18 majit, nuk po arrin t’i gjejë një justifikim që nuk çalon, qëndrimit të ministrave të tij në tryezë me njeriun që thotë se i ka vjedhur zgjedhjet, edhe pse 6 javë pas tyre, ende nuk ka paraqitur një provë në publik, a në prokurori.
Heshtja a mungesa e fantazisë së Lulzim Bashës dhe e stafit të tij për t’i dhënë drejtim kësaj situate, a për ta mbyllur me një justifikim të besueshëm si debat, prodhon situata qesharake zinxhir, edhe nga justifikimet lara-lara të vetë ministrave, që vihen para pyetjes se çfarë bëjnë ende në qeveri. Dikush përdor si mburojë Kushtetutën, që e detyroka të rrijë deri në fund, edhe pse emërimi në atë funksion, nuk është bërë sipas Kushtetutës, por bazohet në një marrëveshje nate mes Ramës e Bashës. Dikush tjetër priste që ai që e kishte propozuar, Basha dmth., ta tërhiqte; një tjetër sfidonte kryeministrin që ta shkarkonte, edhe pse ky i fundit e tha qartë pak ditë pas zgjedhjeve, se priste që teknikët të largoheshin, pasi e kryen misionin e tyre. Në fund, një variant u dha nga zëvendëskryeministrja, se po përgatitej një raport për zgjedhjet, e këtij varianti iu bashkëngjit edhe vetë Lulzim Basha, ditën që mori mandatin e dytë si kryetar i Partisë Demokratike.
Por çka na rezulton, të paktën mediave në këto ditë vere, çka vetë teknikët përcjellin, nuk janë lajme për ecurinë e punës për raportin e zgjedhjeve. Njoftimet prej tyre vijnë tipike pune, të ministrave që vazhdojnë detyrën e zakonshme, si pjesë e shumicës së votuar në 2013-ën. Madje, premtimi i ministrit të Brendshëm teknik në dy intervista televizive, se kur Rama të nisë mandatin e dytë, nuk do ketë më kultivim kanabisi, është më befasuesi dhe u vë pikëpyetje jo vetëm deklaratave se teknikët po punojnë për raportin, por edhe marrëveshjes së natës Rama-Basha, e cila mesa duket shkon përtej zgjedhjeve, madje edhe përtej asaj lloj humbjeje spektakolare, pa asnjë lloj meraku e konsiderate për imazhin e lodhur të opozitës, që veç nxihet më fort.
As edhe një rresht në media nga teknikët se deri ku është raporti i zgjedhjeve, apo kur do përfundojë ai. Mbi të gjitha, si mund ta ketë luksin kjo opozitë që humbi aq thellë, të marrë kaq shumë kohë për hartimin e një raporti, që nëse merren seriozisht deklaratat e bëra, duhet të jetë jetik për besueshmërinë e PD-së e të kryetarit të saj?
Heshtja e Lulzim Bashës, që natyrisht ka të drejtën e tij të pushojë me familjen, duket një zgjedhje, e paqartë nëse e lehtë apo e vështirë, në koleksionimin e humbjeve, e mbulimin me harresë, të asaj të 25 qershorit, njëlloj si ato të 2013-ës, e 2015-ës, duke mos bërë analizën, një praktikë që vetë Edi Rama na e dëshmoi publikisht se bëhet, edhe pas një fitoreje si e tija.
Mbi të gjitha, duket sërish zgjedhje e Lulzim Bashës, që të mos i japë drejtim kësaj situate qesharake me ministrat e vet në qeveri, teksa vetë është me pushime, njëlloj si Rama e ministrat e vet, me ndonjë përjashtim, për shkak të emergjencës së zjarreve.
Në këtë paradoks, që Lulzim Basha e shoqëron me heshtje, ishte krejt flagrant një ilustrim i pozitës së vështirë ku gjenden ministrat teknikë. Ministri i Drejtësisë, për hir të së vërtetës një nga njerëzit më të aftë që ka PD, u sfidua publikisht me tallje e moskonsideratë nga një kompani private, që ka sjellë byzylykët e shërbimit të provës. Dy herë e ftoi ministria këtë kompani për të bërë verifikimet e gjendjes e funksionimit të tyre dhe ajo jo vetëm që nuk u paraqit, por as nuk i ktheu përgjigje. Një injorim i tillë publik nuk ka shans t’i ndodhë një ministri të Ramës. Për pasojë, ministri teknik i opozitës gjendet në një situatë, ku kryeministri nuk e mbështet, ndërsa Basha nuk e tërheq.
Pa u ndalur tek rasti që po heton ministri Bardhi, përse vallë duket detyruar të vihet në një pozitë të tillë? E bashkë me të edhe Lulzim Basha që e mban aty, përse vallë e pranon këtë tallje e përçmim që i bëhet publikisht?
Këtë situatë e rëndojnë më tej edhe justifikimet alogjike, mbase për shkak të vapës, që lëshojnë përfaqësues të tij, se teknikët duke qëndruar deri në fund në detyrë, respektokan Kushtetutën e marrëveshjen e 18 majit.
Me një fjalë, opozita do vazhdojë të bëhet qesharake deri në fund, edhe kur tallen kaq hapur e kaq publikisht, me një rol që nuk i takon, qeverisjen, por këmbëngul ta luajë, për një arsye, që deri tani asnjë mendje racionale, sado dashamirëse ndaj Bashës e PD-së, nuk e rrok dot.
Përse Lulzim Basha po e lë të bjerret çdo ditë e në rënie të lirë, atë që është arma kryesore e opozitës, besueshmëria, ky mbetet një mister i madh, por edhe një luks i pakuptimtë, për moralin e cenuar tashmë nga një marrëveshje e pazbardhur, e nga një humbje spektakolare.
2 komente në “Përse Lulzim Basha pranon të bëhet kaq qesharak?”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Une nuk mendoj se Basha eshte bere qesharak sepse nuk ka terhequr ministrat e vet teknike nga qeveria.
Aq me pak jane bere qesharake vete ministrat teknike, te cilet me mire a me keq, po bejne ate pune administrative rutine qe do te benin edhe vete ministrat e Rames ne kete kohe vere, pa nje program te ri pune.
As nuk mendoj se Basha eshte bere qesharak sepse edhe nuk po beka gjoja “opozite” te forte.
Perkundrazi, Basha behet qesharak kur pervesh menget e betejave fallco kur shpalos gojen me laperdhira dhe genjeshtra, kur akuzon ne hava dhe pengon aksionin per forcimin e shtetit ligjor, me fjale te tjera kur ben lufte me mullinjte e eres ne emer te te berit opozite per opzite, per fasade, apo thjesht sepse kete ja kerkojne militantet apo konkurentet e krahut te vet politik.
I kemi pare keto lloj opozitash destruktive, shkaterruese te shtetit ligjor, progresit dhe ekonomise, qe vetem kane denigruar poziten nderkombetare te vendit dhe kane sabotuar integrimin evropian te tij, sa here qe Saliu humbiste zgjedhjet dhe leshonte skifteret e tij te te gjitha rangjeve ne aksione subversive pas zgjedhore.
Dhe, per ta mbyllur, sipas mendimit tim, ai qe eshte bere qesharak ne kete situate te qeverisjes se ministrave teknike te marreveshjes Rama-Basha te 18 Majit, eshte vetem Edi Rama, kryeministri, qe rri e zvarget neper rruget e Shqiperise neper takime “me popullin” qe nuk te cojne asgjekundi, ne mos na cofshin ne nje terror administrativ te pushtetit dhe qe, nuk merr ne dore situaten dhe pozicionin e duhur per te cilin eshte zgjedhur, dmth:
-Te shkarkoje menjehere ministrat teknike, duke i falenderuar per ndihmesen qe dhane gjate kesaj kohe.
-Te percaktoje grupet e punes per objektivat dhe programin e ri te qeverisjes 4 vjecare, strukturen e qeverise
se re dhe madje edhe emrat e ministrave te rinj.
-Te miratoje ne organet drejtuese te Partise Socialiste dhe te paraqese publikisht oferten e maxhorances per
qeverisje gjitheperfshirese te vendit, duke i dhene nje rol te ri cilesor jo formal ne kete drejtim, kontributit
te shoqerise civile dhe, sidomos, vete opozites e cila, duhet te kete akses te plote ne te gjitha institucionet
kushtetuese te pavarura qe kane peshe ne balancimin e pushteteve dhe kontrollin e veprimtarise se shtetit.
Me fjale te tjera, Edi Rama duhet te filloje te qeverise sepse Shqiperia, sikurse cdo vend tjeter xhanem, nuk mund te kete lluksin te zvarget dy muaj e ca pa qeverisje, pa ditur se cfare qeverie ka dhe se per cfare programi po punon. Kjo zvarrisje te le te dyshosh se Rama 2 do jete nje qeverisje luksi dhe kotesie, nje zvarritje midis perkedheljes se vetvetes per fitoren e 25 Qershorit dhe limontise se pushtetarit qe nuk di ose nuk do te dije se cfare imperativash ka vendi.
Dikush, nga ata fare afer Rames, duhet ti beje atij me dije, se takimet aktuale te tij me popullin dhe shkarkimet ultimative ne publik te titullareve te administratave, jane vetem shprehje e arrogances se ndjesise se eshte i vetem ne poltronin e pushtetit dhe i perversitetit te shijimit te kenaqesise se nje fitoreje absolute qe as vete nuk e ka besuar se do t’a arrije.
Shpresoj se, moderatoret e Meros, do ma kene hequr rrethin e kuq te censurimit qe, prej nje fare kohe, po zbatojne ndaj komenteve te mija, kushedi per cfare lloj arsyeje apo teke verore dhe do ta cfaqin kete koment.
Akoma me lulin juve. Ai ka kater vjet që është transformuar më robot. Sa për PD-në ajo është partia e Berishajve dhe e shoqërisë së pjellës brrishoviç- sllobodanka. Ka kohë që këta janë futur.në histori si tradhëtarë dhe dhërbyes të UDB-asfalias. Çapajevi rus