Sytë janë nga yjet e ekipeve, veçanërisht, por disa prej tyre nuk do të jenë në gjendje të luajnë, të paktën ndeshjen e parë të 1/8 finale, pasi janë të lënduar.

Gjithsej bëhet fjalë për 40 lojtarë të lënduar, përveç ndryshimeve të këtij numri të madh në minutën e fundit.

Olympique Lyon – Barcelona
Skuadra franceze ka vetëm një mungesë, por që nuk ndikon në formacionin fillestar. Ai është sulmuesi i ri 18-vjeçar, Gouiri Amine, i cili nuk e ka bërë debutimin e tij këtë sezon, pas problemeve me ligamentin krucial. Barcelona, nga ana tjetër, nuk e ka të gatshëm Rafinha, i cili nuk luan prej një kohe disi të gjatë. Lojtari nuk është federuar për pjesën tjetër të garës. Kthimi i Samuel Umtiti në mbrojtje mbetet ende një mister. Së fundi, katalanasit nuk mund të llogarisin edhe Jasper Cillessen, nëse diçka e papritur ndodh me Marc-André Ter Stegen. Mungesa më e ndjeshme duket ajo e Arthur, i cili e kapi shpejt formacionin e Ernesto Valverde.

Manchester City – Schalke 04
Ekipi i Pep Guardiolës nuk do të ketë mungesa të rëndësishme. Kiliani Claudio Bravo dhe mbrojtësi qendror, Vincent Kompany, janë të vetmit lojtarë në infermieri, edhe pse nuk i prishin punë trajnerit katalanas. Schalke 04, nga ana tjetër, ka mungesa më të ndjeshme. Stambouli dhe Embolo janë dy lojtarët kryesorë, që nuk do të jenë në ndeshjen e parë. Atyre duhet t’u shtojmë edhe mungesat e Schöpf, Skrzybski dhe Burgstaller.

Atlético Madrid – Juventus
Të dy, Simeone dhe Allegri, nuk duhet të bëjnë pa lojtarë shumë të rëndësishëm në ndeshjen e parë. Atlético Madrid tashmë mund të llogarisë edhe Saviç, Koke e Diego Costa, kështu që trajneri argjentinas do ta ketë të gjithë skuadrën në dispozicion. Juventusi duket në një situatë të ngjashme, sepse tridenti BBC i mbrojtjes duket gati për lojë. Lajmet nga kampi bardhezi ëjnë me dije se janë riaftësuar Chiellini, Barzagli dhe Bonucci, të cilët kanë pasur probleme kohët e fundit. Humbja e vetme e konfirmuar për ndeshjen është ajo e kolumbianit Cuadrado.

Liverpool – Bayern Munich
Klopp nuk do të jetë në gjendje të bazohet te qendrori Joe Gómez në “Anfield”. Trajneri gjerman nuk llogarit as Oxlade-Chamberlain, me dëmtim të hershëm të ligamenteve. Te Bayern Munich, Thiago i ka tejkaluar tashmë problemet e tij muskulore. I vetmi që do të mungojë është Tolisso, me probleme të ligamenteve.

Tottenham – Borussia Dortmund
Pochettino ka një ndeshje të vështirë kundër Borussia Dortmundit. Trajneri i Tottenham ka të dëmtuar Delle Alli dhe Harry Kane, ndoshta lojtarët më të mirë. Ngushëllim përbën danezi Christian Eriksen, i cili do të jetë në dispozicion. Ekipi gjerman ka humbur dy pjesë të rëndësishme, qendrorin Manuel Akanji dhe kapitenin Marco Reus.

Roma – Porto
Roma do të duhet të luajë me portierin zëvendësues, pasi Robin Olsen është dëmtuar. Të tilla problemeve iu shtohen edhe emrat e Perotti në sulm, aty ku edhe Schick do të mungojë. Kësisoji, reparti ofensiv mund të përbëhet nga treshja Dzeko-Kluivert-El Shaarawy. Te Porto, e njëjta gjë ndodh me pjesën e përparme të skuadrës. Dy sulmuesit e saj më të mirë, Marega dhe Aboubakar, nuk janë gati, as meksikani Jesus Corona, i pezulluar nga UEFA për ndeshjen e parë.

Manchester United – PSG
Manchester United, i cili nuk e njeh humbjen nën drejtimin e Solskjaer, e ka tërë skuadrën në dispozicion për të përballuar një nga duelet më të mrekullueshme të raundit të dytë të Champions-it. PSG-ja, në teori favorite, do të duhet të bëjë pa dy yjet e veta. Mungesa e Neymar ishte e njohur prej gati dhjetë ditësh, por asaj i është shtuar së fundi uruguajani Edinson Cavani.

Ajax – Real Madrid
Klubi holandez ka katër “viktima”, edhe pse nuk kemi të bëjmë me futbollistë thelbësorë. Ata nuk do të jenë në ndeshjen e parë kundër Real Madridit: Varela, Magallán, Eiting dhe Bandé. Klubi i bardhë, nga ana tjetër, nuk do të ketë në dispozicion Luca Zidane, Jesús Vallejo dhe Marcos Llorente. Isco, i cili pavarësisht se nuk hyn në planet e Solarit, është mënjanë grupit me një problem, ndoshta të shkaktuar nga stresi. Kësisoji, ylli spanjoll nuk do të grumbullohet. (Telesport)