Në prag të 20-vjetorit të fillimit të bombardimeve të NATO-s kundër Serbisë jo vetëm mediat e Beogradit janë mobilizuar për të treguar «të vërtetën serbe». Funksionari serb për çështjen e Kosovës, Marko Gjuriqi, e ka vënë në dyshim masakrën e Reçakut dhe njëkohësisht ka lavdëruar librin «Gjykatësja në luftë dhe paqe» të Danica Marinkoviqit, e cila paskësh hetuar «rastin e Reçakut» dhe zbuluar gjoja të vërtetën. Për gjeneratat e reja: Danica Marinkoviq ka qenë një gjykatëse në shërbim gjunjëzues ndaj regjimit të Sllobodan Millosheviqit dhe në vitet ’90 detyrë parësore e saj ka qenë të dënojë shqiptarë me procedurë sa më të shpejtë dhe në mënyrë sa më arbitrare. Për librin e Danica Marinkoviqit kanë shkruar sidomos mediat proqeveritare dhe bulevardeske serbe. Gjuriqi ka thënë se do të angazhohet që libri të përkthehet në anglisht.

Por në përpjekjen për të interpretuar luftën e Kosovës është këqyur edhe Deutsche Welle, më saktë redaksia në gjuhën serbe. Një gazetar i saj ka zbritur në arkiva dhe ka nxjerrë nga atje citate të teksteve të korrespondentëve të mediave gjermane nga Ballkani. Nën titullin «Si u shtypën bombat» që në hyrje të tekstit thuhet: «Para 20 vitesh gjermanët u vërsulën në luftën e parë që nga Hitleri – në bombardimin e Jugosllavisë. Atje i shoqëruan komentatorët luftënxitës të gazetave».

Gazeta gjermane «Frankfurter Allgemeine Zeitung» (FAZ) e ka quajtur të çuditshme këtë qasje të Deutsche Welles. Në një shkrim të botuar të shtunën korrespondenti për Ballkan Michael Martens pyet: «A mund të kuptohet ndryshe një titull përveç se para 20 vitesh ‘komentatorët luftënxitës’ paskëshin shkaktuar një luftë me penat e tyre?» Po ashtu FAZ kritikon edhe ndërlidhjen që bëhet mes Hitlerit dhe pjesëmarrjes gjermane në luftën e NATO-s kundër Serbisë, që shërben si insinuatë për një kontinuitet nga viti 1945 deri më 1999.

Kush janë gazetarët që njollosen si luftënxitës? Në tekst përmenden tetë emra: Matthias Rüb, atëbotë korrespondent i FAZ për Ballkan, Norbert Mappes-Niediek (citohet një tekst i tij në «Die Zeit»), Stephan Israel («Frankfurter Rundschau»), Andrej Ivanji («taz»), Walter Mayr («Spiegel»), Cyrill Stieger («Neue Zürcher Zeitung») dhe Peter Münch e Josef Joffe («Süddeutsche Zeitung»).

Problemi i tekstit të Deutsche Welles është se nuk arrin të prezantojë asnjë fakt se këta gazetarë kanë shkruar tekste «luftënxitëse». Gazetarët e përmendur më 1999 kanë analizuar, raportuar, përshkruar, mbase edhe mund të kenë gabuar ndonjëherë, nënvizon FAZ, por ata nuk kanë nxitur luftën. A mund të quhet «luftënxitës» konstatimi se Sllobodan Millosheviqi mund të ndalet vetëm me forcë – duke pasur parasysh luftërat në Bosnjë dhe Kroaci, shkatërrimin e Vukovarit, masakrën e Srebrenicës dhe krime të tjera? «Nga korrespondenti për Gjermani i televizionit shtetëror serb RTS menjëherë është lavdëruar ‘puna madhështore gazetareske’ e Deutsche Welles. Kjo nuk është befasi, nëse e dini se RTS mbështet plotësisht kursin e presidentit serb Aleksandar Vuçiq, i cili më 1999 ka qenë ministër për informacion i Millosheviqit», përfundon «Frankfurter Allgemeine Zeitung».

3 komente në “Kjo i pëlqen presidentit serb: Deutsche Welle sulmon korrespondentët gjermanë për shkak luftës së Kosovës”

MerOQIHETNEBITH says:

23 Mars, 2019 09:54 te 9:54 am

Genjeshtrat edhe lajmet mashtruese te TEMES.
Mjere ju qe lexoni, besoni apo mendoni se po ndergjegjsoheni duke hapur faqet e kesal letre higjenike ne sherbim te Palloshit dhe mafjes komuniste drejtuar nga nje Cam Tullac.
Marxist Scum Mero dhe banda e fshatareve te tij nga Cameria e Greqise.

Përgjigjjuni
malsor says:

23 Mars, 2019 10:13 te 10:13 am

Edhe ne 2019 makina e falsifikimit te historise vazhdon punen si gjithnje nder shekuj (dhe ne rrime urte se mos na i prishet qejfi fqinjeve).

Përgjigjjuni
zhaku i pamposhtur says:

23 Mars, 2019 15:35 te 3:35 pm

Ju sikur u akuzuat për sponsorizime nga Athina në mos gaboj? E keni kthyer gazetën në celulë antishqiptare. .veç çdo gjë regjistrohet dhe kur të vijë ora gjithsecili do përgjigjet përsa bën apo nuk bën
( duke u nisur nga parafolësi im shpresoj se e keni lënë gazetën në gjendjen e ‘pilotit automatik’ dhe momentalisht mund të shfaqet replika ime. .)
veç jeni shumë të urryer dhe sharlatanë. .e di shumë mirë që nuk jam i vetmi që më çensurohet replika. .njëkohësisht shkruaj edhe në gazeta të tjera dhe nuk kam harruar pa ‘falenderuar’ çerdhen tuaj

Përgjigjjuni