Ilir Meta sulmon Ramën nga televizioni shtetëror i Estonisë: Ka vështirësi për të bashkëjetuar me demokracinë, me zgjedhjet e lira e të ndershme

Ilir Meta ka sulmuar kryeministrin Edi Rama gjatë një interviste për televizionin shtetëror të Estonisë.

I pyetur nga gazetari për raportet që ka me Ramën, Meta u shpreh se nganjëherë kryeministri ka vështirësi për të bashkëjetuar në harmoni me demokracinë, me pluralizimin politik dhe me zgjedhjet e lira e të ndershme, por këto janë themelet për një vend demokratik dhe europian.

Më tej duke folur për negociatat e Shqipërisë me Bashkimin Evropian, Meta tha se “Holanda dhe Franca të ndjekin shembullin e Gjermanisë”

Intervistë e Presidentit Meta për Televizionin shtetëror të Estonisë:

Gazetari: Ju tani nuk keni një Gjykatë Kushtetuese funksionuese në vendin tuaj apo jo?

Presidenti Meta: Ky është një tjetër problem, por shpresojmë që në muajt e ardhshëm do ta kemi Gjykatën Kushtetuese dhe që ajo do të marrë vendimet e duhura e të drejta.

Gazetari: Ka një ngërç mes Parlamentit të Shqipërisë dhe Institucionit të Presidentit. Ju duhet të emëroni gjyqtarët për në Gjykatën Kushtetuese dhe duket sikur kjo gjë është tepër e vështirë. Si mendoni ta tejkaloni këtë ngërç?

Presidenti Meta: Ky është një ngërç i kanalizuar gjatë zbatimit të reformës në drejtësi, që u votua në mënyrë unanime tre vjet më parë, kur unë isha Kryetar i Parlamentit dhe kur ne ia dolëm mbanë të arrinim një konsensus me të gjitha partitë parlamentare. Por gjatë zbatimit të reformës në drejtësi përjetuam disa probleme, por shpresoj që së shpejti do t’ia dalim mbanë për të pasur një Gjykatë Kushtetuese funksionuese.

Gjithashtu, edhe për ta çuar reformën gjyqësore përpara në drejtimin e duhur.

Gazetari: Gjithsesi, kur shikoj zgjedhjet vendore, të cilat u sunduan nga një parti e vetme, ku votuesit nuk kishin ndonjë zgjedhje, kur kam parasysh faktin se ju nuk keni një Gjykatë Kushtetuese funksionuese, çfarë tregojnë të gjitha për shëndetin e demokracisë në Shqipëri?

Presidenti Meta: Nuk është se po kalojmë çastet më të shkëlqyera të demokracisë në Shqipëri.

Gazetari: Po me Kryeministrin e Shqipërisë, Edi Rama si po ia kaloni? A merreni vesh mirë me të?

Presidenti Meta: Me të jam në rregull dhe nuk kam probleme. Nganjëherë ai ka vështirësi për të bashkëjetuar në harmoni me demokracinë, me pluralizimin politik dhe me zgjedhjet e lira e të ndershme, por këto janë themelet për një vend demokratik dhe europian.

Gazetari: Vetëm disa muaj më parë ai tha se Shqipëria nuk është gati të anëtarësohet në Bashkimin Europian, sepse institucionet e saj politike nuk janë edhe aq fort të zhvilluara në të tashmen?

Presidenti Meta: Kjo është arsyeja më e mirë që ai duhet të përpiqet edhe më shumë për të ndihmuar vendin, për të rivendosur rendin kushtetues dhe demokratik.

Gazetari: Javën e ardhshme ju shpresoni që të merrni një ftesë për të filluar bisedimet e anëtarësimit. Kam një ndjesi se Bashkimi Europian është paksa i lodhur nga krizat e veta të brendshme. E pse i duhet që të importojë një krizë si ajo që po përjeton vendi juaj me demokracinë?

Presidenti Meta: Edhe kriza jonë, ajo së cilës ju i referoheni, kjo e demokracisë në Shqipëri, po e pasqyron këtë krizë të brendshme të Bashkimit Europian, sepse ata mund të jenë më tepër ndihmues për ta shmangur këtë situatë krize. Ata mund të jenë më shumë të paanshëm dhe më të përkushtuar për të mundësuar dialogun politik mes të dyja palëve. Sidoqoftë, pse Bashkimi Europian duhet t’i mbajë dyert e saj hapur për zgjerimin përkundrejt Shqipërisë? Sepse Ballkani është shumë jetësor për qëndrueshmërinë, sigurinë dhe të ardhmen e Bashkimit Europian. Dhe mbajtja hapur e dyerve të zgjerimit për Shqipërinë, për Maqedoninë e Veriut, e cila e meriton plotësisht si dhe për vendet e tjera, që shpresojnë të vazhdojnë në këtë rrugëtim, mendoj se ky do të ishte një investim për qëndrueshmërinë dhe sigurinë e këtij rajoni, që ka qenë dhe do të jetë shumë jetësor për qëndrueshmërinë e mbarë kontinentit.

Gazetari: Ka disa vende tepër skeptike: Holanda, Francë, madje edhe Greqia, që nuk janë edhe aq shumë entuziaste për të nisur bisedimet e anëtarësimit me vendin tuaj. Si e mund t’i bindni këto vende?

Presidenti Meta: Do të sugjeroja që këto vende duhet të ndjekin shembullin e Gjermanisë, nëse ende do të kenë një dozë skepticizmi apo rezerva për çështje të caktuara. Mendoj se Bundestagu mori një vendim tepër të drejtë dhe të arsyeshëm për t’i thënë “Po!” hapjes së negociatave të anëtarësimit me Shqipërinë, por gjithashtu duke pasur një udhërrëfyes të qartë se si do të vazhdojë më tej ky proces. (TemA)

Eurodeputetja portugeze, kandidate për postin e raportueses së PE për Shqipërinë

15:47 Politika

Vendimi për negociatat, gratë ministre letër për deputetët e Holandës: Dështimi i përpjekjeve tona për të çelur bisedimet është çmimi më i madh për forcat e errëta që po e pengojnë

15:16 Politika

Balla pritet në Bukuresht nga kryeministrja Dăncilă: Në kredibilitetin e BE të fillojë negociatat me Shqipërinë dhe Maqedoninë e Veriut, kanë përmbushur detyrat

14:45 Politika

Basha: Rama ka zgjedhur rrugën e gabuar, PD do bëje gjithçka që Shqipëria të mos mbetet peng i korrupsionit

12:51 Politika

Tentuan të kalonin klonin, por u sharruan nga plumbat e kufitarëve dhe qeni i kufirit që i bëri copash: Historia tragjike e shtatë djemëve tiranas në 1989-ën…

11:35 Politika

Reforma Zgjedhore, BE: Të gjithë aktorët politikë të demonstrojnë gatishmëri përmes dialogut konstruktiv

10:32 Politika

Zyrtarja e PS: Fitore frymëzuese e Vetëvendosjes si pjesë e Internacionales Socialiste, urime Albin

10:13 Politika

LSI: Shqiptarët të parët në botë per azil, kjo është politika kriminale e Edi Ramës

10:01 Politika

Ilir Meta, 430 milionë lekë shpenzime për dhurata e dekorata. Po deputetët sa harxhojnë?!

09:43 Politika

Grida Duma kundër opozitës së re dhe Bashës: Reformën Zgjedhore do ta bëjmë ne dhe PS-ja

08:38 Politika