Te fundit
Pas 30 raketave, SHBA ndërmerr sulme ushtarake në Irak dhe Siri
29 Dhjetor 2019, 23:05Bota
TEMA
Shtetet e Bashkuara sulmuan pozicionet e militantëve në Irak dhe Siri, të cilët janë fajësuar për vrasjen e një kontraktuesi amerikan, tha të dielën një zëdhënës i Departamentit amerikan të Mbrojtjes.
Forcat amerikane kryen “sulme precize mbrojtëse” ndaj pesë zonave të kontrolluara nga Kataeb Hezbollah, ose Brigadat e Hezbollahut, një grup militant irakian i mbështetur nga Irani, tha zëdhënësi Jonathan Hoffman përmes një deklarate.
Shtetet e Bashkuara kanë fajësuar grupin militant për një sulm me raketa të premten, në të cilin u vra një kontraktues i Departamentit amerikan të Mbrojtjes në një kompleks ushtarak afër Kirkukut, në Irakun verior.
Zyrtarët thanë se sulmuesit hodhën 30 raketa gjatë sulmit të së premtes.
Zoti Hoffman tha se sulmet amerikane do të dobësojnë aftësinë e grupit për të kryer sulme të ardhshme ndaj amerikanëve dhe aleatëve të tyre në qeverinë Irakiane.
Brigadat e Hezbollahut të Irakut, një forcë e veçantë nga grupi libanez Hezbollah, veprojnë nën ombrellën e milicive të njohura kolektivisht si Forcat Popullore të Mobilizimit. Shumë prej tyre mbështeten nga Irani.
Një anëtar i lartë i Forcave Popullore të Mobilizimit, i cili foli në kushte anonimiteti, tha se të paktën 12 luftëtarë të grupit Brigadat e Hezbollahut u vranë si pasojë e sulmeve amerikane përgjatë kufirit të Irakut me Sirinë. Deklaratat e tij nuk janë konfirmuar ende nga burime të pavarura.
Lini një Përgjigje
Më të lexuarat
24 oret e fundit
Javen e fundit
Blog Tema
