Te fundit
“Dita e Çekistëve” një festë në kujtim të terrorit dhe shtypjes sovjetike
20 Dhjetor 2020, 12:13Bota
TEMA
Këtë 20 dhjetor, Rusia feston njëqind e tre vjetorin e Çekistëve. Çeka, ishte agjencia sekrete e sigurisë bolshevike, e formuar për të identifikuar dhe çrrënjosur veprimtarinë kundërrevolucionare. Më 20 dhjetor 1917, diktatura e porsalindur bolshevike e Vladimir Lenin krijoi forcën e saj të fshehtë të policisë për të shtypur opozitën, që mori titullin: “Komisioni i urgjencave ruse për luftimin e kundërrevolucionit dhe sabotazheve” ose “Çeka”. “Çeka” ishte për qytetarët e Bashkimit Sovjetik, një simbol i terrorit dhe tiranisë.
Nën drejtimin e Leninit, “Çeka” kreu arrestime masive, burgosje dhe ekzekutime të “armiqve të popullit”. Në një kohë relativisht të shkurtër, Çeka arriti të shtrijë shtypjen e saj ndaj të gjithë kundërshtarëve politikë të qeverisë komuniste, përfshirë anarkistët. Më 12 prill 1918, rreth 26 qendra politike anarkiste në Moskë u sulmuan. Rreth 40 anarkistë u vranë nga forcat Çeka dhe rreth 500 u arrestuan dhe u burgosën pasi u zhvillua një betejë e ashpër midis dy grupeve. Në përgjigje të rezistencës së anarkistëve, Çeka orkestroi një fushatë masive hakmarrëse me ekzekutime dhe arrestime kundër të gjithë kundërshtarëve të qeverisë bolshevike, në atë që u bë i njohur si “Terrori i Kuq”.
“Çeka” e njohur ndryshe dhe si “Terrori i kuq” ka orkestruar fushata të përgjakshme kundër Gjermanisë, Austrisë, Çeko-Sllovakisë, Serbisë, Ukrainës, Rumanisë dhe Francës. “Çeka” u përdor gjithashtu kundër Ushtrisë së Zezë anarkiste të armatosur të Nestor Makhno në Ukrainë, qeveria komuniste sovjetike vendosi të eliminonte forcat anarkiste ukrainase duke terrorizuar fshatarët dhe shkatërruar anëtarët e partive politike ukrainase.
Me prezantimin e politikave të reja ekonomike dhe kontakteve me Perëndimin, qeveria sovjetike u përpoq të shkëputej nga politika e terrorit dhe riorganizoi Çeka-n në GPU, e cila u pasua nga OGPU-ja, NKVD-ja dhe më pas në KGB. Por, pavarësisht çdo reforme politike, natyra shtypëse sovjetike nuk ka ndryshuar.
Duke qenë se “Çeka” u riemërtua në KGB-në e tmerrshme në vitin 1954, duket sikur organizata nuk ka reshtur kurrë së ekzistuari. Edhe pse KGB u shpërbë në vitin 1991, veprimtaritë dhe aktivitetet e saj kanë qenë në rritje gjatë viteve të fundit, nën petkun e emrit të ri FSB, që është Shërbimi Federal i Sigurisë së Rusisë, apo SVR Shërbimi i Jashtëm i Inteligjencës ruse. Sot FSB ka liri të pakufizuar dhe nuk i përgjigjet as Parlamentit, dhe as opinionit publik.
Së pari, u bë një fushatë destabilizimi në Moldavi, me kandidatin pro rus, e ndjekur nga helmimi i një tregtari armësh në Bullgari dhe më pas një grusht shteti të organizuar në Malin e Zi. Në vitin 2018, pati një përpjekje për të vrarë një ish-spiun rus në Britani, duke përdorur një agjent nervor (novachok). Megjithëse operacionet mbanin gjurmët e dorës së shërbimeve të inteligjencës ruse, autoritetet fillimisht i panë ato si sulme të izoluara dhe pa lidhje me njëra-tjetrën. Zyrtarë të sigurisë perëndimore tani kanë arritur në përfundimin se, këto operacione dhe potencialisht shumë të tjerë, janë pjesë e një fushate të koordinuar dhe të vazhdueshme për destabilizimin e Evropës, ekzekutuar nga një njësi elitare brenda sistemit të inteligjencës ruse të aftë në përmbysje qeverie, sabotim dhe vrasje.
Rusia, jo vetëm që nuk i ka dënuar krimet e sistemit totalitar, por i bën jehonë me festime madhështore dhe të kushtueshme, dorës që ka oranizuar dhe ekzekutuar këto krime. Që nga viti kur Putin erdhi në pushtet, shërbimet sekrete ruse, si pasardhëse të Çeka–s, kanë qenë në krye të çdo vendimmarrje mbi Rusinë, duke qenë se vetë presidenti është një ish-anëtar i KGB-së dhe përdor termin çekist, në formë më të modernizuar. Pasi erdhi në pushtet, ai filloi një ofensivë mbi miliarderët vendimmarrës të epokës së Jelcinit: disa u arrestuan, të tjerët u dëbuan në internim. Por, ata që besojnë se veprimtaritë politike të Putinit kishin për qëllim t’i jepnin fund mbretërimit të oligarkisë në Rusi gabojnë: ai thjesht zëvendësoi oligarkët me disa nga burrat që bënin pjesë në shërbimet e inteligjencës së KGB–së, miq nga fëmijëria dhe rinia e tij. Këta janë ata që sot sundojnë Rusinë, të etur për pushtet ekonomik dhe politik, pa treguar mëshirë për ata që guxojnë të prishin planet e tyre.
Përgatiti për TemA: Armela Toska
1 komente në ““Dita e Çekistëve” një festë në kujtim të terrorit dhe shtypjes sovjetike”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Cme nxorri mallin e Cekut te Bardhe, lol!