Te fundit
Louis Vuitton në Holandë e përfshirë në një çështje pastrimi parash
27 Korrik 2025, 21:21Bota
TEMA
Një grua paguante gjithmonë me para në dorë dhe blinte shpesh. Kurrë nuk shpenzonte më shumë se një shumë të caktuar, por gjatë rreth 18 muajve, autoritetet thonë se kjo kliente e vetme bleu mallra luksoze nga dyqanet e Louis Vuitton në Holandë në vlerë prej miliona eurosh.
Tani, prokurorët holandezë po hetojnë Louis Vuitton Netherlands një degë e markës franceze të luksit në lidhje me një çështje që përfshin këtë kliente, një grua kineze e akuzuar për pastrim të miliona eurove përmes një skeme ndërkombëtare.
Rasti nxjerr në pah rolin që mund të kenë mallrat luksoze në krimet financiare, si edhe rrezikun që mbartin markat e njohura kur klientët e tyre përfshihen në aktivitete të paligjshme për të fshehur origjinën e fondeve. Edhe pse butikët e luksit nuk janë të detyruar njësoj si bankat të raportojnë çdo aktivitet të dyshimtë financiar, ata kanë detyrime ligjore për të njoftuar autoritetet për disa lloj transaksionesh.
Prokurorët e akuzojnë gruan në qendër të rastit e njohur publikisht vetëm si Bei W., sipas ligjit holandez për pastrim të afro 3 milionë eurove (rreth 3.5 milionë dollarë amerikanë) nga shtatori 2021 deri në shkurt 2023. Dy të pandehur të tjerë që pretendohet se e kanë ndihmuar, gjithashtu përballen me akuza.
Në një seancë paraprake këtë muaj, prokurorët thanë se Bei Ë. kishte marrë shuma të mëdha parash të paligjshme, të përfituara nga veprimtari kriminale, nga një person tashmë i dënuar për këtë skemë. Thuhet se ajo i ka shpenzuar këto para në disa dyqane të Louis Vuitton në Holandë, duke përdorur emra dhe adresa të ndryshme emaili. Sipas prokurorëve, mallrat u dërguan më pas në Hong Kong dhe Kinë.
Blerjet ishin gjithmonë nën kufirin prej 10,000 eurosh që do të kërkonte raportimin e transaksioneve me para në dorë një metodë që, sipas hetuesve, duhej të kishte ngritur dyshime në dyqanet e Louis Vuitton. Thuhet se ajo kishte ndihmën e një punonjësi të Louis Vuitton, i cili e njoftonte kur vinin produkte të reja brenda intervalit të çmimeve të përshtatshme për skemën.
Përfaqësuesit e Louis Vuitton dhe të kompanisë mëmë, Moët Hennessy Louis Vuitton, nuk janë përgjigjur ndaj kërkesave për koment.
Pastruesit e parave përdorin shpesh metoda që shmangin raportimin, duke kryer transaksione me para në dorë që janë pak më poshtë pragut ligjor.
Në Holandë, autoritetet nuk shqyrtojnë vetëm tregues objektivë të aktivitetit të paligjshëm, si për shembull pagesat mbi 10,000 euro, por edhe faktorë më subjektivë, si sjelljet e dyshimta apo modelet e përsëritura që mund të sinjalizojnë krim, sipas Njësisë së Inteligjencës Financiare të vendit. Prandaj, bankat dhe bizneset pritet të raportojnë edhe “transaksione të pazakonta” që janë nën kufirin ligjor dhe të kenë sisteme të forta për vlerësimin e rrezikut.
Ligji holandez bazohet në parimet e Task Forcës për Veprim Financiar (Financial Action Task Force), një agjenci ndërqeveritare e krijuar në vitin 1989 për të luftuar pastrimin e parave.
Ekspertët thonë se skema ku dyshohet se është përfshirë Louis Vuitton është e zakonshme për disa arsye. Pjesëmarrësit mendohet se kanë përdorur një sistem të njohur si “daigou” një praktikë ku persona që ndodhen jashtë Kinës blejnë mallra në emër të klientëve në Kinë. Këto mallra janë shpesh më të lira jashtë vendit dhe kanë më pak rrezik të jenë të falsifikuara.
Në këtë rast, prokurorët thonë se blerjet u financuan nga para të përfituara nga aktivitete kriminale, të cilat u dërguan blerësve për t’u pastruar përmes blerjeve në dyqanet Louis Vuitton. Rasti u raportua për herë të parë nga gazeta holandeze Algemeen Dagblad.
Oligarkë, kriminelë dhe zyrtarë të korruptuar në mbarë botën kanë përdorur prej kohësh vila, jahte, makina, vepra arti dhe mallra të luksit si një mënyrë për të shijuar të ardhurat e tyre të paligjshme dhe për të transferuar pasurinë jashtë vendit, thotë James R. Richards, ish-drejtor për menaxhimin e rrezikut financiar në Ëells Fargo.
Vitin e kaluar, mbi 400 miliardë dollarë u shpenzuan në nivel global për mallra luksoze personale. Përdorimi i këtij tregu për pastrim parash është i dokumentuar, edhe pse nuk dihet me saktësi sa para janë pastruar në këtë mënyrë. Zyrtarët amerikanë kanë ngritur gjithnjë e më shumë shqetësime për rrjetet kineze të pastrimit të parave.
Në një seancë në Senat vitin e kaluar, Ricardo Mayoral nga Departamenti i Sigurisë Kombëtare deklaroi se këto grupe përdorin “skema komplekse për pastrimin e parave” për të “lëvizur shuma të mëdha parash të pista në mënyrë të shpejtë dhe të heshtur” për llogari të organizatave kriminale. Ata mbështeten tek “bankierë të nëndheshëm” për të mbledhur para në dorë dhe shpesh rekrutojnë punonjës nga brenda bizneseve për t’u ndihmuar.
Alex Zerden, ish-punonjës në Departamentin Amerikan të Thesarit në Zyrën për Inteligjencën Financiare dhe Terrorizmin, tha se komuniteti ndërkombëtar ka kaluar dekada duke u përpjekur të gjejë një ekuilibër mes mbledhjes së informacionit financiar, lehtësimit të barrës rregullatore dhe mbrojtjes së privatësisë së konsumatorit.
“Kriminelët vazhdojnë të kërkojnë hallkat më të dobëta në sistemin financiar për të pastruar para,” tha Zerden. “Tregu i luksit nuk është imun ndaj këtyre kërcënimeve.”
Më të lexuarat
24 oret e fundit
Javen e fundit
Blog Tema
Lini një Përgjigje