Te fundit
Zbulohet rrjeti i dyshuar spiunazhi bjellorus, që vepronte në Europë
11 Shtator 2025, 10:40Bota
TEMA
Një operacion i përbashkët midis disa vendeve të Evropës Qendrore ka identifikuar një rrjet të dyshuar spiunazhi bjellorus që thuhet se përfshinte një ish-zëvendësdrejtor të inteligjencës moldave.
Një deklaratë nga Eurojust, organi koordinues i drejtësisë penale i Bashkimit Evropian, tha se kishte punuar me autoritetet rumune, çeke dhe hungareze për të “kapur një individ të hetuar për krimin e tradhtisë me anë të transmetimit të sekreteve shtetërore”.
Republika Çeke dëboi një diplomat bjellorus për këtë çështje, ashtu si edhe Moldavia.
Eurojust nuk e identifikoi të dyshuarin kryesor, por agjencia hungareze e lajmeve Telex e quajti atë Alexandru Balan, një ish-zëvendëskryetar i shërbimit të inteligjencës moldave dhe për një kohë ndërlidhës i saj në Kiev.
Një zyrtar moldav konfirmoi se Balan ishte personi i arrestuar.
Eurojust pretendoi se i dyshuari pati dy takime në Budapest në vitin 2024 dhe 2025 me oficerë nga KGB-ja, shërbimi i inteligjencës bjelloruse, ku ai mori para dhe udhëzime.
“Takimet rrezikuan sigurinë kombëtare të Rumanisë”, tha organi.
Moldavia, e cila udhëhiqet nga një presidente pro-BE, Maia Sandu, ka qenë në qendër të një beteje midis Rusisë dhe perëndimit për ndikim.
Në një referendum vitin e kaluar, vendi votoi me një diferencë të ngushtë në favor të anëtarësimit të ardhshëm në BE, dhe agjencitë perëndimore të inteligjencës thonë se vendi mbetet një përparësi kryesore për Moskën.
Zgjedhjet parlamentare do të mbahen atje më vonë këtë muaj. Nuk ishte menjëherë e qartë se çfarë lloj informacioni mund t’u kishte ofruar Balan bjellorusëve.
Që kur u largua nga shërbimi SIS i Moldavisë, ai ka qenë një pjesëmarrës aktiv në qarkun e konferencave të sigurisë në vende të ndryshme evropiane. (The Guardian)
Më të lexuarat
24 oret e fundit
Javen e fundit
Blog Tema
Lini një Përgjigje