Te fundit
Ndryshon skema! Të moshuarit që dalin në pension pas 1 janarit 2025 përfitojnë më shumë
19 Korrik 2025, 12:40Ekonomia
TEMA
Qeveria ka miratuar zyrtarisht indeksimin me 9.3% të bazës së vlerësuar të vitit 2023, e cila do të përdoret për llogaritjen e pensioneve të reja, që do të caktohen nga 1 janari 2025 e në vazhdim.
Ky zhvillim vjen pas miratimit të Vendimit të Këshillit të Ministrave nr. 404, datë 16.7.2025, i cili synon të mbrojë vlerën reale të kontributeve të qytetarëve në kushte inflacioni dhe ndryshimesh ekonomike. Në pikën 1 të vendimit theksohet: “Miratimin e indeksimit të bazës së vlerësuar të vitit 2023, me indeksin 9.3%, të llogaritur sipas kritereve, të përcaktuara në nenin 59, të ligjit nr. 7703, datë 11.5.1993, ‘Për sigurimet shoqërore në Republikën e Shqipërisë’, të ndryshuar”.
Kjo rritje e indeksit ka për qëllim të përmirësojë llogaritjen e pensionit fillestar mujor, duke rritur shumën për të gjithë ata që përfitojnë të drejtën e pensionit nga fillimi i vitit të ardhshëm. Vendimi ndikon mbi “bazën e vlerësuar individuale vjetore, të arritur nëpërmjet kontributeve të paguara dhe rivlerësimeve të tyre, të kryera deri në vitin 2023”, – siç citohet në pikën 2 të tij.
Për të ruajtur një trajtim të drejtë, vendimi përcakton gjithashtu kufijtë maksimalë të bazës së rivlerësuar, duke theksuar në pikën 4 se: “Pas aplikimit të indeksit të vitit 2023, baza e vlerësuar për efekt të llogaritjes së shumës fillestare mujore të pensioneve, që do të caktohen me datë fillimi nga data 1.1.2025, nuk mund të jetë më e lartë se: a) trefishi i pagës minimale në shkallë vendi, e përcaktuar me vendim të Këshillit të Ministrave për pagat e periudhës, nga viti 1994 deri më 31.12.2001; b) paga maksimale në shkallë vendi, e përcaktuar sipas kritereve të nenit 10, të ligjit nr. 7703, për pagat nga viti 2002 e në vazhdim”.
Po ashtu, vendimi i ri vjen i shoqëruar me një shtojcë zyrtare, ku përfshihen indekset akumulative të pagave për periudhën 1994–2023, sipas pagave referuese për profesione të ndryshme dhe kontributeve mujore, bazuar në vendimin e mëparshëm nr. 561, datë 12.8.2005. Këto të dhëna do të jenë bazë për përllogaritje më të sakta dhe të personalizuara për çdo qytetar. Sipas pikës 5 të vendimit, “Efektet financiare, që rrjedhin nga zbatimi i këtij vendimi, lidhen me zbatimin e formulës së caktimit të pensioneve dhe aplikohen vetëm për pensionet me datë fillimi nga data 1.1.2025 e në vazhdim dhe përballohen brenda buxhetit vjetor, të miratuar për Institutin e Sigurimeve Shoqërore”.
Ky indeksim nuk prek pensionet aktuale, por vetëm ato që do të caktohen nga fillimi i vitit të ardhshëm. Sipas autoriteteve, kjo masë synon të ruajë ekuilibrin e sistemit të sigurimeve shoqërore dhe të garantojë shpërblim të drejtë për kontributet e qytetarëve, duke përmirësuar trajtimin financiar të brezave që hyjnë në pension. Vendimi hyn në fuqi pas botimit në Fletoren Zyrtare, ndërsa efektet e tij do të nisin nga 1 janari 2025.
2 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Kjo puna e pensioneve është kush e hongri e hëngri të na rrojë partia...
Hajde diferencim hajde ne qe kemi dale ne pesio te pjeseshm per ndryshim systemi te hame merda simbas ktyre ne fuqi se nuk qe per Fain tone dhe ne te ngelimi ne vend numero edhe pse nuk qe fai jone na u heger haku jone per punsim dhe na nxorren me 60 %.dhe tani per kto te tjeret do marrin pension mure ne do ngelemi me gisht ne goje dhe pse I kemi kryer detyrimet tona profesionale .dhe te Bashkime professionals cfar fai kemi ne qe dolem me 69 mije leke dhe sot marr 167 mije leke.Turp I Zotit Zoti na ndihmofte kur te shkojme ne boten tjeter se per ne Qeveria nuk mendon I Faleminderit shume qe na leni me ngordhe.