Te fundit
Shoqata e Gjyqtarëve reagon për statusin e magjistratëve dhe prokurorëve: Po tentohet të uzurpohet pushteti i KLGJ
13 Janar 2026, 11:05Kronika
TEMA
Shoqata Kombëtare e Gjyqtarëve të Republikës së Shqipërisë ka reaguar në lidhje me ndryshimet ligjore që prekin statusin e gjyqtarëve dhe prokurorëve.
Në reagim theksohet se me ndryshmet ligjore shmanget gara për postet drejtuese në pushtetin gjyqësor si dhe po tentohet të uzurpohet pushteti që Kushtetuta i ka dhënë Këshillit të Lartë Gjyqësor në emërimin e kryetarëve të gjykatave.
Reagimi i plotë:
Shoqata Kombëtare e Gjyqtarëve të Republikës së Shqipërisë është një njohur me projektligjin “Për disa shtesa dhe ndryshime në ligjin nr. 96/2016 “Për statusin e gjyqtarëve dhe prokurorëve në Republikën e Shqipërisë””, si pjesë e një pakete ndryshimesh të ligjeve të reformës në drejtësi, të dërguar nga ana e Kuvendit, për konsultim. Në parim, Shoqata është shprehur gjithmonë e gatshme për të bashkëpunuar me Kuvendin dhe çdo institucion tjetër në përmirësimin e kuadrit ligjor që normon statusin e magjistratëve si dhe organizimin dhe veprimtarinë e organeve të drejtësisë dhe të qeverisjes së tyre. Megjithatë, kjo Shoqatë thekson se çdo ndryshim normativ duhet të jetë i kujdesshëm, të mos bjerë ndesh me parimet themelore të shtetndërtimit, si ndarja dhe balancimi i pushteteve dhe pavarësia e gjyqësorit, si dhe duhet të synojë perfeksionimin e ligjeve bazë të reformës në sistemin e drejtësisë dhe jo të zhbëjë sukseset e arritura deri tani në këtë drejtim.
Shoqata konstaton se në projektligjin “Për disa shtesa dhe ndryshime në ligjin nr. 96/2016 “Për statusin e gjyqtarëve dhe prokurorëve në Republikën e Shqipërisë””, të paraqitur nga ana e Kuvendit, ndër të tjera, prezantohet edhe një normë e cila vlerësohet si shumë problematike nga pikëpamja kushtetuese. Konkretisht bëhet fjalë për nenin 12 të këtij projektligji, që synon të shtojë nenin 170/3 në ligjin nr. 96/2016 “Për statusin e gjyqtarëve dhe prokurorëve ne Republikën e Shqipërisë”. Nëpërmjet kësaj norme, kryetarët në detyrë të gjykatave të shkallës së parë dhe të apelit të juridiksionit të përgjithshëm dhe atij administrativ konfirmohen si kryetarë të emëruar deri në datën 31 dhjetor 2028, duke shmangur sakaq garën për këto poste drejtuese në pushtetin gjyqësor.
Shoqata Kombëtare e Gjyqtarëve të Republikës së Shqipërisë thekson se një dispozitë e tillë, së pari, tenton të uzurpojë pushtetin që Kushtetuta i ka dhënë Këshillit të Lartë Gjyqësor në emërimin e kryetarëve të gjykatave. Në nenin 147/a, pika 1, shkronja “a”, të Kushtetutës, parashikohet se Këshilli i Lartë Gjyqësor emëron, vlerëson, ngre në detyrë dhe transferon gjyqtarët e të gjitha niveleve. Emërimi në pozicionin e kryetarit të gjykatës konsiderohet si ngritje në detyrë sipas ligjit nr. 96/2016 dhe për këtë mund të disponojë vetëm Këshilli i Lartë Gjyqësor. Së dyti, në mënyrë të çuditshme, kjo dispozitë shtrihet vetëm ndaj gjykatave të juridiksionit të përgjithshëm dhe atyre administrative dhe nuk përfshin gjykatat e posaçme. Së treti, projektligji nuk mban në konsideratë faktin se KLGJ-ja tashmë ka miratuar aktin normativ përkatës lidhur me procedurën e zgjedhjes së kryetarëve të gjykatave të shkallës së parë dhe të apelit, akt i cili ka hyrë në fuqi në datën 1 janar 2026 dhe pritet t’i sjellë efektet shumë shpejt, me hapjen e garës për postet e kryetarëve në këto gjykata, si dhe faktin se për një periudhë prej gati gjashtë vitesh gjykatat e shkallës së parë dhe të apelit janë drejtuar nga zëvendëskryetarët, të cilët kanë ushtruar funksionet e kryetarit në detyrë. Kjo gjë e bën jo vetëm të panevojshëm caktimin e kryetarëve të gjykatave nga ana e Kuvendit, por sjell edhe cenimin e parimeve kushtetuese të ndarjes së pushteteve dhe pavarësisë së pushtetit gjyqësor.
Shoqata sjell në vëmendje se edhe tentativa të ngjashme për miratimin e normave të tilla me karakter ad personam kanë dështuar pasi janë përballur me gjykimin kushtetues. Përmendim këtu vendimin nr. 34, datë 10.04.2017, të Gjykatës Kushtetuese, me të cilin është shfuqizuar, ndër të tjera, neni 161, pika 3, e ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, dispozitë e cila synonte të ndërpriste mandatin e Kryetarit të Gjykatës së Lartë si dhe të kryetarëve të gjykatave të tjera. Në këto rrethana, Shoqata fton Kuvendin e Republikës së Shqipërisë që të mos përpiqet të cenojë standardet e shtetit të së drejtës, duke dëmtuar arritjet e realizuara përmes ngritjes së organeve të reja të qeverisjes së pushtetit gjyqësor, pushtet i cili është në përfundim të procesit të reformimit si dhe që të mbajë në konsideratë jurisprudencën udhërrëfyese të Gjykatës Kushtetuese. Nga ana tjetër, ajo është në çdo moment e hapur për të bashkëpunuar dhe ofruar kontributin e saj në përmirësimin e procesit të ligjbërjes.
4 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Normal qe do bejne keto ndryshime se u duhen kryetaret e “ drejtesise se re” si Dvorani, Gerd Hoxha etj qe dihet boterisht se jane sahanlepiresit, zvarraniket dhe me te kryekorruptuarit qe u mbajten ne sistem per ta kontrolluar mafia shteterore dhe e krimit. Shoqaten e ka shqetesuar ideja e pushtumit te pushtetit qe eshte tashme i pushtuar jo vetem nga kryekaret, por nga shumica e gjyqtareve qe kane pushtuar ne rruget me te pista te mundshme karriket dhe zyrat, dhe ngrefosen se shumica e trajton detyren si llotari, duke ptur parasysh se shumica jane fshatare pa vizion, llum i kihes qe jetojme e mendjengushte qe pasuria qe vene per 1 vit oune i ben aq qesharake me lukun e pa shfrenuar por te keqkombinuar. Keshtu qe ju shumica e gjyqtareve qe ankoheni per pushtim , jeni pishtuesit e medhenj qe jeni gjithashtu aq te paafte, aq te pompuar, aq te lyrosur, aq te paskrupullt, mizore, sa dhe qesharake ne mendjemadhesine fshatareske.
Dun me pas vartesi vetem nga Argjita Berisha!
90% e ketyre gjykatesve jane berishista te plepave, te gjithe duhet te largohen te rivetohen e te denohet kushdo qe nuk justifikon pasurite. Jane te gjithe te korruptuar, i shohim si jetojne! Nuk behet drejtesia me te korruptuar, e genjen mendja BE-ne, se Usa e ka kuptuar tashme!
KLGJ - ja NUK KA QENE ASNJE HERE E GATESHME PER TE KOORDINUAR PUNENE VET DHE BASHKEPUNUAR ME PARLAMENTIN . KJO QE PO THONE ESHTE THJESHT HIPOLRIZI ! KUR PARLAMENTI I PROPOZOI TE MERRNIN PJESE NE GRUPIN E PUNES PER PERSOSJEN E PROCEDURAVE TE REFORMIMIT TE SISTEMIT TE DREJTESISE , KLGJ - ja E REFUZOI ME NJE HERE DHE PA DHENE ASNJE ARGUMENT ,NDERSA TANI QE U PREKEN INTERESAT "HARRON" REFUZIMIN E FTESES QE I BERI PARLSMERNTI .