Vrasja në Sukth, policia: Ishte në hetim për trafik narkotikësh në Holandë, 7 persona të shoqëruar

27 Shtator 2023, 15:45Kronika TEMA

Vrasja në Sukth, policia: Ishte në hetim për trafik

Shtatë persona janë shoqëruar për t’u marrë në pyetje nga policia, lidhur me vrasjen e Fatjon Dervishit mesnatën e djeshme në Sukth.

Mes të shoqëruarve është edhe shoku i dervishit, shtetasi me inicialet E.Sh. i cili ndodhej në makinë gjatë atentatit me armë zjarri.


Policia thotë se është duke bashkëpunuar me prokurorinë dhe Interpolin për të zbuluar lidhjet e viktimës me persona të tjerë që mund të përbëjnë interes për hetimin. Gjithashtu janë sekuestruar telefonat e tij dhe kamerat e sigurisë në itinerarin që ai kishte përshkuar mbrëmë.

Sipas informacionit nga autoritetet Holandeze, viktima kishte qenë hetuar në këtë shtet për lëndë narkotike.

Fatjon “Toni” Dervishi ishte me precedent edhe në Spanjë, si dhe ishte autor i plagosjes së një vazje një vit më parë në një hotel në autostradën Tiranë-Durrës.

Njoftimi i Policisë:

Në lidhje me ngjarjen e ndodhur rreth orës 23:45, të datës 26.09.2023, në Katund, Sukth, ku shtetas ende të paidentifikuar qëlluan me armë zjarri, në drejtim të automjetit që drejtonte shtetasi T. D. (M.), 37 vjeç, banues në Katund, Sukth, i cili si pasojë humbi jetën, në spital, ju informojmë se:

Sapo kanë marrë njoftim, shërbimet e Policisë së Durrësit dhe 2 grupe të FNSH, Tiranë, kanë mbërritur në vendngjarje dhe kanë ngritur pika kontrolli në të gjitha akset që lidhen me zonën, me qëllim kapjen e autorëve. Gjithashtu, grupi hetimor, i ngritur posaçërisht për zbardhjen e këtij rasti, ka vijuar punën, në drejtimin e prokurorit, për të fiksuar çdo provë që do të çojë në zbardhjen e ngjarjes dhe në identifikimin e autorëve.

Shërbimet e Policisë, në drejtimin e prokurorit, kanë kryer të gjitha veprimet hetimore dhe procedurale, për rastin. Konkretisht, deri më tani, në ambientet e Policisë, janë shoqëruar për t’u pyetur mbi rrethana të kësaj ngjarjeje, 7 shtetas (mes tyre shtetasi E. Sh., pasagjer në automjetin që drejtonte 37-vjeçari, në momentin e të shtënave), janë sekuestruar kamerat e sigurisë me pamje nga aksi rrugor “Maminas – Shijak - Sukth – Sallmone” (aksi që kishte ndjekur shtetasi T. D. (M.)), janë ushtruar kontrolle banesash, janë këqyrur celularë, si dhe është bashkëpunuar me ZQK Interpol Tiranën, për të identifikuar lidhje shoqërore të viktimës apo shtetas me të cilët mund të ketë pasur konflikte, jashtë vendit. Gjithashtu, janë sekuestruar automjeti që drejtonte T. D. (M.) dhe 2 celularët e tij, dhe vijon ekzaminimi i hollësishëm i tyre.

Nga verifikimet e deritanishme të kryera në koordinim me homologët holandezë, ka rezultuar se shtetasi T. D. (M.) ka qenë hetuar në këtë shtet, për trafikim të lëndëve narkotike.

Materialet për këto veprime procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për kryerjen e hetimeve të mëtejshme, me qëllim zbardhjen e dinamikës së kësaj ngjarjeje, për identifikimin dhe kapjen e autorëve.

Lini një Përgjigje