Te fundit
Bad Bunny bën histori: artisti i parë latin që kryeson skenën e Super Bowl 2026
29 Shtator 2025, 11:01Lifestyle
TEMA
Historia po shkruhet në skenën më të madhe të NFL-së. Superylli portorikan Bad Bunny do të jetë kryeartisti i spektaklit gjysmëfinal të Super Bowl LX, më 8 shkurt 2026, në Levi’s Stadium, Santa Clara (Kaliforni). Lajmi është konfirmuar zyrtarisht nga NFL, Apple Music dhe Roc Nation.
Fituesi i shumë çmimeve Grammy, me emrin e vërtetë Benito Antonio Martínez Ocasio, do të drejtojë “Apple Music Super Bowl Halftime Show”, shfaqjen më të ndjekur muzikore në botë. Ky moment shënon një tjetër kulm të karrierës së tij pas rezidencës historike në Porto Riko dhe 12 nominimeve për Latin Grammy 2025.
Bad Bunny tha se ky është një moment që shkon përtej vetes së tij: “Është për ata që erdhën përpara meje dhe bënë aq shumë që unë të mund të shënoj këtë ‘touchdown’. Ky moment është për popullin tim, për kulturën dhe për historinë tonë,” – u shpreh ai.
Jay-Z, themeluesi i Roc Nation, e cilësoi përzgjedhjen si frymëzuese: “Ajo që ai ka bërë dhe vazhdon të bëjë për Porto Rikon është e jashtëzakonshme. Është nder ta kemi në skenën më të madhe në botë.”
Nënkryetari i Apple Music, Oliver Schusser, shtoi se muzika e Bad Bunny ka ngritur muzikën latine në qendër të pop-kulturës globale, duke premtuar një shou të paharrueshëm.
Spektakli do të prodhohet nga Roc Nation dhe producenti fitues i çmimit Emmy, Jesse Collins, ndërsa regjisor do të jetë Hamish Hamilton, i cili ka drejtuar edhe performanca të mëparshme të Super Bowl-it.
Në edicionin e kaluar, Kendrick Lamar dhe SZA realizuan një nga performancat më të ndjekura të historisë së Super Bowl-it me mbi 133 milionë shikues. Tani, sytë e botës do të jenë tek 8 shkurti 2026, kur Bad Bunny pritet të dhurojë një shfaqje spektakolare për miliona fansa në mbarë globin.
Më të lexuarat
24 oret e fundit
Javen e fundit
Blog Tema
Lini një Përgjigje