Te fundit
Tajani mbledh në Romë krerët e diplomacisë së Ballkanit Perëndimor
4 Shkurt 2024, 21:20Politika
TEMA
Krerët e diplomacisë së vendeve të Ballkanit Perëndimor do të mblidhen të hënën (5 shkurt) në kryeqytetin italian për të diskutuar mbi rrugëtimin e gjashtë vendeve ballkanike drejt integrimeve evropiane, ku një vëmendje e veçantë pritet t’i kushtohet forcimit të bashkëpunimit ndërmjet vendeve të rajonit dhe Bashkimit Evropian (BE) në dritën e “fërshëllimes” së zgjerimit.
Zëvendëskryeministri dhe Ministri i Punëve të Jashtme të Italisë, Antonio Tajani, do të jetë nikoqir i takimit që do të zhvillohet në Romë, ndërsa në këtë takim pritet të marrin pjesë ministrat e jashtëm të Kosovës, Shqipërisë, Bosnjë dhe Hercegovinës, Maqedonisë së Veriut, Malit të Zi dhe Serbisë, në përpjekje për të nxitur dhe përshpejtur procesin e integrimeve evropiane.
Qeveria e Italisë prej kohësh synon të mbështesë stabilitetin dhe ekonominë rajonale, por edhe forcimin e dialogut për çështje të politikës së jashtme, deri në anëtarësimin e plotë të vendeve të Ballkanit Perëndimor në bllokun evropian. Ky synim optimist erdhi në formën e një dokumenti të nënshkruar nga Italia, Austria, Kroacia, Çekia, Greqia, Sllovakia dhe Sllovenia.
Ballkani Perëndimor është vlerësuar një ndër prioritetet kryesore të Italisë, posaçërisht në aspektin e sigurisë, stabilitetit dhe tregtisë. Në këtë drejtim, administrata italiane synon të luajë një rol vendimtar në procesin e integrimit të Ballkanit Perëndimor në BE, duke ndjekur një politikë aktive ndaj një rajoni të rrethuar nga armiqësitë etnike dhe paqëndrueshmëria.
Gjashtë vendet e rajonit – Shqipëria, Kosova, Bosnje-Hercegovina, Mali i Zi, Maqedonia e Veriut dhe Serbia – synojnë të anëtarësohen në BE dhe janë në faza të ndryshme të arritjes së këtij qëllimi, ndërsa plani i rritjes së BE-së për Ballkanin Perëndimor përfshin investime prej 6 miliardë euro dhe akses në tregun e brendshëm të bllokut evropian në fusha të caktuara.
Një vëmendje e veçantë pritet t’i kushtohet edhe procesit të dialogut për normalizimin e marrëdhënieve Kosovë-Serbi sepse as Kosova e as Serbia nuk do të mund të përfitojnë nga plani i rritjes për Ballkanin Perëndimor në rast se nuk do të ketë përparim konkret në përmbushjen e obligimeve që burojnë nga Marrëveshja Bazë (Bruksel, 27 shkurt 2023 dhe Ohër, 18 mars 2023).
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Shumë të këqija , kanë hyrë e po hyjnë në Shqipëri nga kosovarët , sidomos në gjuhën shqipe që po transformohet duke çvendosur theksin e fjalëve në rrokjen e fundit , njësoj si serbishtja p.sh. lide'r , kompiute'r e plot fjalë të tjera . Një fjalë e përdorur gabim , është fjala "nikoqir" që përmendet edhe në shkrimin me sipër . Kosovarët quajnë nikoqir mikpritësin , pra , të zotin e shtëpisë , gjë që është krejtesisht e gabuar .Kjo fjalë është greke dhe nënkupton njeriun nikoqir , që di të mbajë rregull dhe që nuk harxhon lekun me vend e pa vend ; pra , njeriun kursimtar që i bën ballë jetës edhe me pak të ardhura . Gjirokastritët p.sh. , e quajnë veten nikoqire të mëdhenj ( dhe janë , në të vërtetë) . Nikoqir mund të konsiderohet edhe një i pasur , që ka ditur të kursejë , të ekonomiset e të pasurohet . Edhe neve shqiptarët , e përdorim këtë fjalë me kuptimin e vërtetë të saj , ndërsa kosovarët , krejt ndryshe , por e keqia është tek gazetarët , që po fillojnë t'a përdorin njësoj si kosovarët fjalën nikoqir .