Te fundit
Lufta për ujë në Evropë, super të pasurit luajnë sipas rregullave të tyre
12 Gusht 2023, 14:50Sociale
TEMA
Kur Ludwig Helm dëgjoi për herë të parë se një vilë në qytetin e tij përdorte 80 mijë litra ujë në ditë – 625 herë më shumë se konsumi mesatar ditor i një familjeje me një person në Gjermani – ai mendoi se matësi duhet të ishte me defekt.
Qyteti i pasur i Königstein, i cili ndodhet në shpatet e pyllëzuara të Taunus-it, një varg malor afër Frankfurtit në Gjermani, numëron rreth 98 njerëz me të ardhura vjetore mbi 1 milion euro në mesin e 16 mijë e 700 banorëve të tij.
“Konsumimi i ujit është, në fakt, plotësisht i pakufizuar në disa raste”, tha Helm, kryebashkiaku i Königstein.
Ndërsa nivelet e ujërave nëntokësore bien në rajonin përreth Konigstein, Helm ka kufizuar kur banorët mund të ujitin kopshtet e tyre ose të mbushin pishinat e tyre, në një përpjekje për të siguruar që qyteti të mos mbarojë ujin e pijshëm.
Por këto masa nuk po funksionojnë – kryesisht sepse banorët e pasur i injorojnë ato dhe autoritetet lokale nuk kanë aftësinë për të zbatuar rregullat.
Nivelet gjithnjë e më të ulëta të ujërave nëntokësore po shkaktojnë tharjen e përrenjve dhe lumenjve lokalë.
Në këtë sfond, konsumi i lartë i ujit nga familjet e pasura po fillon gjithashtu t’i vërë banorët kundër njëri-tjetrit dhe po shkakton shqetësim në qytetet e afërta, të cilat kanë frikë për furnizimin e tyre me ujë.
Një numër në rritje i bashkive në të gjithë Evropën po përballen me beteja të ngjashme mes një thatësire të rëndë që ka kapluar kontinentin që nga viti 2018.
Komuna Châteauneuf-Grasse u kthye në lajm në fillim të këtij viti pasi pronarët e pasur të shtëpive – shumica e të cilëve janë shtetas të huaj – u tha se konsumojnë më shumë ujë në një javë sesa shumica e banorëve të komunës në një vit.
Të frustruar, autoritetet lokale dhe OJQ-të po u bëjnë thirrje qeverive kombëtare dhe BE-së që të ndihmojnë në kontrollin e kërkesës për ujë me masa që variojnë nga rimendimi i sistemeve të çmimit të ujit deri te rregullimi i mënyrës sesi uji i pijshëm shpërndahet midis shtëpive të banimit, industrisë dhe bujqësisë.
Gati një e treta e evropianëve janë të prekur nga stresi i ujit, sipas Agjencisë Evropiane të Mjedisit.
Kjo pritet të përkeqësohet pasi thatësirat po bëhen më të shpeshta dhe më intensive me ndryshimet klimatike.
Një studim i botuar në revistën Nature zbuloi se “përdorimi i paqëndrueshëm i ujit nga elita mund të përkeqësojë krizat e ujit urban të paktën po aq sa ndryshimi i klimës ose rritja e popullsisë”.
Më të lexuarat
24 oret e fundit
Javen e fundit
Blog Tema
Lini një Përgjigje