Rama: 200 mijë qytetarë, mesazh të qartë botës

Edi Rama e ka quajtur tubimin e djeshëm si një shprehje të qartë të asaj çfarë kërkon populli dhe si një mesazh për ndërkombëtarët. Ai doli para medieve pak orë pas përfundimit të demonstratës homazh në nder të viktimave të 21 Janarit, ku nuk hezitoi që tu përgjigjet në anglisht dhe italisht medieve të huaja të akredituara në Tiranë këto ditë, pavarësisht se e pati vështirë të shprehë në këtë gjuhem epitetet që ai përdor për qeverinë aktuale, si “pushteti i matrapazllëkut e kusarllëk”. Ndërsa e konsideroi demonstratën e djeshme si një mesazh dhënë njëzëri nga populli shqiptar, kryesocialisti u bëri thirrje partnerëve ndërkombëtarë të mos tolerojnë, siç tha ai, gjërat që nuk i tolerojnë në vendet e tyre. “Sot 200 mijë qytetarë ishin në një demonstratë homazh që ishte mesazh i një populli që u bashkua dhe foli me të njëjtin zë, në një vend ku zëri i individëve mbytet ditë pas dite nga dhuna e ushtruar” tha Rama. Duke folur në dy gjuhë, Rama tha se Shqipëria është kthyer në vendin ku populli nuk është i lirë të zgjedhë, ndërsa theksoi se situata e krijuar nuk është një luftë për pushtet, por një nevojë e shqiptareve për të thënë se nuk pranon kërcënimin nga terrori i pushtetit. “Sikur kjo të ishte një luftë për pushtet, sot nuk do të kishte 200 mijë qytetarë në nderim të viktimave. Këto homazhe bëhen kur populli ka diçka të madhe për të thënë njëzëri.” u shpreh Rama.

I pyetur lidhur me vendimet e opozitës për ditët në vazhdim, Rama u shpreh i bindur se ajo që është e sigurt mbetet vazhdimi i protestave në të gjithë vendin, deri në përmbushjen e qëllimeve të tyre, “për tu rikthyer shqiptarëve shtetin ligjor”. Duke iu përgjigjur interesimit të gazetarëve, kryetari i opozitës theksoi se pas ngjarjeve të 21 janarit, opozita është më bindur se kurrë, se në situatën e rëndë në të cilën ndodhet vendi, nuk do të mund të bëhen zgjedhje të tjera. Rama thekoi se opozita nuk ka hezituar kurrë dialogun me mazhorancën, duke konfirmuar pjesëmarrjen e saj në parlament në ditët në vazhdim. “Përpjekja jonë nuk është një luftë për të asgjësuar palën tjetër, por është për t’i dhënë një mundësi të re Shqipërisë, duke krijuar kushtet që të gjitha palët të jenë të barabartë përpara Kushtetutës dhe ligjit. Pushteti aktual e ka harruar se përballë ka shqiptarë dhe arrin ti vrasë ata në mes të bulevardit. Asnjëherë nuk kemi hezituar për dialog. Do të jemi në parlament për të çuar përpara atë që kemi nisur.” vazhdoi më tej Rama.

Deklarata e kreut të opozitës dje pas tubimit-homazh

“Kjo është Shqipëria e njerëzve të zakonshëm që nuk lejohen të marrin frymë lirisht nën një regjim fashist, të kalbur nga korrupsioni, që mbrohet me pushkët e Gardës Republikane. Kjo është Shqipëria që sot i’u lut botës të shohë përtej klisheve bajate të progresit në letër dhe të kuptojë se këtu nuk ka dy parti që luftojnë për pushtet, po ka një pushtet që ka vjedhur votat për të vjedhur Shqipërinë dhe një popull që nuk lejohet të zgjedhë lirisht. Dhe së fundi ky pushtet ka vrarë për të vendosur në mes të Evropës, një synim fashist në emër të stabilitetit, të anëtarësisë në NATO, të integrimit në BE. Kjo është Shqipëria e tre burrave të papunë, baballarëve të 6 fëmijëve të mbetur jetimë, njerëz të zakonshëm të këtij vendi që u vranë me armë zjarri në një demonstratë të provokuar qëllimisht nga regjimi, për të justifikuar vendosjen e sistemit të dhunës e të frikës me alibinë e një puci in-ekzistent. Në emër të kësaj Shqipërie unë i kërkoj botës demokratike të rishohë raportet e veta me këtë regjim, të cilin ne nuk do ta tolerojmë në përpjekjet e dhunshme për të rikthyer në këtë vend pushtetin e frikës, cilido qoftë çmimi i rezistencës sonë paqësore, sepse kurrë nuk mund të pranojmë rënien përsëri në natën e errët e partisë shtet e të shtetit parti. Në emër të kësaj Shqipërie unë i kërkoj SHBA dhe BE të mos tolerojnë më tej në këtë vend gjëra që nuk i tolerojnë në vendet e tyre, të mos zgjedhin stabilitetin pa shtet ligjor në vend të demokracisë funksionale. Në emër të kësaj Shqipërie unë ju falënderoj të gjithëve ju, lajmësit e botës së lirë, për praninë e paçmueshme në këtë moment kaq dramatik për vendin tonë dhe ju lutem shumë ta ndihmoni popullin tim duke dëshmuar të vërtetën kumbuese të homazheve të sotme. Sikur kjo të ishte një luftë për pushtet apo tragjedia që ju ka sjellë këtu të ishte një përplasje mes dy forcash të dhunshme, sot s’do kishte 200 mijë qytetarë në nderim të viktimave. Ashtu sikundër s’do kishte kurrë homazhe të tilla gjigande në një vend ku demokracia funksionon, sepse këto homazhe populli mund t’i bëjë vetëm kur ka diçka të madhe për të thënë njëzëri, aty ku zëri i secilit mbytet nga dhuna e përditshme e pushtetit të korrupsionit e të frikës, nga terrori, nga mafia, nga liri e të drejta të kërcënuara. 200 mijë qytetarë në homazhet e sotme janë Shqipëria që s’mund t’i nënshtrohet statukuosë së shtetit të kapur, të korrupsionit galopant, të logjikës se të dyja palët janë njësoj fajtore, për gjithçka, deri edhe kur vriten me pushkët e Gardës Republikane nga qeveria shqiptare të pafajshëm. Kjo që patë sot është Shqipëria që s’mund ta pranojë kurrë rikthimin në regjimin e frikës, ashtu siç nuk mund të pranonte assesi simetrinë e pakuptimtë në të cilën u vendosën, në emër të stabilitetit a të qetësimit të gjakrave edhe manifestimi i homazheve për ata që u vranë edhe manifestimi i fitores të atyre që vranë”.

Dëshiroj me gjithë shpirt që sot, miq të dashur dhe partnerët e respektuar të Shqipërisë, ta kuptojnë se për popullin shqiptarë anulimi i këtyre homazheve ishte dorëzimi përpara fantazmës së asaj frike të dhunshme, e cila për gjysmë shekulli e bëri Shqipërinë regjimin më brutal komunist në Europë dhe që në këto 20 vjet demokracie jofunksionale është kthyer e rikthyer kërcënueshëm si alternativa shtetit ligjor.

I kam mirëkuptuar të gjithë ata deri dje, sot uroj me shpirt që të më mirëkuptojnë ata mua që nuk anulova këtë manifestim.

Reuters: 100 mijë njerëz në protestën homazh të opozitës

18:18 Politika

Rama: SHBA dhe perëndimi mos të lejojnë gjëra që nuk do i toleronin në vendet e tyre

16:50 Politika

Bombë makinës së konsullit shqiptar

12:22 Politika

Bukë dhe dinjitet

12:16 Politika

Mbyllet tubimi paqësor. Mijëra qytetarë morën pjesë në homazhe

10:59 Politika

Meidani dhe Moisiu: Mbështesim fort rolin e presidentit Topi

09:48 Politika

Berisha dorëzon gardistët e akuzuar për vrasje

20:36 Politika

Kryeministri gënjeu për lapsusin e kreut të Gardës, Ndre apo Ndrea?

18:14 Politika

A ishte 21 janari një grusht shteti?

17:48 Politika

SHBA: Do mbyllim ambasadën në Tiranë më 28 janar

17:07 Politika