Prokuroria apelon Gërdecin pa argumente sepse gjykata vonon shpalljen e vendimit

Kur kanë kaluar 20 ditë nga shpallja e vendimit të shkallës së parë për 29 të pandehurit e tragjedisë së Gërdecit, ashtu siç ndodh në të gjitha dosjet penale kur gjykata e vonon arsyetimin e vendimit, edhe kësaj here prokuroria e ka apeluar çështjen pa argumente, duke rezervuar të drejtën që kundërshtimet konkrete t’i japë sapo të marrë vendimin në dorë.

Në dokumentin e apelimit, që Top Channel disponon, thuhet konkretisht: “Sjellim në vëmendje që këtë apel e ushtrojmë në mungesë të vendimit të arsyetuar. Në mungesë të këtij vendimi të arsyetuar dhe argumenteve që ka përdorur kjo gjykatë, në këtë moment të ushtrimit të apelit e kemi absolutisht të pamundur që të japim argumentet tona të hollësishme se ku ka gabuar gjykata. Në këtë mënyrë, këto argumente do t’i japim në një moment të dytë pasi të njihemi me vendimin e arsyetuar të gjykatës, e drejtë kjo që buron nga neni 415/2 i Kodit të Procedurës Penale”.

Duke theksuar se nuk është bërë një analizë e hollësishme dhe objektive e provave të shumta të shqyrtuara gjatë këtij procesi gjyqësor, katër prokurorët e dosjes vijojnë:

“Ky vendim është rezultat i interpretimit të gabuar të ligjit penal material dhe atij procedural penal. Ky vendim është rezultat i kuptimit dhe interpretimit të gabuar të elementeve të veprës penale të parashikuar në nenin 79, germa DH dhe Ë në Kodin Penal dhe nenet 70/2 të Kodit Penal Ushtarak”.

Në pritje të zbardhjes së vendimit, prokurorët mbajnë të njëjtat qëndrime për akuzat dhe dënimet ndaj të pandehurve, sikurse u shprehën në shkallën e parë, duke këmbëngulur që vendimi i gjykatës së Tiranës të ndryshojë duke vendosur sërish tre burime të përjetshme, si dhe ndryshimin e 10 pafajësive të tjera që gjykata i shpalli të tilla.

Edhe avokatët mbrojtës të të pandehurve i kanë bërë apelimet e tyre thjesht duke theksuar pafajësinë e klientëve të tyre dhe duke rezervuar të drejtën që qëndrimi konkret të mbahet sapo të zbardhet verdikti i gjykatës./TCH

Balla replikon me Topallin: Sqaro të kaluarën tënde si “dizenjatore”

19:52 Politika

Berisha, rokadë postesh për të kontrolluar KLD dhe Kontrollin e Shtetit

19:16 Politika

Iku Schmitt

19:10 Politika

Rekord në Lezhë, PS pranon 1114 të rinj në parti, rritet me 61 përqind anëtarësia

18:55 Politika

Braçe: Po na vjedhin mandatin me dhunë në mes të Tiranës

17:49 Politika

Topalli: Rama, si Nexhmije Hoxha. Gramoz Ruçi vrau katër të rinj

17:06 Politika

Rama: Berisha pasi na mbyti me plehrat e sjella nga jashtë, thotë dilni pastrojini

14:32 Politika

Berisha: Presim sezon të shkëlqyer turistik, por nuk e heqim moratoriumin për mjetet e lundrimit

13:43 Politika

Tiranë, 37-vjeçarja hidhet nga kati i 4-t i një pallati

13:21 Politika

Papunësia në eurozonë dhe një grafikë interesante për pagat

13:01 Politika