Ambasadori ynë në Kosovë imiton Berishën, sulmon gazetarin Enver Robelli

Më 15.01.2013, në gazetën “Koha Ditore”, në rubrikën “Vështrime”,  është botuar shkrimi “Lëreni Kosovën të qetë, tiranë të Tiranës!”, me autor publicistin Enver Robelli, në të cilin, ky i fundit, duke u hequr si mesia i ri, i zbritur ne Tokë për të rregulluar fatin e nëpërkëmbur të “dy kombeve politike” – të Shqipërisë dhe të Kosovës, ka marrë në dorë flamurin e shpëtimtarit dhe godet pa mëshirë ”mëkatet” e të majtëve dhe të të djathtëve, të pozitës dhe të opozitës, në Tiranë dhe në Prishtinë.

Me pretendimin se vetëm ai e njeh të vërtetën dhe se vetëm ai e di rrugën e veçantë e të pastër nga duhet të kalojmë, si “shqetësim” të parë, në shkrimin e tij, z. Robelli ngre atë se, gjoja, kryeministri i Shqipërisë, Sali Berisha, po përpiqet që Kosovën ta bëjë temë debati në fushatën elektorale për zgjedhjet e 23 qershorit 2013. Për këtë, ai u referohet propozimeve të fundit të Qeverisë shqiptare, lidhur me shtetësinë, kampionatin e përbashkët të futbollit dhe hapësirën unike të valëve.

E vërteta është që këto propozime nuk janë gjë tjetër, veç pjesë përbërëse e një procesi kompleks dhe të pandërprerë, të filluar vite më parë, nga Qeveria shqiptare dhe ajo e Kosovës, për zhdukjen e pasojave të dhimbshme të ndarjes së dhunshme të kombit tonë. Ndryshe nga publicisti Robelli, i cili, me ngarkesë të theksuar stilistikore, me kolorit figurativ antishqiptar, që zakonisht shoqëron shkrimet agjitative, propagandistike dhe, përgjithësisht, denigruese, me qëllimin e vetëm për të nxirë e njollosur çdo gjë, Ambasada është e mendimit që, me përpjekje të përbashkëta, kemi shënuar arritje të mira në eliminimin e disa prej atyre pasojave si, ndërtimi i autostradës së kombit, i autostradës digjitale, realizimi i lëvizjes së lirë të qytetarëve, deri diku edhe të mallrave, hapja e pikave të reja kufitare dhe doganore, futja në përdorim e abetares së unifikuar, rritja, çdo vit e më shumë, e shkëmbimeve ekonomike dhe tregtare, intensifikimi i shkëmbimeve në fushën e turizmit, artit dhe shkencës, pasurimi i bazës ligjore të bashkëpunimit dypalësh etj. Natyrisht, mbetet ende shumë për të bërë dhe propozimet e fundit janë pjesë e përpjekjeve për të përmbushur boshllëkun e krijuar në vite dhe shekuj.

Një “shqetësim” tjetër, i ngritur nga z. Robelli, është ai, sipas të cilit, Shqipëria kurrë nuk e ka ndihmuar as nuk e ndihmon Kosovën, se gjoja, gjatë 100 vjetëve histori, ajo e ka ndihmuar vetëm një herë në vitin 1999, por edhe atëherë, pak dhe e detyruar nga NATO-ja. Me “zbulimin” epokal të Robellit rezulton se, veç funksioneve të tjera, NATO-ja paska edhe atë të edukimit (në shkrimin e Robellit – të detyrimit) të popujve me ndjenjën e mikpritjes.

E vërteta e thjeshtë dhe e njohur nga të gjithë, por e shtrembëruar apo e mohuar nga nihilistë si publicisti Robelli, është se mikpritja shqiptare, në vitin 1999, ka qenë krejt e natyrshme, e brendshme dhe jo e imponuar, me karakter mbarëpopullor dhe pa asnjë ngjyrim politik, një mikpritje e sinqertë, siç pret vëllai vëllanë. I mrekulluar nga vlerat dhe përmasat e mikpritjes shqiptare, Presidenti Klinton pati deklaruar se “Mikpritja shqiptare fitoi mbi barbarinë serbe”. Ndihma dhe mikpritja e Shqipërisë për bashkëkombësit e saj, në pranverën e vitit 1999, nuk ishte as e para dhe as e vetmja.

“Shqetësim” tjetër i Robellit është se Shqipëria dhe Kosova na qenkan “një” vetëm në manipulimin e zgjedhjeve, në kurdisjen e tenderëve, në vjedhjen e pasurisë publike, në instalimin e sistemit nepotist, në papërgjegjësinë për hapësirën publike dhe në manipulimet nacionaliste.

Në gjykimin tonë, si Shqipëria, ashtu edhe Kosova, si vende në transicion, kanë jo pak probleme, ashtu siç kanë edhe vendet e tjera në Ballkanin Perëndimor. Disa probleme i kanë me natyrë të njëjtë, disa të tjera specifike, por jo gjithçka është baltë, siç e bën z. Robelli. Duke i konsideruar si të pavërteta vlerësimet e tij, mendojmë se më afër realitetit janë vlerësime të tilla si: Shqipëria dhe Kosova janë një në përpjekjet e tyre për konsolidimin e vlerave të lirisë dhe të demokracisë; në punën dhe përpjekjet për realizimin e integrimit në strukturat europiane dhe euroatlantike; natyrisht, ato janë një edhe në aspiratat për integrim dhe bashkim kombëtar, në frymën e vlerave europiane.

Një “shqetësim” tjetër për publicistin Robelli përbën edhe aktiviteti i ambasadorit të Shqipërisë në Prishtinë, i cili, sipas tij, me “leksionet pseudopatriotike” qenka bërë i padurueshëm në Kosovë. Nuk është hera e parë që në faqet e kësaj gazete sulmohet titullari i Përfaqësisë sonë, Islam Lauka, por deri tani, as z. Lauka, as Ambasada, nuk e kanë parë të arsyeshme të merren me to. Kështu do të veprohet edhe në rastin e shkrimit të Robellit. Jo se ai ose autorë të tjerë të ngjashëm me të nuk e meritojnë të kenë një përgjigje ndaj akuzave të tyre krejtësisht të pathemelta, natyrisht, pa rënë në nivelin e shkrimeve dhe etiketimeve të tyre vulgare, por, sepse, krahas detyrave të rëndësishme që ia dikton posti is ambasador, z. Lauka është i angazhuar në polemikën shumëvjeçare me një numër studiuesish dhe analistësh rusë dhe serbë, kundër tezave të tyre antishqiptare, duke qenë i bindur se kështu u jepet përgjigjja e duhur edhe nihilistëve të rinj në Prishtinë apo në Tiranë.

Përgjigjja e Enver Robellit

Ndonëse reagimi i Ambasadës së Shqipërisë në Prishtinë nuk i plotëson kriteret etike dhe profesionale për botim, Redaksia e “Kohës Ditore” ka marrë një vendim të duhur duke e publikuar atë pa asnjë ndërhyrje. Në këtë mënyrë lexuesit kanë mundësinë të shohin nivelin aspak diplomatik, madje të mjerueshëm të Ambasadës së Shqipërisë. Shkruesi apo shkruesit e këtij reagimi nuk merren fare me argumentet e bollshme të prezantuara në kolumnen me titull “Lëreni Kosovën të qetë, tiranë të Tiranës”, por me njollosje personale. Duke qenë përfaqësues të një shteti, ku pjesa më e madhe e medieve janë partiake, diplomatët shqiptarë në Prishtinë i japin vetes të drejtë të denigrojnë të gjithë ata me të cilët nuk pajtohen dhe të cilëve me metoda të një kohe jo fort të largët përpiqen t’ua imponojnë njëmendësinë e tyre. E papranueshme është që Ambasada e Shqipërisë të luajë rolin e një ofiqarie provinciale, e cila shpall antishqiptar çdokënd që mendon ndryshe ose shpalos me argumente propagandën aktuale parazgjedhore në Shqipëri. Kjo sjellje e përgjegjësve të Ambasadës është për keqardhje, por shpresojmë se në kuadër të integrimeve evropiane dhe të zhvillimit demokratik do të përparojë edhe niveli shprehës dhe kulturor jo vetëm i diplomatëve të Tiranës, por edhe i politikanëve në përgjithësi. Ambasada e Shqipërisë në Prishtinë, e sidomos ambasadori, nuk duhet të shqetësohen nga fjala e lirë dhe nga argumentet e shtypit të pavarur. Ambasadori do të duhej të shqetësohej për shkak se politikanë të rangut të lartë në Kosovë kanë filluar ta quajnë “të padurueshëm dhe joserioz” pas deklaratave të tij shpesh të pamatura dhe jashtë rregullave diplomatike. Ky reagim i Ambasadës është shembulli i radhës i kësaj pamaturie, e cila e nxjerr qesharak para publikut edhe vetë shtetin shqiptar.

Enver Robelli, gazetar

Shkup, në Vardar ankorohen anijet e para të stilit të vjetër (FOTO)

12:56 Rajoni

Lapidari nuk hiqet, legalizohet!

12:35 Rajoni

Pritet njohje e shpejtë nga Indonezia

11:49 Rajoni

Krasniqi kërcënon me largim nga PDK nëse Kongresi s’e pret Limajn

11:45 Rajoni

Studentët në Prishtinë marshojnë në mbështetje të Luginës së Preshevës dhe i bëjnë thirrje Tiranës të reagojë

19:15 Rajoni

Mediat serbe: Shqiptarët zhvendosin lapidarin në oborrin e xhamisë?

14:05 Rajoni

Kosova, sërish pjesërisht e lirë

11:52 Rajoni

Evropianëve nuk u pëlqen, por as nuk i pengon rezoluta serbe

11:48 Rajoni

Daçiç: Për karrigen në OKB Kosova duhet të japë diçka

19:48 Rajoni

"Wall Street Journal": NATO-ja, e ngujuar në Kosovë

11:28 Rajoni