Te fundit
Amnistia/Ligjet rrëzojnë amendamentin e PD për vjedhjen e votës
3 Qershor 2014, 15:37Politika
TEMA
Deputetët e maxhorancës në Komisionin parlamentar të Ligjeve rrëzojnë propozimin e një grupi deputetësh të Partisë Demokratike, për një ndryshim në ligjin “Për dhënie amnistie”. Një nga nismëtarët e këtij ndryshimi, deputeti i PD-së Oerd Bylykbashi kërkoi miratimin e kësaj nisme për të ndaluar inkurajimin e vjedhjes së votës.
“Amnistia është një prerogativë e parlamentit dhe nuk hyn në të drejtat e individëve. Parlamenti ka të drejtë ta rikthejë këtë dispozitë tek ndalimet ‘për amnistinë’ duke i hequr prokurorisë çdo lloj pengese për të riçelur çështjen dhe për të filluar hetimin penal për veprën përkatëse”, tha Bylykbashi, ndërsa ftoi deputetët e shumicës që t’i bashkohen këtij amendamenti për t’i vënë fre këtij fenomeni negativ për të ardhmen.
Relatori i pr/ligjit deputeti Vexhi Muçmata tha se nisma është haptazi në kundërshtim me Kushtetutën dhe si e tillë nuk mund të miratohet.
“Një ligj i korpusit të së drejtës penale, siç është ligji “Për amnistinë”, mund të ketë fuqi prapavepruese, vetëm atëherë kur ka efekt favorizues për subjektin e veprës penale apo të dënuarit. Në rastin konkret dispozita e nenit 2 të këtij pr/ligji që kërkon që fuqia e tij juridike të shtrihet më pas në kohë në momentin hyrjes në fuqi të ligjit, është haptas në kundërshtim me një parim kushtetues dhe si i tillë nuk mund të miratohet. Kjo për shkak se subjektet që tashmë kanë përfituar nga zbatimi i ligjit, pasi kanë qenë në ndjekje penale si të dyshuar për kryerjen e një kundërvajtjeje penale, nuk mund të bëhen objekt i efekteve prapavepruese të një ligji më të ashpër, jo favorizues penal, siç është ai që propozohet nga kolegët deputetë”, tha relatori Muçmataj.
Deputeti i Lëvizjes Socialiste për Integrim Petrit Vasili u shpreh se kjo është një çështje teknike dhe nuk është problem politik, duke kërkuar që propozuesit të rishikojnë propozimin e tyre.
“Në propozim thuhet se problemi këtu është zbardhja. Qenka një problem teknik, nuk është as politik. As jemi thirrur për të shprehur një qëndrim politik pasi e kemi shprehur të gjithë bashkë në dakordësinë që kemi gjetur dhe që pohohet dhe nga propozuesit. Kjo nismë përmbajtjen e ka minimale, pa polemikë fare qesharake. Sepse për një zbardhje ligji nuk miratojmë një nismë ligjore që do 84 vota”, tha Vasili.
Kryetari i Komisionit të Ligjeve, Fatmir Xhafaj u shpreh se janë të gjitha arsyet politike, kushtetuese, ligjore dhe procedurale për të mos e miratuar këtë iniciativë.
“Nisma, sa është një nonsens juridik dhe kushtetues, po aq mund të thuhet se është dhe një gafë profesionale apo dhe shprehje e mungesës së integritetit dhe koherencës politike të propozuesve. Ligji “Për dhënie amnistie”, është miratuar në mënyrë konsensuale”, tha Xhafaj.
Lini një Përgjigje
Më të lexuarat
24 oret e fundit
Javen e fundit
Blog Tema
