Rama: Të shporrim gjykatësit e prokurorët e korruptuar (VIDEO)

Kryeministri Edi Rama e cilësoi si një hap në luftën kundër trafikimit të qenieve njerëzore vendosjen e një linje falas për denoncimin e këtij lloj trafiku.

“Dua të jem shumë i sinqertë dhe i drejtpërdrejtë, sepse vetëm kështu besoj tregojmë respekt për vuajtjet e patregueshme e të gjithë atyre që bien pafajësisht pre e rrjeteve kriminale të trafikimit, duke thënë se 23 qershori pati një mesazh shumë të qartë besoj unë edhe për prokurorinë, edhe për gjykatat. Fatkeqësisht, nuk na rezulton se ky mesazh ka shkuar me forcën e duhur dhe ka bërë punën e duhur dhe për të vënë në lëvizjen e duhur, qoftë Prokurorinë, qoftë pastaj Gjykatat.Nevoja për një ndryshim rrënjësor që kulmoi me 23 qershorin nuk ishte nevoja për të ndryshuar një qeveri dhe për ta zëvendësuar me një qeveri tjetër, një parti me një parti tjetër, dhe ca njerëz me ca të tjerë, po ishte nevoja për të ndryshuar drejtimin e vendit dhe  për të ndryshuar shumëçka në këtë vend, që po shkonte keq e më keq”, tha Rama.

Por, ai shtoi se nëse ka diçka që ende nuk po jep asnjë shenjë bindëse se po ndryshon, është drejtësia.

“Jemi të gjithë të vetëdijshëm për këtë. Janë edhe më të vetëdijshëm se ne, nganjëherë, miqtë e partnerët tanë. Nuk ka asnjë shans që ne t’i lëmë Shqipërisë së gjeneratës tjetër, një vend më të denjë, nëse nuk i lëmë edhe një sistem drejtësie të denjë për një vend që është në mes të Europës dhe që synon të bëhet pjesë e Bashkimit Europian, me të drejta të plota”, theksoi ai.

Duke e cilësuar një problem kompleks, Rama u shpreh se përgjegjësia bie drejtpërdrejt mbi ata që janë brenda gjithë strukturës së pushtetit të pavarur gjyqësor.

“Por, e kam thënë dhe dua ta përsëris që ne nuk kemi mandat as për të mbyllur sytë, as për të ngritur duart përpjetë. Ne as do t’i mbyllim sytë dhe as do t’i ngremë duart përpjetë, duke parë se çfarë vazhdon të bëjë sistemi ynë i drejtësisë, duke parë sesi njerëz që marrin kurajën të vrasin ditën për diell, njerëz që marrin kurajën të ushtrojnë dhunë të patregueshme dhe të papranueshme për një vend në mes të Europës, në familje, ditën për diell, janë njerëz të arrestuar e të stërarrestuar dhe të liruar e të stërliruar nga gjykatat.Është fatkeqësi kombëtare që në shumicën e rasteve kemi të bëjmë me kriminelë, me vrasës dhe me dhunues që nuk e kanë për herë të parë dhe që janë në gjendje të lirë dhe që disponojnë përsëri instrumente për të bërë dëm, deri në marrjen e jetës së njerëzve, vetëm për një arsye; Sepse kanë arritur të korruptojnë gjykatës, të cilët nuk kanë asnjë lidhje me profesionin, me misionin dhe me gjithë përpjekjen e përbashkët të shoqërisë dhe me nevojën e çdo familjeje për të pasur siguri për vajzat dhe për djemtë e vet.Kjo është përtej të gjitha mundësive për të duruar. Kjo është përtej të gjitha mundësive për të qëndruar në vend.Kjo është përtej të gjitha mundësive për t’u tkurrur apo për të mos u ngutur, për shkaqe që lidhen me teoritë kushtetuese dhe me teoritë juridike të pavarësisë”, u shpreh Kryeministri.

Në vijim ai shtoi se nuk mund që, nën ombrellën apo me flamurin e pavarësisë në dorë, këta gjykatës t’u marrin jetën njerëzve të pafajshëm.

“Janë bashkëfajtorë dhe janë bashkëvrasës, sa herë që një njeri i pafajshëm humbet jetën dhe sa herë që një vajzë trafikohet apo dhunohet nga trafikantë, që nuk e kanë për herë të parë dhe që janë aty thjesht dhe vetëm falë këtyre gjykatësve. E, ne nuk mund të rrimë dhe t’i shikojmë e të bëjmë thjesht e vetëm shpjegime, duke justifikuar pozicionin tonë, sa herë shohim që shifrat e kriminalitetit të ndikohen duke u rritur këtu dhe atje, gjatë një muaji apo gjatë një muaji tjetër, për shkak se këta kriminelë enden të lirë, me një pushtet që nuk ua ka dhënë e drejta e tyre si gjithë të tjerët për të qenë të lirë, por ua ka dhënë një gjykatës tërësisht i padrejtë dhe një gjykatë tërësisht e korruptuar dhe në bashkëpunim të plotë me krimin dhe me kriminelët”, tha Rama.

Referuar edhe situatës në Lazarat, Rama u shpreh se këta gjykatës e prokurorë përbëjnë Lazaratin real, prandaj ofensiva që pritet të nisë do zgjasë deri në normalitet. Këto deklarata Rama i bëri gjatë prezantimit të linjës falas 116, 006, “Raporto dhe Shpeto” si dhe aplikacionin ‘Raporto dhe Shpëto’ për denoncimin e rasteve të trafikimit të qenieve njerëzore. 

“Është e kotë që ne të shohim gishtin, kur gishti tregon hënën. Ne mund të bëjmë konferenca sa të duam; ne mund të bëjmë aplikacione dixhitale sa të duam; ne mund të bëjmë të gjitha betejat që duam, me uniformat blu dhe me gjithë strukturat e tjera të pushtetit ekzekutiv; ne mund të bëjmë të gjitha ligjet në parlament, por ne duhet të bëjmë betejën që duhet dhe duan jo vetëm shqiptarët, por edhe partnerët tanë ndërkombëtarë, për ta shporrur këtë kastë gjykatësish dhe prokurorësh të korruptuar, që tallen dhe që pasurohen duke marrë jetë njerëzish, në bashkëpunim me kriminelët.  Kjo është e vërteta! Kjo duhet thënë me zë gjithmonë e më të lartë. Ne, ju siguroj, që nuk po rrimë duarkryq, por po përgatitemi shumë mirë. Ofensiva do të fillojë dhe nuk do të ndalet deri kur në Shqipëri të vendoset normaliteti edhe në këtë pjesë, që është jashtë kontrollit të të gjithëve.  Jam shumë i bindur se kanë të drejtë të gjithë ata që kërkojnë të vendoset rregulli, kudo, në çdo metër katror të territorit të vendit, se s’mund të ketë metër katror të territorit të vendit që të jetë jashtë ligjshmërisë në Shqipëri dhe këtu kam parasysh edhe Lazaratin. Por ka një Lazarat tjetër, shumë më të shtrirë në të gjithë territorin, me një pandëshkueshmëri që ia ka garantuar vetes dhe ky është Sistemi ynë i Drejtësisë. Ky është Lazarati real dhe Lazarati më i rrezikshëm, që kërcënon çdo ditë ekonominë, shoqërinë dhe jetën e njerëzve tanë. Njësoj siç është e domosdoshme që edhe Lazarati i vogël të vendoset nën rendin ligjor, është edhe më e domosdoshme që ky Lazarati i shtrirë nga të katër anët, që nuk mbjell kanabis, por mbjell pasiguri e terror duke bashkëpunuar, duke marrë para e duke lëshuar rrugëve, kriminelë që mezi kapen dhe mezi çohen përpara drejtësisë, të shpartallohet, të shkallmohet dhe të zmbrapset një herë e mirë nga ky vend, të cilin e ka marrë peng dhe që po i merr frymën”, u shpreh Kreu i Qeverisë.

Qeveria shqiptare ka ndërmarrë një tjetër hap të rëndësishëm në përpjekjet për të luftuar trafikun e qenieve njerëzore, ndërsa Ministria e Brendshme ka vënë në dispozicion linjën falas 116006 për të denoncuar rastet e këtij lloj trafiku. Ministri i Brendshëm Sajmir Tahiri tha se kjo linjë është një përpjekje në luftën tonë kundër trafikimit të qënieve njerëzore.

“Raporti i Komisionit Evropian vlerësoi pozitivisht hapat e ndërmarra nga Qeveria shqiptare në këto 8 muaj. Për herë të parë në vitin 2014 qeveria e re përcaktoi për qeniet e trafikuara një buxhet të vetin. Është përmirësuar koordinimi i strukturave të policisë dhe prokurorisë, ndërkohë me ndihmën e PAMECA është ngritur një strukturë kundër trafikut të qenieve njerëzore. Një fokus i veçantë  i është kushtuar përdorimit të territorit shqiptar si vend tranzit për të kaluar drejt vendeve perëndimore. Që prej 1 qershorit 2014 Ministria e Mirëqënies Sociale ka vendosur që ndihma ekonomike ti shkojë grave dhe jo kryefamiljarit. Pas thuajse 2 vjet pauze baza e të dhënave të trafikimit të qenieve njerëzore, është rivënë në punë. Vetëm gjatë vitit 2013 janë shënuar  43 raste  për trafikimin e fëmijëve dhe  52 raste të personave të rritur”, tha ministri Tahiri.

Ministri i Brendshëm u shpreh se sot ne po përdorim teknologjinë për të luftuar trafikimin e qenieve njerëzore. Duke folur lidhur me raportin e DASH, Tahiri tha se “ne besojmë me gjithë përpjekjet tona për të luftuar fenomenin e trafikimit të qenieve njerëzore dhe shpresojmë që raporti i Departamentit Amerikan të Shtetit, që do publikohet pas disa javësh ta nxjerrë Shqipërinë nga lista e vendeve nën vëzhgim”.

Ambasadori i SHBA-së Aleksander Arvizu vlerësoi angazhimin e Qeverisë për të luftuar këtë trafik që nuk janë vetëm statistika por njerëz të dëmtuar.

 “Në këtë trafik nuk kemi vetëm statistika, por njerëz të dëmtuar. Është e qartë që kjo qeveri po ndërmerr hapa të rëndësishëm. Kjo qeveri e ka marrë me seriozitet dhe po bën përpjekje. Besojmë se përmes angazhimit të plotë nga ana e Kryeministrit Shqipëria do ia dalë mbanë. Veçanërisht ajo që ne presim të shohim është një bashkëpunim më i madh mes hetuesve, prokurorëve e qytetarëve në mënyrë që sa më shumë persona të mund të ndalohen e ndiqen penalisht për shkelje të ligjit”, theksoi diplomati amerikan.

Policia më në fund hyn në Lazarat/ I faluri nga Presidenti i pret me armë të rënda. Ja lista e personave që qëlluan mbi policinë (VIDEO)

13:23 Sociale

Laç/ Bënte orgji me gruan dhe bashkëfshataren. 50- vjeçari: Jam qejfli!

09:38 Sociale

Nga ndalimi i fesë, te vizita e Papa Gjon Palit

20:54 Sociale

Mbi 500 ndërtime do të prishen pas sezonit veror

17:38 Sociale

Gjatë gushtit, administrata në punë deri më 13.00. E shtuna nuk do të jetë pushim

14:38 Sociale

Tahiri: Siguria ndërtohet së bashku me qytetarë aktivë (VIDEO)

13:21 Sociale

Bashkëpunimi/Beqaj takon Presidentin e Rajonit të Umbrias

11:26 Sociale

Takimi me emigrantët/ Veliaj: Zgjidhëm çështjen e toponimeve, por kemi shumë për të bërë

10:54 Sociale

“Këtë vit presim 100 mijë turistë në Sarandë”

19:20 Sociale

Dita botërore e dhurimit të gjakut, Rama: Është koha që të japim gjak dhe jo të derdhim gjak (VIDEO)

13:29 Sociale