Ata që kërcënojnë me heqje kokash dhe heqin koka i krijuam vetë – me indiferencën tonë, me pafuqinë tonë karshi fanatikëve fetarë. I krijoi shteti duke koketuar me ta, duke i lënë të lirë në ideologjinë çmendurake të tyre.

Kur menjëherë pas luftës shoqatat e prezantuara si humanitare nga vendet arabe ia nisën të mbijnë si kërpudhat pas shiut anembanë Kosovës, askush nuk i mori seriozisht. Njerëzit ishin të preokupuar me sanimin e shkatërrimeve dhe pasojave të luftës, ndërkohë që të tjerë, të cilët kishin qejf të shiteshin si pushtetarë të rinj, preokupoheshin me gjëra aspak fisnike.

Për vite me radhë, shoqatat e tilla që funksiononin nën petkun e humanizmit shpërlanë trurin e fëmijëve dhe të rinjve, të cilëve u predikonin fanatizmin fetar islamik. Të njëjtën gjë e bënin edhe një sërë hoxhallarësh nëpër xhami.

Gjithçka kamuflohej me shpërndarjen e ndihmave për qytetarët e varfër, të cilët pranonin t’u predikojë edhe dreqi, veç ta ngopnin barkun bukë. E shteti asnjëherë nuk u mor seriozisht me hetimin dhe verifikimin e mënyrave të financimit të këtyre shoqatave.

Ata fëmijë të cilët ndiqnin të ashtuquajturat kurse të këtyre shoqatave, e që më 1999 i kishin 10 vjet, tash i kanë 25. Ka nga ata që atëherë ishin thjesht fëmijë të pafajshëm, e tash janë kthyer në predikues fanatikë fetarë, ashtu si mësuesit e tyre të dikurshëm. Ata tash mbjellin urrejtje e mosdurueshmëri ndaj secilit që i takon një feje tjetër, ndaj atyre që nuk janë besimtarë “të vërtetë”. Ata tash kërcënojnë me prerje kokash – ata tash presin koka.

E, nga ata që i inspirojnë e mbështesin të tillët, me qasjen dhe deklaratat e veta, përveç nëpër xhami e organizata të ndryshme, gjenden edhe në Kuvendin e Kosovës. Me një diskurs të papranueshëm për një shtet laik si Kosova, deputetë të caktuar jo rrallë nuk kanë hezituar të shfaqen urrejtjenxitës dhe të bëjnë thirrje për demonizim të të gjithë atyre që nuk mendojnë si ata. Kështu që, kërcënuesit me prerje kokash, prerësit e kokave nuk janë aksident, por janë mbrujtur me urrejtje nga një pjesë e jona.

Ata që me gjuhën e tyre inspirojnë dhe nxisin të rinj që të ndërmarrin veprime kriminale në emër të fesë, ata që kanë nxitur dhe mbrojtur ekstremizmin islamik, tash distancohen nga veprimet monstruoze të bashkëmendimtarëve të tyre.

Ata që përditë predikojnë urrejtje ndaj atyre që i takojnë një tjetër gjinie, një tjetër feje, një tjetër race, një tjetër orientimi seksual tash provojnë të distancohen nga ajo që e kanë ushqyer vetë, nga produkti që e kanë krijuar vetë – nga pasojat, shkaktarë të të cilave kanë qenë vetë me gjuhën dhe veprimet e tyre. Të njëjtët, madje, nga foltorja e Kuvendit të Kosovës shpreheshin kategorikë kundër ligjit për ndalimin e shtetasve kosovarë që luftonin jashtë territorit të vendit. Të tillët t’i quash hipokritë, nuk mjafton.

Në raportin vjetor të qeverisë amerikane lidhur me të drejtat dhe liritë fetare në botë, është evidentuar se në Kosovë ka një rritje të gjuhës urrejtëse. Në raport përmenden me emra imamë që me gjuhën e tyre nëpër xhami e paraqitje publike nxisin urrejtje dhe denoncojnë të gjithë ata që nuk i përkrahin agjendat e tyre. Madje, kërcënojnë edhe me heqje kokash “si të pulës”.

Pikërisht këta imamë dhe të tjerë si ta janë kritikuar nga një grusht gazetarësh e opinionistësh, duke u vënë kështu në shënjestër të sharjeve, fyerjeve dhe kërcënimeve nga më të ulëtat, që vijnë nga ata që propagandojnë një rregullim tjetër shtetëror e shoqëror, një të atillë që mund të ndëshkojë edhe me prerje gjymtyrësh dhe që mund të arsyetojë edhe heqje kokash.

Fakti që një kosovar këput koka fëmijësh është jashtëzakonisht brengosës, por brengosëse është edhe të shohësh në rrjetet sociale bashkëkombës të tij që e tumirin për veprimin që ka bërë.

Shumë shqetësuese, ndërkaq, është qasja e familjarëve të tij, reagimi i të cilëve na jep të kuptojë se e përkrahin, po ashtu, djalin e tyre në veprimin makabër që ka bërë.

Nuk ekziston asnjë arsye, asnjë justifikim, ama asnjë – as fetar, as çfarëdoqoftë tjetër që i jep dikujt të drejtë t’ia heq kokën tjetrit dhe ta shokojë botën me një akt të tillë.

Është përnjëmend koha e fundit që të gjithë të reflektojmë dhe të shohim se ku na ka sjellë indiferenca jonë ndaj atyre që çdo ditë na helmojnë e dhunojnë mendjet tona, na uzurpojnë hapësirat tona, përpiqen të na diktojnë jetën tonë.

Është koha e fundit të veprohet – sa s’jemi kthyer në një popull që monstra lind e ushqen.

*Express

6 komente në “Monstrat që i krijuam vetë”

latifond says:

2 Gusht, 2014 19:56 te 7:56 pm

Propaganda fetare ne Shqiperi,por edhe ne Kosove eshte nje nostalgji luksi.per hir te fajit te supozuar te breznive qe shkaterruan fene ne Shqiperi dhe te brezave indiferente ne Kosove.Kjo nostalgji luksi u kthye e eger,gjykatore e fajeve qe ne te vertete kurrkush nuk i kishte,erdhen nga pjesa me injorante e shoqerise,qe po zevendesonte shkollen me fene.Ne fakt shkelmin fese,si nje apendiks luksi per Shqiperine,ja vune rilindasit.Ata e shpetuan kaq Shqiperi sa kemi;,ata zgjuan popullin;,ata e leshuan pertoke ate barre te panevojshme per shqiptaret,indoktrrinimin fetar.Atehere per hir te kombit,edhe njehere drynin institucioneve fetare!

Përgjigjjuni
Koco says:

2 Gusht, 2014 20:31 te 8:31 pm

I nderuari Ymer Mushkolaj eshte njeriu i duhur i medias dhe i nenpunesit dhe intelektualit e qytetarit atdhetar patriot e vizjonar . Ky eshte intelektuali perfaqesues i denje qe apelon , te parandalohet kjo gjendje ndaj kriminalizimit te popullit nga keto sekte te Islamit Taleban , Xhihadist etj . dhe te kethehen qyteterimit te vertete Evropian, te cilit dhe i perkasim realisht , Clidhje kemi ne ne gen me ata Teroriste Arabe te cileve duhet tu vihet gardhi detyrimisht me ligj .

Përgjigjjuni
1. translate says:
  
  3 Gusht, 2014 01:19 te 1:19 am
  
  jam dakort me ju….. http://bit.do/ja-si-u-vodhen-parate-e-bankes
  
  Përgjigjjuni
Kriza says:

3 Gusht, 2014 01:06 te 1:06 am

mbyllini sa nuk eshte vone institucionet fetare te TRU SHPLARJES se rinise tone te mrekullushme , andej e ketej kufirit!

Përgjigjjuni
Perse censure ? says:

3 Gusht, 2014 11:57 te 11:57 am

Jane tre faktore te cilet ndikuan ne rritjen e ekstremizmit mysliman ne Kosove:
1. BIK-u i cili si institucioni me i larte i religjionit mysliman i perkrahu imamet te cilet pa pra propagandonin idete e tyre pro-vehabiste.
2. Mjetet e informimit te cilat i hapen dyert per propaganduesit e rrymes vehabiste.
3.Qeveria e Kosoves e cila per ruajtjen e pozitave koketonte me partite islamiste dhe bente kualicione me to (partine e Pacollit dhe Partine e Drejtesise). Ndihmese ketu beri edhe VV e cila ne menyre direkte dhe indirekte ishte pro vehabizmit.

Përgjigjjuni
prishtina says:

4 Gusht, 2014 10:00 te 10:00 am

O po t kisha une dicka ne dore mos vet se cfare ju kisha be ketyre funderrinave vehabiste, ptuuuuu bre familjen .

Përgjigjjuni