Pendimi i Sabit Brokajt: Pse gabova me Sali Berishën

Sabit Brokaj në një intervistë për gazetën Ditë, flet për figurën e Sali Berishës, të cilin e njeh mirë pasi e ka pasur koleg si mjek dhe e ka rekomanduar për anëtarësimin në Partinë e Punës.

Në këtë intervistë ai tregon edhe pendimet që ka për Berishën.

Doktor Brokaj, në këtë pjesë finale të intervistës me ju do të përqendrohemi te figura e Dr. Sali Berishës, emri i të cilit është lakuar fort dhe ka ngjallur shumë dyshime gjatë trajtimit që i kemi bërë historisë së vdekjes së Hysni Kapos…

– Dakord. Unë i kam thënë hapur dhe pa asnjë paragjykim ato që di për Saliun, qoftë si mjek, qoftë si politikan dhe u qëndroj atyre.

– Ju dhe Berisha kini qenë të dy mjekë të Hysniut. Kam vënë re se ju bëni një dallim midis mjekut Sali Berisha dhe politikanit Berisha. Pse e bëni këtë? Mos kemi të bëjmë me dy Salinj në këtë rast?

– Po. Sepse është i qartë ky dallim. Por dua të theksoj se sjellja e Berishës si politikan pas vitit 1990 ka ngritur shumë pikëpyetje dhe dyshime edhe për Saliun mjek. Unë mbështetem në ato argumente dhe në ato prova që unë kam patur në raport me ato realitete që i kam përjetuar vetë intensivisht edhe si mjek, edhe si njeri, edhe si politikan. Saliun e njoh mirë, ndaj dhe flas me bindje. Në këtë kontekst unë nuk i jap të drejtë vetes të ngre dyshime përtej provave dhe jashtë realiteteve.

– Sidoqoftë, ju më kini thënë se e keni rekomanduar Berishën të  futej në Partinë e Punës në vitin 1968 dhe se jeni penduar për këtë…

– Po, është e vërtetë se unë e kam rekomanduar Saliun të bëhej komunist. Unë e kam propozuar Saliun për pedagog dhe po unë e kam propozuar më pas të futej në radhët e PPSH. Kur unë isha në vitin e 5-të ai kishte 3 vjet pedagog dhe donte të hynte në parti e për këtë kërkonte mbështetjen time. Mendoja se ai do të ishte biri besnik i Partisë. Unë e bëra rekomandimin sepse kisha bindjen se Sali Berisha ishte besnik i devotshëm i PPSH. Pasazhi më interesant që kam shkruar në atë rekomandim është ky: “Kam bindjen se Sali Berisha do të jetë komunist i devotshëm dhe besnik i partisë dhe i popullit”. Mirëpo Saliu në gjithë veprimtarinë e tij provoi të kundërtën, ndaj dhe jam penduar që i dhashë dorën atëherë…

– Dhe për këtë jeni zhgënjyer?

– Po, jam zhgënjyer dhe penduar thellë. Për gjithë sjelljen e tij në politikë pas vitit 1990. Bëmat dhe gjëmat e Saliut janë thënë e stërthënë gjatë këtyre viteve dhe duket se unë nuk do të shtoj asgjë të re në ato që do të them.

– Mos ka edhe ca mllef në këto që po thoni pasi dihet se Saliu dhe regjimi i tij ju kanë futur në burg për pak kohë dhe ju ka përndjekur politikisht më pas?

– Që Berisha më futi në burg, kjo dihet. E kam thënë edhe tjetër herë. Po nuk është kjo arsyeja kryesore për të cilën unë e kontestoj rreptë Berishën…

– Para se të kalojmë tek arsyet e kontestimit të Berishës politikan, mund të na tregoni se si dhe në ç’rrethana jeni arrestuar?

Po. Ka ndodhur në 28 shkurt 1997. Një ditë më parë kisha dhënë një intervistë të rreptë në një kafe afër PS. E prisja të them të drejtën. Isha me Namik Doklen dhe Arta Daden duke shkuar në Vlorë, kur në Lushnje më doli një makinë policie dhe më arrestuan. Namiku dhe Arta kundërshtuan ashpër, por kjo nuk kishte vlerë për policët. Ata më futën në një makinë dhe më sollën në Tiranë. Gjatë rrugës njëri nga policët ankohej se kishte lënë kamionin me mall dhe ishte veshur polic. Ata kishin problemet e tyre. Kur erdha në Tiranë as akuzën nuk ma thanë. Në qeli isha me katër persona të tjerë. Secili kishte hallet e veta. Ditën e tretë më thirri hetuesi. Por mua më kishin porositur të mos flisja pa avokat, sepse mund të kapeshin në ndonjë fjalë. Avokat kisha Spartak Brahon. Në Gjykatën e Tiranës mora vesh akuzat. Isha organizatori i Kryengritjes së Jugut dhe organizator i bandave të 26 majit. Ata nxorën një regjistrim. Unë kam një motër në Vlorë të cilës i vdiq burri herët e i la fëmijët jetimë. Më mori motra një ditë më tha i kishte ikur djali në demonstratë dhe telefonova vëllain të bënte kujdes dhe thashë se pas demonstratave policët ushtronin dhunë dhe të bënin kujdes në demonstrata. Avokati im u kap tek data e përgjimit që ishte përpara ligjit për përgjimet. Pasi më nxorën, erdhën të më arrestonin sërish me shumë zhurmë në orën 1 të natës por unë nuk ua hapa derën. Madje i kisha vendosur një shul të rëndë dhe policët nuk mundeshin ta hapnin edhe me forcë. Për dy orë pranë shtëpisë sime dhe pallatit u krijua një situatë e nderë. Polici gjithandej dhe unë në shtëpi që nuk dilja. Një polic tha: Mirë ne jemi budallenj por ti qenke gomar që nuk na hap derën. Rreth orës 4 të mëngjesit e hapa derën. Ata më arrestuan dhe më çuan prapë në rajon dhe pas disa orësh më kthyen në shtëpi.

– Gjithsesi ju jeni një kontestues i rreptë i Sali Berishës për gjithë aktivitetin e tij politik të pas vitit 1990, kur ai doli në krye të opozitës politike, e cila mori edhe pushtetin në vitin 1992. Si e argumentoni këtë qëndrim tuajin?

– Shiko, Xhevdet. Ne kemi qenë të dy mjekë të Hysni Kapos dhe e njohim mirë njëri tjetrin. Ateherë ishim edhe komunistë dhe besonim se ishim në krah të njëri-tjetrit, luftonim për një ideal. Por me kapërcimin e madh që Saliu bëri nga komunist në antikomunist, tregoi veten e tij. Ua kam thënë edhe njëherë tjetër se mua më është propozuar nga Ramizi para Saliut të vihesha në krye të PD-së dhe të opozitës, por unë nuk pranova. Saliu pranoi dhe tregoi se çfarë është në të vërtetë në thelbin e tij.

– Ju nuk kini ngritur dyshim për sjelljen e Saliut mjek?

– Sepse në atë kohë sjellja e tij në atë kohë si mjek kur shërbeu si mjek i Hysniut ishte jo dyshuese. Ndërsa argumentet dhe provat që e vënë thellësisht në dyshim sjelljen dhe veprimtarinë e tij erdhën pas ’90-s, duke parë se ç’i bëri kësaj Shqipërie.

– Për shembull? Çfarë bëri ai mbrapsht pas vitit 1990?

– Absolutisht gjithçka. Gjithçka, gjithçka. Po të shprehemi me një fjalë të popullit, ai erdhi me pishë në dorë dhe i vuri flakën Shqipërisë. Është ai arkitekti i shkatërrimit të gjithçkaje materiale në këtë vend, por edhe të vlerave shpirtërore. Ai krijoi shtetin e bandave. Mbetën gjallë rastësisht vetëm digat e hidrocentraleve, pasi mund të mbytej edhe vetë po të shpartalloheshin ato, pasi shtyllave të tensionit të lartë u vuri tritolin. Merre me mend se çfarë ka bërë ai njeri kundër këtij vendi. U fut, nuk e di me ç’të drejtë një mjek, të diktojë edhe historinë. Kur dihet se historia është shkencë që u takon historianëve, madje të mirinformuar dhe jo të disa ballistofilëve dhe disa të tjerëve që dihet pozicioni i tyre në raport me luftën antifashiste dhe me fatet e Shqipërisë. Nuk dua të zgjatem me shembuj të tjerë të keqqeverisjes së tij, pasi ato janë thënë e thuhen përditë në shtyp, si 97-a, grushti i shtetit në 98-n, Gërdecin, 21 janarin e morinë e pafundme të shembujve të tij flagrantë të veprimtarisë kundër Shqipërisë e shqiptarëve.

– Mendoni se Sali Berisha ka një vend në historinë e Shqipërisë dhe ç’vend do t’i jepnit atij në raport me emra të tjerë që kanë spikatur në historinë një shekullore të shtetit shqiptar?

– Unë them më mirë të mos shtrohet kjo pyetje. Këtë e them sepse ai bëri të kundërtën e asaj që pati mundësi të bëjë. Ai mori një Shqipëri absolutisht me gjithçka në kuptimin material dhe një popull shumë solidar dhe e bëri atdheun e tij dhe tonin copa-copa. Shikoni se çfarë po ndodh me Shqipërinë. Përfshi edhe Ahmet Zogun që u shërbeu devotshmërisht serbëve. Dihet se ç’bëri Zogu në raport me Serbinë. Ai u shiti Shën Naumin dhe Vermoshin, likuidoi Komitetin e Mbrojtjes së Kosovës, gjithë inteligjencën përparimtare, i dha territore Serbisë, erdhi me ndihmën e ushtrisë serbe etj., etj. Me Enver Hoxhën nuk ka asnjë pikë krahasimi. Ky, pra Saliu, gjeti një Shqipëri të shtetformuar dhe të kompletuar dhe dihet se si e katandisi. Kështu që nuk e vlen të krahasohet. Me Enverin jo se jo, por edhe as me Ahmet Zogun. Sepse ku u shiti grekëve më shumë se 300 km katror hapësirë detare të pasur me naftë. Këto janë akte të pastërta antikombëtare.

– Megjithatë Berisha sot flet më shumë nga të gjithë për dekomunistizim dhe dekriminalizim të politikës shqiptare. Sa seriozisht duhen marrë thirrjet e tij?

– Saliu këtë e ka tipar të karakterit të tij. Ai bën thirrje për dekriminalizim, në një kohë që është vetë kriminel dhe ndoshta kryekriminel i këtij vendi. I pangjashëm në llojin e vet dhe në keqbërjet e tij. Si mund të merret seriozisht ai? Kjo është një tallje që ai bën me realitetin shqiptar dhe me shqiptarët. Mjerë kush nuk e kupton këtë! Por kur ka një kundërshtar politik, si këtë mazhorancë që në vend ta marrë këtë nismë dhe ta fillojë dekriminalizimin me Saliun, paradoksi qëndron në faktin se këtë e merr Saliu. Kjo është tallja më e madhe që ndodh me Shqipërinë dhe shqiptarët. Këtë mendoj gjithnjë sa herë dalin Saliu dhe Lul Basha kur flasin për dekriminalizimin. Nuk ka fyerje më të madhe për këtë popull.

– Ju duket se jeni skeptik për dekriminalizimin. Po në se bëhet reforma në drejtësi, si i bëhet, nga duhet të fillojë ajo?

– Nuk jam unë skeptik, por ky është realiteti. Ata do të përpiqen që reformën në drejtësi ta shtyjnë e ta shtyjnë pambarimisht me pretekste të ndryshme, mundësisht për pas zgjedhjeve të ardhshme parlamentare, ku ata shohin ëndrra se mund të vijnë sërish në pushtet. Ky është synimi i Berishës. Unë mendoj se në këtë rast, socialistët, duke e ditur fare mirë që Saliu nuk e do reformën në drejtësi, le t’i drejtohen popullit për referendum, siç bënë me Kushtetutën dhe ta zgjidhin njëherë e mirë këtë çështje.

Intervistoi Xhevdet Shehu, Dita

Ja çfarë nuk shkon tek kjo skenografi para-elektorale e Bashës…

11:01 Politika

Mimoza Hafizi ironi me Servet Pëllumbin: Je shqiptari më i lumtur, partia u kthye te Enveri!

10:47 Politika

A do shkojë Ben Blushi në partinë e Kreshnik Spahiut?

10:38 Politika

Rama niset drejt SHBA-së, takimi i parë me diasporën shqiptare

08:09 Politika

Ilir Meta: Të hetohet çdo politikan që i del emri në Panama Papers!

09:38 Politika

HISTORIA/ Viktima e Elbasanit, vëllai i Gentjan Beqirit që u vra teksa ruhej me policë në banesë

09:30 Politika

Servet Pëllumbi: Përjashtimi i Blushit nga PS? Ai ka përjashtuar veten

08:19 Politika

INTERVISTA/ Ilir Meta: Zogu, Enveri e Doktori tanët, pavarësisht se njëri hero e tjetri tradhtar

09:15 Politika

Ja dokumentet qe ju gjetën vëllait të Enkelejd Alibeajt nga policia gjermane

19:00 Politika

Reagon kryetari i Bashkisë Këlcyrë: Shpifje nga një pjesëtar i stafit elektoral të rivalit demokrat

20:22 Politika