Te fundit
Një 1 Qershor pa fëmijët e ngujuar!
2 Qershor 2016, 10:14Sociale
TEMA
Vogëlushi në foto quhet Luan. Ka lindur dhe po rritet, edhe pse tani i ka kaluar dhjetë vjetët, i ngujuar, bashkë me katër djemtë e tij të xhaxhait.
Ai dhe sivëllezërit e tij janë në ‘Llogarinë’ e një gjaku të vjetër. Luani nuk e ka babain; ka shkuar nga kjo botë për gjak.
E ëma, një grua e bukur e re, që e kam takuar kur Luani ishte vetëm një trevjeçar, vari veten në një nga pemët e kopshtit të vogël të shtëpisë së tyre në rrethinat e Shkodrës, sepse nuk mund të pranonte se po rriste një djalë i fatthënë për t’u vrarë.
Djemtë më të rritur të shtëpisë, tani po përpiqen të shkëputen drejt lirisë, por jetojnë gjithkohë të fshehur, dhe Luanin e merr shpesh e më shpesh malli për ta.
Për të kujdeset gruaja e xhaxhait, e cila e do dhe e mbron si fëmijën e vet; ajo është e vetmja që e mban atë familje të varfër me gjithfarë punësh që bën lart e poshtë dhe me lëmoshat e njerëzve që e ndihmojnë.
Por Luani ka filluar të kuptojë. Kur e takova herën e fundit dhe e pyeta se për cilin nga vëllezërit e kishte marrë malli, më tha: “Më ka marrë malli për mamin!” Pastaj, i gjendur në prehërin e mëmës që e rriti, kafshoi buzën dhe përmendi emrin e njërit prej sivëllezërve të tij. Luani po rritet dhe do të kërkojë edhe ai shpejt të fluturoje në këtë botë të lirë, por ai i ka krahët e prerë. Nuk ndjek dot as shkollën, e çfarë do t’i ofrojë kjo botë e madhe për një të pashkolluari dhe të padituri si ai.
Prita se ndoshta ndonjë gazetar, ndonjë televizion, do t’i kushtonte disa minuta edhe 1 Qershorit të këtyre fëmijëve. Asnjë fjalë, vetëm pallavra dhe politikë që grin të gjitha minutat e vyera të jetës së shqiptarëve. Për barin plastik dhe buzëqeshjet po aq plastike të politikanëve, për butaforitë e bojatisjes së shkollave e për gjithfarë ngjyrash hutuese të publicitetit kallp, kanë minuta dhe nge televizionet.
Dje duhej folur edhe për këta famijë, janë me qindra, të kërcënuar me jetë, të ngujuar nëpër shtëpira apo arratisur maleve, në varfëri të plotë, të privuar nga shkolla, të privuar nga jeta shoqërore, dhe mbi të gjitha, duke bërë përditë pakt me Vdekjen. A mund të bëjë një fëmijë i pafajshëm pakt përditë me Vdekjen?
Për ta 1 qershori është edhe më trishtues kur shohin parqe të rinj, të bërë nga milionat që hidhen për bar plastik mbi beton (a thua fëmijët kanë alergji nga bari natyral), miliona që mund të ishin përdorur për këta femijë që janë plakur qysh tani prej shpërfilljes sonë të neveritshme, njëzetepesëvjeçare.
3 komente në “Një 1 Qershor pa fëmijët e ngujuar!”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Perse nuk behet nje ligj i forte : kush aplikon ,ligjin historik te kanunit ,denohet 101 vjet burg .Cfare shoqerie jemi, mendojme per te ardhmen e femijeve apo jo .Perse ne diktaturen komuniste nuk guzonte asnje, ta aplikonte kanunin? Pergjigja eshte shume e thjeshte. Ne cdo shoqeri te kesaj toke , po u la qenja njeri, pa rregulla, ben çfare te doje.
E PAPRANUESHME
Bar artificial femijeve, brenda parkut ,mutacion me i shemtuar artificial nuk mund te behet.TURP PER SHQIPTARET ,NIVEL QE NA TURPERON.
Nje falenderim nga thellesia e zemres e nderuar Flutura Acka. Disa here kam dhene opinionin tim ne lidhje per kete plage trgjedi shoqerore te Shqiperise ne vitin 2016. Nuk e kuptoj si eshte e mundur qe qysh nga PRESIDENTI ,KRYEMINISTRI sebashku edhe me institucionet FETARE ,asnje dhe asnje person nuk e luan qerpikun dhe te thote NDAL …. kjo eshte MAKABER qe femije te vegjel te ngujohen ……………. oh sa drame e madhe e shoqerise SHQIPTARE ne vitin 2016.Hani ,pini ju politikane ,deputete,ju pashallare te feve te ndryshme muslyman,katolik,ortodoks,budiist,jahova etje etje,vec na ndertoni me ndihmen e perendise se korifejve te politikes Shqiptare kisha……..kisha….kisha…. xhami….xhami……xhamiiiiiiii Ishte nje burre qe quhej Enver Hoxha.