Te fundit
Doganat e rajonit, bashkëpunim për kontrollin që shmang armët e shkatërrimit në masë
21 Tetor 2016, 13:57Kronika
TEMA
Shqipëria, Mali i Zi, Kosova, Serbia dhe Maqedonia synojnë krijimin e një sistemi kontrolli eficent për mospërhapjen e armëve të shkatërrimit në masë.
Administratat doganore janë mbledhur në Tiranë për të shkëmbyer praktikat më të mira dhe legjislacionet e vendeve pjesëmarrëse.
Drejtoresha e Përgjithshme e Doganave Belinda Ikonomi tha se “Shqipëria mirëpret të tilla aktivitete, të cilat gjithnjë krijojnë mundësi për shkëmbimin e eksperiencave më të mira, që më pas do të ndihmojnë në kapërcimin e këtyre sfidave”.
Gjatë punimeve të takimit rajonal, mbështetur nga Bashkimi Europian, Ikonomi garantoi angazhim maksimal të Administratës Doganore, jo vetëm në këtë fazë të trajnimit për identifikimin e mallrave me përdorim të dyfishtë, por veçanërisht në zbatimin e këtyre njohurive në punën e përditshme në dogana, ç’ka lidhet ngushtë me rritjen e sigurisë dhe mbrojtjen e konsumatorit.
Duke qenë se Administrata Doganore është një nga strukturat kyçe në kontrollin e eksporteve, Drejtoresha Ikonomi bëri të ditur se doganat në bashkëpunim me Autoritetin Licensues kryejnë inspektime të përbashkëta në pikat doganore dhe komunikojnë rregullisht për të përmirësuar sistemin e kontrollit.
Ndërkohë Dogana ka të integruara në profile risku mallrat me përdorim të dyfishtë dhe vijon përmirësimin e këtyre praktikave.
Ndërsa i shprehu mirënjohje për mbështetjen e dhënë përfaqësuesit të Bashkimit Evropian Eric Martin dhe Koordinatorit Rajonal Matjaz Murovec, Drejtoresha e Doganave nënvizoi se “Shqipëria si vend anëtar i NATO-s dhe aspirant për anëtarësimin në Bashkimin Europian është tërësisht e angazhuar në respektimin principeve të BE-së, gjatë transferimeve të këtyre mallrave dhe detyrimeve që rrjedhin nga anëtarësimi në Marrëveshjet Ndërkombëtare të mospërhapjes së armëve të shkatërrimit në masë”.
Lini një Përgjigje
Më të lexuarat
24 oret e fundit
Javen e fundit
Blog Tema
