Ashtu siç edhe pritej, transferta vlonjate përballë Flamurtarit nuk rezultoi aspak problematike për Kukësin, që arriti të triumfojë me rezultatin 0-3 dhe të ngjitet në kuotën e 6 pikëve, në krye të renditjes bashkë me Skënderbeun.

Vlonjatët janë një skuadër e ndërtuar rishtazi dhe kjo u pa qartë edhe në fushën e lojës, ku kishin zbritur shumë lojtarë të rinj, të cilët njihnin pak ose aspak lojën e njëri-tjetrit, ndërsa nga ana tjetër verilindorët janë një nga të paktat ekipe që kanë punuar mirë në verë.

Flamurtari rezistoi vetëm 23 minuta në sfidën e sotme, pasi ishte sulmuesi vlonjat i Kukësit, Vasil Shkurtaj, që pas një topi të marrë në zonë, veproi bukur teknikisht dhe arriti të gjuajë e të shënojë golin e avantazhit.

Në pjesën e dytë ishte sërish Shkurtaj që shënoi golin e dytë, pasi shtyu në rrjetë një asisti perfekt të Edis Maliqit, ndërsa 10 minuta më vonë ishte mbrojtësi shkodran i Flamurtarit, Olsi Gocaj që shënoi një autogol naiv dhe “vrau” shpresat e vendasve për një rezultat pozitiv në këtë takim.

Debutoi për verilindorët edhe blerja më e re e këtij sezoni, sulmuesi i Kombëtares Shqiptare Kristal Abazaj, i cili erdhi në huazim nga Anderlechti dhe ishte protagonist në autogolin e Gocajt, pasi çoi në zonë topin që shkodrani e devijoi në rrjetë.

Minutat e mbetura u zhvilluan kryesisht në gjysmëfushën vlonjate, ku Kukësi mund të kishte shënuar edhe 2-3 gola të tjerë, por u tregua i rezervuar, ndërsa trajneri i vlonjatëve Sadedini preferoi të eksperimentojë me futbollistët e rinj të hedhur në fushë.

Pas javës së dytë, Kukësi dhe Skënderbeu janë të vetmet skuadra që ia dolën të marrin 6 pikë të plota, ndërsa Laçi, Flamurtari dhe Luftëtari janë ekipet që kanë mbetur në kuotën e zero pikëve.

Kategoria Superiore do të rikthehet sërish në fundjavë, kur të shtunën në orën 16:00 Teuta do të përballet me Luftëtarin, ndërsa në orën 19:00 vëmendja do të spostohet në “Loro Boriçi”, për sfidën mes Vllaznisë e Tiranës.

2 komente në “Shkurtaj “merr për dore” Kukësin, debutim pozitiv për Abazajn”

Rirona Re says:

28 Gusht, 2019 22:03 te 10:03 pm

skuader bythe gjeten nje kale te ngordhur

Përgjigjjuni
Black Eagle says:

28 Gusht, 2019 22:56 te 10:56 pm

Dritan Leli paaftesia eshte Cilsia jote me e mire

Përgjigjjuni